د دەمێ پێنج ساڵان دا من ب هزاران دار چاندینە
دهۆك، بێور حەمدی
ئەمیر بەشیر گەنجەكێ ئێزدیە دیار كر، ئەز سالانە ب هزارەها داران دچینم، دگەل چاندنا توڤێ گۆلان ل هەر جهەكێ ژێدەرێ ئاڤێ لێ هەبیت و گۆت: من دڤێت گەنجێن مە پتر دەربارەی بەرزبوونا پلا گەرمێ بزانن و د هشیاربن و بزانن كا چاندنا داران چەند یا گرنگە ژ بۆ پاشەڕوژا هەر بۆنەوەرەكی.
ئەمیر بەشیر، گەنجەكێ ئێزدی یە و خەلكێ ناحیا خانكێ یە، د دیدارەكێ دا بۆ ڕۆژناما ئەڤرۆ گۆت: ئەڤە بۆ ماوێ پێنج ساڵایە كەفتیمە د ناڤ كارێ دار و گۆڵ چاندنێ دا و من دەستپێكر دناڤ كۆڵان و جاددان دا من چاندن و شیام ل سەر خەلكی ژی دا بەڵاڤ بكەم، دا كۆ ئەو ژی بچینن و گۆت: (دگەل چاندنا داران ئەز تۆڤێ گۆلان ژی دچینم، ل هەر جهەكێ كۆ ژێدەرێ ئاڤێ لێ هەبیت و بەردەوام گول یا چاڤدای بیت).
د بەردەوامیا ئاخفتنا خۆ دا ئەمیری گۆت: ژ ئەگەرێ بەرزبونا پلا گەرمێ ل جیهانێ من ژی دڤیا ژلایێ خۆڤە هاریكاربم و خەلكی هشیاربكەم كۆ ئەم د پێتڤی چاندنا دارا و گۆلاینە و گۆت: (پێتڤییە پشتەڤانی بۆ من و هەر كەسەكی بهێتە كرن یێ كۆ حەزا چاندنا داران ل دەڤ هەبیت، هەر چەندە تا نها ب تنێ دوو كەسێن خێرخواز هاریكاربوینە دگەلمن دا و دیسان ب هاریكاریا باژێرڤانیێ ل دەمێ چاندن و ئاڤدانێ).
ئەمیری دیاركر، گرنگ نینە چاندن ل دەڤەرێن ئێزدیا بان هەر جهەكی بیت یا گرنگ ئەوە دار بهێنە چاندن چونكی هەمی جه ئەردێن خۆدێ نە، من ل خانكێ دەسپێكر، چونكی خەلكێ وێرێ مە و من ژ بۆ داهاتی ژی ل بەرە بەرفرەهتر لێبكەم و ل هەمی جهان بچینم و گۆت (من دڤێت گەنجێن مە ژی پتر شارەزایی د بەرزبونا پلا گەرمێ دا هەبن و پتر د هشیاربن و بزانن كا چاندنا داران چەند یا گرنگە ژ بۆ هەر بۆنەوەرەكی).
