د روودانەكێ دا ل شێلادزێ زارۆیەكی گیانێ خوە ژ دەست دا
ئامێدیێ، مەحمود نهێلی:
ژ ئەنجامێ گرتنا كارەبێ ل سەنتەرێ ناوچەداریا شێلادزێ دوهی ئێڤاری زارۆیەكی گیانێ خوە ژ دەست دا و زارۆیەكێ دی ژی بریندار بوو.
مەسعود تاهر، ژ نەخۆشخانا شێلادزێ بۆ رۆژناما ئەڤرۆ دیار كر، دوهی ئێڤاری ٢/٧/٢٠٢٤ دو زارۆ گەهاندینە نەخۆشخانێ، كو كارەبێ گرتبوون و گۆت: «ئێك ژ وانا هەر ل جهێ روودانێ گیانێ خوە ژ دەست دابوو، یێ دی ژی ب گرانی بریندار بوویە».
مەسعودی دیار ژی كر، ئەو هەردو زارۆیە ب مەرەما مەلەڤانیان چووبوونە سەر رووبارێ زێ ل سەر پرا زێباریا و ل وێرێ تووشی گرتنا كارەبا غەتاسا بووینە و د ئەنجامێ دا ئێك ژ وان گیانێ خوە ژ دەست دا و گۆت: «ئەو زارۆكێ گیانێ خوە ژ دەست دا ناڤێ وی یوسف دلشادە و ژییێ وی دۆرێن 10 سالیێ یە و ئاكنجیێ سەنتەرێ ناوچەداریا شێلادزێ یە، بریندار ژی پشتی ل نەخۆشخانا شێلادزێ چارەسەریێن دەسپێكێ بۆ هاتینە كرن، بۆ نەخۆشخانا ئامێدیێ ب مەرەما وەرگرتنا چارەسەریێ هاتە هنارتن».
