د رۆژا ڤالانتاینێ دا چ ب سەرێ بووک و زاڤایەکى ھات ؟
ئەڤرۆ نیوز، ئێقبال عومەر:
شەڤا بوری ژ ئەگەرێ سوپەکا گازێ ئاگر بەربوویە مالا خێزانەکا سەنتەرێ ناحیا شێلادزێ و ب تەمامی ھاتە سوتن و زیانێن زور پێگەھاندن، لێ یا کو بوویە جھێ دلگرانیا وان و خەلکێ دەڤەرێ ئەوە کو ئەڤە ب تنێ حەفت روژە داوەتا خوە کری و چاڤەرێ بوون ئەڤرۆ گولەکا سوور د روژا ڤالانتاینێ دا پێشکشێ ھەڤدوو بکەن، لێ خانی و ژورا وان یا نڤستنێ ھاتە سوتن.
یەعقوب عەبدولرەزاق، زاڤایێ حەفتیێ بۆ ئەڤرۆ نیوز گۆت: ئەڤە ب تنێ حەفت روژە من و نورایێ ھەڤژینی پێکئینایی، مە مالا خوە بریە دخانویەکێ کرێدا ل سەنتەرێ ناحیا شێلادزێ، شەڤا بوری ب سەرەدان ئەم چوینە مالا دایبابێن خوە ل قاتێ خوارێ یێ خانی، لێ ژ نیشکەکێ ڤە دبینین کو دوکەل و ئاگر یێ ل خانیێ مە ل سەری بەربوی، ھەموو کەلوپەل و خانی و ژورا مەیا نڤستنێ ھاتیە سوتن و پتری دەفتەرەکا دولای زیان ب مە گەھشتیە.
زێدەتر گۆت: ئەڤرۆ ئەز و خێزانا خوە چاڤەرێ بوین کو دروژا ڤالانتاینێ دا کو تایبەتە ب ئەڤینداران ڤە گولێن سوور پێشکێشی ھەڤدوو بکەن، لێ بمابنیڤە ئاگرەکێ سوور و دوکەلا رەش ب سەر خانیێ مەدا گرت و ژیان ل مە تێکدایە، ئەم د خوازین کو جھێن شولەژێ ھاریکاریا مە بکەن داکو دوبارە جارەکا دی خانیێ خوە دروست بکەین ڤە، چونکی ئەم بخوە پەنابەرێن رۆژئاڤایێ کوردستانێ نە و د خانیەکێ کرێ دا دژیاین.
بێوار عەبدولعەیز، بەرپرسێ راگەھاندنا بەرەڤانیا باژێری ل دھۆکێ بۆ ئەڤرۆ نیوز گۆت: شەڤا بوری ژ ئەگەرێ سوپا گازێ ئاگر بەربوویە مالا وەلاتیەکێ کو پەنابەرێ رۆژئاڤایێ کوردستانێ یە ل شێلادزێ، ژ ئەنجامێ روودانێ پتری چوار ملیون و ٧٠٠ ھزار دینار دیناران زیان ب خانی و کەلوپەلێن وا کەفتینە، بەلێ سوپاس بو خودێ چ زیانێن گیانی نەبوون.
