د رەمەزانێ دا بهایێ كەلوپەلێن خوارنێ ب رێژەیەكا مەترسیدار بلند بوویە
سندس سالح سلێڤانەیی
دگەل هاتنا هەیڤا پیرۆزا رەمەزانێ، پێلەكا گرانبوونا مەزن یا بهایێ كەلوپەلێن خوارنێ و پێدڤیێن رۆژانە بازاڕێن هەرێمێ ڤەگرتینە، ئەڤ چەندە ژی بارگرانییەكا گەلەك مەزن ئێخستییە سەر ملێن وەلاتیێن كێمدەرامەت.
مهدی سالح وەلاتیەكێ دهۆكێ یە بۆ ئەڤرۆ گۆت: ب ئەگەرێ ڤێ گرانییێ ئەم نەشێین پێدڤیێن خوە یێن سەرەكی بكڕین، چونكی داهاتێ مە ل سەر مووچەیەكێ دیاركری یە و هەر بلندبوونەكا بهایان دێ ژیانا مە بەرەف تەنگاڤیێ بەت. لەورا فەرە حكومەت ب رژدی ل سەر سیستەمێ گومرگی و رێكارێن بازرگانی بچیتەڤە و چارەسەرییەكا بلەز بۆ ڤێ رەوشێ ببینیت داكو وەلاتی پترتووشی بارگرانیێ نەبن.
رەیان رێڤەبەرێ جهەكێ بازرگانی یێ مەزنە بۆ ئەڤرۆ گۆت: بلندبوونا بهایان ب رێژەیەكا بەرچاڤ و مەترسیدار دەستپێكرییە، ب شێوەیەكێ كو بهایێ كارتۆنا زەیتێ د ناڤبەرا پێنج بۆ شەش هزار دیناران چوویە سەر و بهایێ برنجی ژی شەش بۆ حەفت هزار دیناران بلندبوویە. ئەڤ گرانییە تنێ خوارنێ ڤە ناگریت، كەرەستێن پاقژكەر ژی چار بۆ پێنج هزار دیناران گرانتر لێ هاتینە، د هەمان دەم دا بهایێ سینگێ مریشكێ ب نێزیكی پێنج هزار دیناران بلندبووە و هەر تەنەكا مریشكا ساخ نێزیكی سێسەد دولاران چووە سەر بهایێ خوە یێ جاران.
ناڤبری گۆت ژی: ئەوا جهێ نیگەرانییێ ئەوە كو پێشبینی دهێتە كرن ل رۆژێن بهێت دا ئەڤ بهایە هێشتا بلندتر لێ بهێن، ژبەركو ل دووڤ گۆتنیێن خودانێن كاران، بهایێ كەلوپەلان د ناڤبەرا دەمژمێران دا دهێتە گوهۆڕین. هەر چەندە بازرگانێن مەزن هەول ددەن ب بهایێ بەرێ كەلوپەلان بفرۆشن، بەلێ گرانبوونا جیهانی و خەرجیێن زێدە یێن گومرگی و سیستەمێن نوو یێن وەك ئەسیكودا، ئەو ناچار كرینە كو ل رۆژێن بهێت بهایان بلندتر بكەن. ئەڤ رەوشە ل دەڤ وەلاتیان بوویە جهێ دلگرانیا زۆر.
