د سالڤەگەڕا كۆمكوژیێ دا پەردە ل سەر مۆنۆمێنتا شەهیدێن شكەفتا دەكان دێ هێتە راكرن
شێخان، بارزان مزووری:
نەشوان حسنی، رێڤەبەرێ ناوچەداریا ئەترووشێ بۆ رۆژناما ئەڤرۆ دیار كر، پڕۆژەیێ مونومێنتا شەهیدێن شكەفتا گوندێ دەكان و پڕۆژەیێ دروستكرنا رێكا گوندێ دەكان یێ سەر ب ناوچەداریا ئەترووشێ ڤە ب گوژمێ پتر ژ ملیار دیناران كار ل سەر دهێتە كرن، ل گەل گەهاندنا رێكێ بۆ بەردەرێ شكەفتێ، ژ بەركو بەری نوكە سەرەدانكەر ب پێیان سەردكەفتنە شكەفتێ و دبێژیت: هەردو پڕۆژە د قووناغێن دوماهیێ دانە.
ناڤبری گۆت: «د ناڤ وێ مونومێنتێ دا هەموو زانیاری یێن وان شەهیدان دێ هێنە نڤیسین، ژ بەركو 76 ژن و زارۆك ب شێوەیەكێ هوڤانە ژ لایێ رژێما بەعس ڤە هاتبوونە سۆتن، ب تنێ ئێك ئافرەت د ناڤ ڤێ كارەساتێ دا رزگارببوو، هەتا نوكە ژی د ژیانێ دا مایە».
گۆتژی: «د سالڤەگەڕا كۆمكۆژیا شكەفتا دەكان دا، پەردە ل سەر مونومێنتا شەهیدێن شكەفتا دەكان دێ هێتە راكرن».
بۆ زانین، ل رێكەفتی 18/8/1969 ژ لایێ رژێما بەعس ڤە ئەڤ كۆمكوژیە هاتبوو ئەنجامدان.
