د. سوزان ئیبراهیم: پێدڤه ژن پتر كار ژ بۆ پێگه‌هاندنا خوه بكه‌ت
ئه‌ڤرۆ، ،دلڤین ره‌شید:
بسپوره‌كا بیاڤێ سیاسی بو رۆژناما ئه‌ڤرو دیار كر كو ژ بۆ یه‌كسان كرنا جێنده‌ری د هه‌ر پروسێسه‌كێ دا دڤێت دادپه‌روه‌ری هه‌بیت و ئه‌ڤ یاسایێن گرێدایی مافێ ژنێ رولێ خوه ببینن و گۆت: ئه‌ڤجا دڤێت ئه‌م جڤاك و ژینگه‌ها خوه بنیاسین و ل گوره‌ی وێ ژینگه‌هێ پێنگاڤێن خوه بهاڤێژین و ژنێ پشكداری پرۆسێسا سیاسی بكه‌ین ل سه‌ر بنه‌مایێ شاره‌زایی و لێهاتنێ.
دكتوره سوزان ئیبراهیم بسپور د بیاڤێ سیاسی دا بۆ رۆژناما ئه‌ڤرۆ دیار كر كو ژن شیایه د پروسێسا سیاسی دا ل هه‌رێما كوردستانێ هه‌تا راده‌یه‌كی جهێ خوه بگریت، چونكی ئه‌ڤ پروسێسه ب شێوازه‌كێ دیموكراتیه د سیاسه‌تا هه‌رێمێ دا و گۆت: (سه‌ره‌رای هندێ دده‌مێ هه‌لبژارتنا كه‌سان دا ژبۆ رێڤه‌برنا بیاڤێ سیاسی ژن ل سه‌ر بنه‌مایێ شیان و هزر و بیرمه‌ندی ناهێته هه‌لبژارتن، ژبه‌ركو هێشتا كارتێكرنا مرۆڤكانێ و عه‌شیره‌تگه‌ریێ و به‌رژه‌وه‌ندین به‌رته‌نگ یێن كه‌سۆكی ل سه‌ر ڤێ پرۆسێسێ هه‌نه).
د. سوزانێ ئه‌و چه‌نده ژی دیار كر كو راسته د ده‌ستورێ هه‌رێما كوردستانێ دا ماف یێ دایه ژنێ پشكدار بیت د پروسێسا سیاسی دا و كوتا پێ هاتیه دان بشێت پشكداریێ بكه‌ت د هه‌لبژارتنان دا، به‌لێ نه‌ب وی شێوازیه كو كارتێكرنه‌كا به‌رچاڤ هه‌بیت د مه‌یدانا سیاسی دا و گۆت: (هه‌تا كو ئه‌م بشێین ڤێ ئاریشی چاره‌سه‌ر بكه‌ین دڤێت پره‌نسیپه‌ك بۆ بهێته دانان، نه‌ك ب تنێ ب گوتن بیت به‌لكو ب كریار بیت و ده‌مێ هه‌ر بریاره‌ك دهیته دان گرێدای ماڤێ ژنێ بیت دڤیت ئه‌م وه‌ك ژن ل دووڤ بچین كا ئه‌ڤ بریاره هه‌تا ج راده هاتیه بجه ئینان و جهێ خوه كریه).
د. سوزان بسپور د بیاڤێ سیاسی دا ئه‌و چه‌ند ژی دیار كر كو گه‌له‌ك ئاسته‌نگ یێن هه‌ین به‌رامبه‌ر ژنێ وه‌دكه‌ن كو رولێ وێ د پروسێسا سیاسی دا یێ لاواز بیت ژ وان ژی لایه‌نێ په‌روه‌رده‌یی و جڤاكی و ئابوری، ئه‌ڤ ئه‌گه‌ره وه‌دكه‌ن كو ژن نه‌شێت ب سه‌ربه‌خویی پشكداری ڤێ پرۆسێسێ ببیت و گۆت: (له‌ورا ژن نه‌چار دبیت په‌نایێ بۆ لایه‌نه‌كی سیاسی ببه‌ت، چونكی د جڤاكێ كوردی دا هێشتا ژنێ بخوه باوه‌ری ب ژنێ نینه كو پشته‌ڤانیا ئێكدو بكه‌ن داكو بشێن ب دورستی رولێ خوه د پروسێسا سیاسی دا بگێریت) .
د. سوزان ئیبراهیم د به‌رده‌وامیا ئاخفتنێن خوه‌دا گوت: د قوناغا نوكه دا و د ده‌ستورێ هه‌رێما كوردستانێ دا رێژا 30% ماف ب ژنێ دایه پشكداریێ د پرۆسێسا سیاسی دا بكه‌ت و جهێ خوه دناڤه‌ندا بریارێ دا بكه‌ت، به‌لێ هه‌كه ژنا كورد زێده‌تر كار ژبۆ پێگه‌هاندنا خوه بكه‌ت دشێت ڤێ رێژی ده‌رباس بكه‌ت و بچنه ناڤه‌ندێن بریارێ.
د. سوزانێ گوتژی: (داكو ژنێ زێده‌تر سه‌نگا خوه دناڤ جڤاكی و جهێ بریارێ دا هه‌بیت، باشتره ئه‌و ژنا دهێته هه‌لبژارتن ل سه‌ر بنه‌مایێ شیانا بیت، نه‌ك ب تنێ چونكی ژنه، به‌لكو ل گوره‌ی باوه‌رنامه و شیان و لێهاتنان دانن ئه‌ڤ چه‌نده دێ بیته رێخوشكه‌ر كو ژن پتر كار ل سه‌ر شیانێن خوه بكه‌ت و باوه‌ریا جڤاكی ب ده‌ست ڤه بینیت).
