د. سوهه‌یب حه‌سه‌ن: تیشكا كارتێكه‌ر بۆ هنده‌ك نه‌خۆشان ب مه‌ره‌ما چاره‌سه‌ریێ دهێته بكارئینان
دهۆك، له‌زگین:
تایبه‌تمه‌نده‌كێ تیشكا كارتێكه‌ر راگه‌هاند كو: بۆ هنده‌ك نه‌خۆشان تیشكا كارتێكه‌ر دهێته بكارئینان بۆ چاره‌سه‌ریێ، ئه‌ڤه‌ژی بێ ڤه‌كرن و دورینا جهێ نشته‌رگه‌ریێ دهێته ئه‌نجامدان”.
د. سوهه‌یب حه‌سه‌ن، تایبه‌تمه‌ندێ تیشكا كارتێكه‌ر ل پارێزگه‌ها دهۆكێ دیاركركو سالا 2013ێ ل سه‌ر چه‌ندین كه‌یسا ب رێیا تیشكا كارتێكه‌ر كاركریه و ئه‌نجامیێن وان سه‌ركه‌فتیانه بووینه و گۆت: مه دڤێت تیشكا كارتێكه‌ر زێده‌تر لێ بهێت دناڤ نه‌خۆشخانه‌یێن كوردستانێ دا كو پتر ده‌ست نیشانكرن وچاره‌سه‌ریا نه‌خۆشیان پێ بهێته كرن بێ ڤه‌كرنا جهه‌كێ له‌شێ نه‌خۆشی و پاشی ئه‌و جه بهێته گرێدان ئه‌ڤه هه‌موو نینه، به‌لكو تیشكا كارتێكه‌ر ئه‌وه هه‌كه گرێك هه‌بن ل سه‌ر په‌ریزادێ یانژی گولچیسك و مێلاكی دا ئه‌ڤه هه‌موو ب رێیا تیشكا كارتێكه‌ر دهێنه چاره‌سه‌ركرن بێ نه‌خۆش به‌نجێ وه‌ربگریت و مه‌ترسی ل سه‌ر هه‌بن.
د. سوهه‌یب حه‌سه‌ن، ئاماژه دا وێ چه‌ندێ ژی كو تیشكا كارتێكه‌ر بۆ هه‌موو نه‌خۆشان ناهێته بكارئینان، هنده‌ك نه‌خۆش هه‌نه ئه‌م دهه‌لبژێرین ل دووڤ رێنمایێن سه‌رانسه‌ری جیهانێ و ددووڤدا تیمه‌ك ژ نوشداران روونشتنه‌كێ ل سه‌ر ئه‌نجام دده‌ن ئه‌وژی نوشداری تیشكا كارتێكه‌ر و نوشدارێ نشته‌گه‌ریێ و نوشدارێ تایبه‌تمه‌ندێن وه‌كو یێن په‌نچه‌شێرێ ئه‌ڤه بریارێ ل سه‌ر د ده‌ن كا نه‌خۆشی پێدڤی ڤی جۆرێ نشته‌گه‌ریا تیشكا كارتێكه‌ر هه‌یه یان نه، هه‌كه هه‌بیت دێ بۆ هێته ئه‌نجامدان بێ دروستكرنا برینه‌كێ د له‌شێ نه‌خۆشی دا.
ئاشكه‌را كركو:” تیشكا كارتێكه‌ر پشكه‌كه ژ تیشكێ، نه ب تنێ بۆ ده‌ستنیشانكرنێ دهێته بكارئینان، به‌لكو بۆ چاره‌سه‌ریێ دهێته بكارئێنان ئه‌ڤه رێكه‌كا گه‌له‌ك باشه و ئه‌و نوشدارێ ل سه‌ر كار دكه‌ت پێدڤیه گه‌له‌ك شاره‌زا بیت د ڤی واری دا، چونكو دناڤ له‌شێ مرۆڤێ دا دهێته بكارئینان و بۆ نه‌خۆشی باش نینه له‌ورا ژی نوشداری وێ دكه‌ت یا بۆ نه‌خۆشی باش بیت و د به‌رژوه‌ندیا نه‌خۆشی دا بیت”.
