د. سیروان مەخمووری: ل رۆژا دەنگدانێ خەلك دێ پارتی خەلات كەت
چاڤدێرەكێ سیاسی و شارەزایەكێ دەڤەرێن كوردستانی یێن ژدەرڤەی ئیدارەیا هەرێما كوردستانێ، ئاماژە ب وێ چەندێ دكەت، تنێ پارتی شیایە بەرگریێ ژ دەڤەرێن كوردستانی بكەت و خەلكێ وان دەڤەران هەلوەستێ پارتی و سەرۆك بارزانی ل بیر مایە هەروەسا دبێژیت، پشتڕاستم خەلكێ دەڤەرێن كوردستانی و هەموو دەڤەرێن دی ژی ل رۆژا هەلبژارتنان دێ پاداشتێ پارتی دەنێ هەمبەر خزمەت و بەرگرییا پارتی ژ وەلاتیان كری.
د. سیروان مەخمووری، چاڤدێرێ سیاسی وشارەزایێ دەڤەرێن كوردستانی بۆ رۆژنامەیا (ئەڤرۆ) دیاركر» هەموو پرۆسەیێن هەلبژارتنان د گرنگن و چارەنیڤیسسازن، بەلێ بۆ خەلكێ دەڤەرێن كوردستانی یێن ژدەرڤەی ئیدارەیا حوكمەتا هەرێما كوردستانێ هەلبژارتن مینا یارییا دوماهیێ نە، چونكە هەردەمەكێ كورد ل كێمیێ بدەن ڤێجا ب رێیا پرۆسەیا هەلبژارتنان بیت یان ژی هەر پرۆسەیەكا دی كاریگەریێن راستەوخوە ل سەر بادەكا دەڤەرێن كوردستانی هەیە».
گوت ژی» ل دوماهی هەلبژارتنێن جڤاتا پارێزگەهان ل نەینەوا ئالییەكێ سیاسی یێ چەكدار هەیە شیا كورسیان ببەت و هندەك پلەیێن كارگێری ژی بدەستڤە بینیت، لەوڕا پێدڤییە هەموو وەلاتیێن كورد پشكداری هەبیت ل پرۆسەیا هەلبژارتنان هەتا پێگەهێ كوردان بهێز بیت و هەژمارا دەنگ و كورسیێن خوە زێدە بكەن، هەروەسا ئالیێن كوردی بتایبەتی پارتی دیموكراتی كوردستان دەنگێن پێدڤی بدەستڤە بینیت هەتا بشێت زێدەتر بەرگریێ ژ ئەڤان دەڤەران بكەت».
پتر گوت» هەموو وەلاتیێن دەڤەرێن كوردی بێی جوداهییا حزبی باش دزانن تنێ پارتییە شەڕی بۆ ئاخا كوردستانێ دكەت و بەرگریێ ژ دەڤەرێن كوردستانی دكەت، ل كەركووكێ بیت یان شنگال و مەخموور و خانەقین و نەینەوا هەژمارەكا بەرچاف یا وەلاتییان دێ دەنگی دەنە لیستا 275 یا پارتی دیموكراتی كوردستان و بەربژارێن پارتی، ئەڤ هەموو دەنگەژی یێن هەلوەستێ سەرۆك بارزانی و پارتی نە ل دۆر دەڤەرێن كوردستانێ».
