د سێ سالان دا مە 1100 دەلیڤەیێن كاری بۆ گەنجان پەیداكرینە
پەروین سەلاح:
رێڤەبەرێ كار ل پارێزگەها دهۆكێ راگەهاند، بۆ ڤان سێ سالێن بووری مە نێزیكی 1100 دەلیڤێن كاری بۆ گەنجان دیتینە، لێ ئەڤ سالە دەلیڤەیێن كاری كێمتر مە توماركرینە ژ سالێن بوری، ئەف سالە چو بشتەڤانی نینە ژ رێكخراوا كاری یا نێڤدەولەتی، هەردیسان ل سەر بودجا رێڤەبەریێ یە گەلەك كێم ستاف دەركەفیتە قەزا و ناحیان، لێ ل ڤیرە ل گۆرەی شیانێن مە ئەم خزمەتا گەنجی دكەین و ئابوورناسەك ژی دبێژیت: ب رێژەیەكا مەزن ئەگەرێ چوونا گەنجان بۆ دەرڤەی وەلاتی ژ نەبوونا دەلیڤێن كاری یە و پێدڤیە هەر چو نەبیت دەرچوویێن ئێكێ ل سەر ئاستێ زانكۆیان بهێنە دامەزراندن.
دلخاز خورشید جێگرێ بەرپرسێ مالا لاوان یا ئێكەتیا لاوێن دیموكراتا كوردستانێ بۆ رۆژناما ئەڤرۆ دیار كر: بێگومان چوونا گەنجان بۆ دەرڤەی وەلاتی گەلەك كاریگەریا كری، ب تایبەتی پشتی ئەو كاودانێن سالا 2014 هاتینە پێش، ب دیتنا من گەلەك یا پێدڤیە دەلیڤێن كاری بۆ گەنجی بهێنە پەیداكرن، هندەك جارن ژی كەرتێ تایبەت ژێ بەرپرسیارە كو خۆ بەرپرسیار نابینن بەرامبەر ڤی گەنجێ مە.
زێدەتر گۆت: گەلەك كومپانیێن وەلاتێن بیانی دهێنە دناڤ هەرێمێ دا بۆ كاری، لێ پتریا وان كرێكارێن بیانی ددەنە كاری، چونكە ئەو پارێ ئەو پێ كاردكەن گەنجێ مە پێ كارناكەت، مە رێز بو هەر ئاوارەكێ سەرەدانا هەرێما كوردستانێ كری هەیە، لێ بو نموونە كەسەكێ بیانی ئاوارە دناڤ كەمپەكێ دا دژیت هەموو مەزاختنێن وی بێ بەرامبەرن، ئەگەر رۆژێ دەهـ هزاران كاربكەت ژی نەیێ خوسارەتە، لێ گەنجێ مە ئەڤرۆكە وەكی كاربكەت ب وی بوهای بۆ ناهێتە مەزاختن، چونكە ل سەر ملێن وی گەلەك مەزاختنێن دی هەنە، ڤێ چەندێ ژی گەلەك كارتێكرنا خۆ كریە.
جێگرێ بەرپرسێ مالا لاوان ئاماژە ب وێ چەندێ دا: ئەم وەكو ئێكەتیا لاوێن دیموكراتا كوردستانێ، كاردكەین بۆ پێگەهاندن و ئاڤاكرنا لاوێن كوردستانێ، هەموو دەمان مە هەولدایە بشێین خزمەتا ڤان گەنجان بكەین، ئەگەر ئەم خو ل گەنجی نەكەینە خودان چ كور بیت یان ژی كچ دناڤ هەرێمێ دا بژیت، دێ تووشی كارەساتێن مەزن بین، چونكە گەنجێ مە یێ بەر ب وەلاتەكێ بیانی ڤە دچیت، هەر دیسان ژ ئەگەرێ نەبوونا بێكاریێ بەرەف مادێن هوشبەر ڤە چوویە و تووشی نەخوشیێن دەروونی بوویە، ل بەر ڤێ چەندێ دڤێت ئەم خزمەتا گەنجان بكەین و پێدڤیە حوكمەت ژی هاریكار و پشتەڤان بیت.
د. كاوە عەبدولعەزیز، تایبەتمەندێ ئابووری ل زانكۆیا دهۆك بۆ رۆژناما ئەڤرۆ دیار كر، هەلبەت ل دووڤ زانستێن ئابووری ب رێژەیەكا مەزن ئەگەرێ چوونا گەنجان بۆ دەرڤەی وەلاتی ژ نەبوونا دەلیڤێن كاری یە، ئەڤ قەیرانە ل سەر هەرێمێ دا هاتی چ ل كەرتێ گشتی بیت كو ژلایێ حكومەتێ ڤە ئەڤە ژ سالا 2014 وەرە دامەزراندن راوەستاندی، ژ بەر قەیرانان راوستاندنا پشكا هەرێمێ ژ بوجا گشتی یا ئیراقێ هەر دیسان ئەو شەرێ نە خازراوێ داعشێ و هێزێن لەشكەرێ ئیراقێ حەشدا شەعبی ل سەر سنورێ هەرێما كوردستانێ ئەم تووشی ڤان قەیرانان بوین.
ئاماژە ب وێ چەندێ ژی دا: چوونا گەنجان بۆ دەرڤەی وەلاتی دێ كارتێكرنەكا گەلەك مەزن ل ئابوورێ هەرێمێ كەت، چونكو گەنج بخۆ دهێتە پێناسەكرن بربرا پشتێ یا جڤاكان و گەنج چینەكە ئەو چینە دشێت ئابووری گەش بكەت ئەگەر د كاركرنێ دابیت، چونكە هەر دژیێ زارۆكینیێ دا كەسەكێ بەكاربەرە خێزان و حكومەت هەردیسان جڤاك و ئابوورێ گشتی ئەڤە مەزاختنێ لێ دكەن هەتا دگەهیتە دەمێ بەرهەم ئینانێ.
ئابوورناس كاوە گۆت ژی: دڤێت دەلیڤەیێن كاری بۆ گەنجان بهێنە دیتن، ئەگەر كەرتێ گشتی و حوكمەت نەشێن هەموویان بدامەزرینن، هەر چ نەبیت سەركەفتیێن ئێكێ ل سەر هەر پشكەكا زانستی ب چ شێوە بیت بدامەزرینن، دا بهایێ خواندنێ نەهێتە ژ دەست دان و ململانێ دناڤبەرا وان دا پەیداببیت و حەزا زانكۆیێ هەبیت دگەل خواندنا وێ نە وەكی نوكە بخوونیت ژی ل زانكویێ دێ بێژیت دامەزراندن، نینە ئەف كەلتورە ژ سەرێ وان دا بهێتە دەر، چ ژلایێ كەرتێ تایبەت ڤە بیت یان حكومەت دڤێت ئاسانكاریان بكەت قەرێن بچیك پەیدابكەت بۆ پرۆژێن گەنجان ب رێكا رێكخراوێن نیڤ دەولەتی و ب رێكا بەنكێن بازرگانی یان ژی ب رێكا پێشكێشكرنا هندەك رێنما و شیرەتان دگەل هندەك بەرنامەیێن كاری ئەگەر دشیان دا نەبیت دا بدامەزرینن.
ل دووماهیێ ئابوورناسی گۆت ژی: پێدڤییە حوكمەت هندەك ئاسانكاریان بكەت بۆ وان جهێن رێژەیەكا مەزن یا گەنجان ددەنە كاری و رێگریێ ل هەمبەر هاتنا ڤێ رێژا هاتنا كارمەندێن بیانی نەخاسمە خوارویا ناڤەراستا ئیراقێ یان ژی خەلكێ مە یێ روژئاڤا مە رێز بۆ هەنە كو دەست ب سەر كاری ل پارێزگەها دهوكێ دا گرتی، پتر وان جهان نەچاركەن بدەنە كاری دا رێژا بێكاریێ كێم ببیت و دا بەرەف كۆچكرنا دەرڤەی وەلاتی ڤە هزر د هندێ دا نەكەن.
عەبدولكەریم حەماد محەمەد سەلیم، رێڤەبەرێ كار ل پارێزگەها دهۆكێ بۆ رۆژناما ئەڤرۆ دیاركر، كارێ مە ئەو تشتێ ئەم دگەهینە گەنجی مە ئەم دەلیڤەیێن كاری بۆ دبینین ب رێكا لژنەیێن تایبەت، گەلەك جاران ژی ل گۆرەی شیانێن مە ئەگەر رێكخراو پشتەڤانیا مە بكەن، ئەم هندەك خولان بۆ گەنجان ڤەكەین، چاوا سیڤیا پربكەن یان چاوا بچیتە د ناڤ بازارێ كاری دا.
ناڤهاتی گۆت ژی: مە لیژنەیێن تایبەت یێن هەین دووڤچوونێ ل سەر كاری گەنجی بكەن، هەروەسا لیژنەیێن مە دەردكەڤن بۆ شرۆڤەكرنا یاسایێن كاری بۆ زانینا ئەرك و مافێن خودان كار و كرێكاران، دا بشێن بگونجیت دگەل كارێ خۆ و ژ دەست نەدەت، هەروەسا كارێن جۆرا و جۆر ژی دكەین بۆ خزمەتا گەنجان دا بشێن پتر كاری ببینن و ئەگەر كار ژی دیت دێ چەوا پارێزگاریێ ل سەر كاری خۆ ب رێكا وان ماف و ئەركێن وی خودان كاری.
ل دووماهیێ رێڤەبەرێ رێڤەبەریا كار گۆت ژی: بۆ ڤان سێ چار سالێن بوری نێزیكی 1100 دەلیڤێن كاری مە بۆ گەنجان دیتی نە، لێ ئەڤ سالە دەلیڤەیێن كاری كێمتر مە توماركرینە ژ سالێن بوری، ئەف سالە چو بشتەڤانی نینە ژ رێكخراوا كاری یا نێڤ دەولەتی هەردیسان ل سەر بودجا رێڤەبەریێ یە گەلەك كێم ستاف دەركەفیتە قەزا و ناحیان، لێ ل ڤیرە ل گۆرەی شیانێن مە ئەم خزمەتا گەنجی دكەین.
