د. شاکر بالندی: بەرێخودانا فلم و وێنەیێن سێکسی د بنە ئەگەرێ ھەودانا پرۆستاتان
ئەڤرۆ:
ھندەک جاران دەمێ زەلامی شیانێن ئەنجامدانا کریارا سێکسی نەمینن بەروەخت دھێنە چارەسەرکرن، بەلێ ھندەک جاران دومژدرێژ دبن، گەلەک خەلەتە نەخوش دەرمانێن ژ ھورمونان پێکھاتی بێی شیرەتا نوشداری وەربگریت، خوارنێ ژی رۆلەکێ باش د چارەسەرکرنا بێھێزیا سێکسی دا ھەیە و ئەو کەسێن گەلەک بەرێخودانێ ل فلم و وێنەیێن سێکسی دکەن، حەزا وان کێم دبیت و ھەست ب دیتنا خەونان ژی ناکەن و ئەڤەژی گرێدای دەروونیا مرۆڤی یە.
د.شاکر سەلیم بالندی، تایبەتمەندێ نەخۆشیێن گولچیسکان و نەزووکیێ دیارکر کو دەمێ زەلامی شیان نەبن ب درۆستی کریارا سێکسی ئەنجام بدەت ، نەدوورە ببیتە ئەگەرێ نەزوکیێ، ل دور پرسیارەکێ کو ھندەک وەسان ھزر دکەن بتنێ دەم بۆ دەمی تووشی بێھێزیا سێکسی دبن، ئەرێ ئەوان پێدڤی ب چارەسەریێ ھەیە؟
تایبەتمەندێ نەخوشیێن میزەرۆیێ دیارکر کو دبیت ئەڤە ژ ئەگەرێ وەستیانا دەروونی و لەشی و ماندیبوونا سێکسی پەیداببیت، ئەڤ دیاردە کێم جاران پەیدادبیت و پشتی پەیدابوونێ زەلام ڤەدگەریتەڤە حالەتێ خو یێ سروشتی و پێدڤی ب چارەسەریێ ناکەت، دیسان دەربارەی نەخوشیێن دبنە ئەگەرێ بێھێزیا سێکسی نوشداری گوت: ھندەک جاران نەخوشیا شەکرێ و باوەسیرێ بێھێزیا سێکسی پەیدادکەن ب تایبەت ئەگەر نەخوشی یا دومدرێژ بیت، لەورا پێدڤی یە د وان دەمان دا گرنگیێ ب چارەسەریا ئەگەری بدەین و زێدە ھورمونێن چالاککەر نەدەینە نەخوشی داکو رەوشا وی خرابتر لێ نەھێت.
دەربارەی ئەگەرێن دی یێن بێھێزیا سێکسی گەلەک جور ھەنە ژوانژی یێن دەروونی و ھندەک ژی گرێدای نەخوشیانە و ئەڤ ئەگەرە ھندەک جاران بێھێزیا بەروەخت ژی پەیدادکەن.
گەلەک ژ تووشبویێن بێھێزیا سێکسی، رادبن ب خوارنا ھورمونێن نێرینە وەک (تستوستیرون)؛ بێی شیرەتان ژ نوشداری وەربگرن، ئەرێ وان دەرمانان چ سەربارک ژێ پەیدادبن؟ د بەرسڤا ڤێ پرسیارێ دا، د.شاکر سەلیم دبێژیت: خوارنا ھەر دەرمانەکی بێی شیرەتان ژ نوشداری وەربگرین، ھەلبەت دێ ھندەک ئالوزیان پەیداکەت، ھورمونێ نێراتیێ بۆ ھندەک حالەتێن دەستنیشانکری و ب کەمیێن دەستنیشانکری دھێنە دان و نابیت ھەر کەسێ ژلایێ سێکسی بێھێز بوو راببیت دەرمانان وەربگریت، ژبەرکو نەدوورە ئەو دەرمان رەوشا وی تێک بدەن و کارتێکرن ل جەگەرێ ژی دھێتە کرن و زیانێن مەزن ژێ پەیدادبن، ھەروەسا کارتێکرنەکا مەزن ل نەخوشێن پەنجەشێرا پرۆستاتان دکەن.
سەبارەت مفایێ خوارنێ د چارەسەرکرنا بێھێزیا سێکسی دا، د. شاکری گوت: بێگومان خوارنێ مفا ھەیە، ژبەرکو خوارنا ھەڤسەنگ کو ھەموو کەرستێن لەش پێدڤی دناڤدا ھەبن، کاریگەریا خو ل سەر لەشی و ئەندامێن وی ب رەنگەک گشتی ھەیە و ھەروەسان ل سەر شیانێن سێکسی ژی ھەیە و ھندەک کەرستێن خوارنێ وەکو ماسی و گوشت و ھێکان کاریگەریەکا ئەرێنی ل سەر ڤێ چەندێ ھەیە.
ھندەک دگەل ژن ئینانێ تووشی بێھێزیا سێکسی دبن، ئەڤە چ حالەتە؟
د. شاکر دیارکر کو ئەڤە کاودانەکێ بەروەختە و بتنێ ل رۆژێن ئێکێ ژ ھەڤژیناتیێ پەیدادبیت، پتریا کاریگەرێن وێ د زکماکی نە و زووکا چارەدبن و باشترە ل وی دەمی زاڤا خو دوور بکەت ژ کریارا سێکسی ھەتا کاودانێن وی سەقامگێر دبن و پتر د ھەڤدو دگەھن و ھەتا بووک و زاڤا ژلایێ دەروونی ڤە ئارام دبن.
سەبارەت پرسیارەکێ کو ھندەک گازندەیان دکەن ھندەک جاران وەکو ئاڤەکا نیسەک ژ جھێ دەستئاڤێ دھێت، ئەرێ وان پێدڤی ب چارەسەریێ ھەیە؟نوشداری گوت: ئەڤە ژ پروستاتان دەردکەڤیت و ب تایبەت ل دەمێ ھەودان ھەبن و ھندەک جاران ژی دەما زەلام ژ ھەڤژینا خو دوور دکەڤیت ئەڤ حالەتە ل دەڤ پەیدادبیت، یانژی ل دەمێ زوگوردیێ ھەیە ب تایبەت پشتی خەونان یانژی ل دەمێ دەستئاڤێ ئەو ھەست دکەت کو ئاڤەکا نیسەک دەردکەڤیت.
خەوینی کریارەکا سروشتی یە دەمێ رژینێن زەلامی پر دبن، ئەو ھەست ناکەت و ل دەمێ نڤستنێ ڤالا دبن، بەلێ ل دەمێ زەلام گەلەک بەرێخودانێ ل فلم و وێنەیێن سێکسی بکەت ئەو نەشێت گەلەک ھزرکرنێ ل سێکسی بکەت و دێ بنە ئەگەرێ ھەودانەکا دومدرێژ د پرۆستاتان دا.
