د شه‌رێ سووریێ دا هه‌تا نها نێزیكی ٣٠ هزار زارۆ هاتینه كوشتن
ئه‌ڤرۆ:
ناڤه‌ندا چاڤدێریا مافێن مرۆڤی د راپۆرته‌كێ دا دیار كریه كو د شه‌رێ سووریێ ئانكۆ ژ سالا ٢٠١١ هه‌تا نها ٢٩ هزار و ٦٦١ زارۆ ل سووریێ هاتینه كوشتن و چاره‌نڤیسێ ٥ هزار زارۆیان ژی هه‌تا نها دیار نینه.
ناڤه‌ندا چاڤدێریا مافێن مرۆڤی یا سووریێ كو بنگه‌هێ وێ ل بریتانیا یه د راپۆرته‌كێ دا دیار كریه كو زارۆ قوربانیێن هه‌ری زێده یێن شه‌رێ ل سووریێ نه، چونكو هه‌ر ژ ده‌مێ ده‌ستپێكرنا شه‌رێ سووریێ ئانكۆ ژ سالا ٢٠١١ هه‌تا نها نێزیكی ٣٠ هزار زارۆ هاتینه كوشتن كو ئه‌و یه‌ك ژی تاوانه‌كا گه‌له‌ك مه‌زنه، پرانیا زارۆیان ژ ئالیێ رژێما سووریێ و هنده‌ك ژ وان ژی ب ده‌ستێ رێكخستنا تیرۆرستی یا داعشێ هاتینه كوشتن و هه‌روه‌سا ژ به‌ر ئێرشێن توركیا یێن ل سه‌ر باكورێ سووریێ ژی هژماره‌ك زارۆ بووینه قوربانی.
د راپۆرتێ دا ئه‌و یه‌ك ژی هاتیه دیار كرن كو ١٨١ زارۆ د زیندانێن رژێما سووریێ دا ژ به‌ر ئه‌شكه‌نجه‌دانێ هاتینه كوشتن و هه‌تا نها ژی رژێما سووریێ ته‌رمێن وان راده‌ستی خێزانێن وان نه‌كرینه و ناهێلیت راستیا هه‌ی بۆ رایا گشتی ئاشكرا بیت، هه‌روه‌سا نێزیكی ٥ هزار زارۆ ژی ژ به‌ر شه‌ری ل سووریێ به‌رزه نه، ئانكۆ چاره‌نڤیسێ وان دیار نینن و كه‌س نزانیت كا چ ل وان هاتیه، پرانیا وان ژی ب ده‌ستێ رژێما سووریێ هاتینه به‌رزه كرن.
د راپۆرتێ دا ئاماژه ب هندێ ژی هاتیه كرن كو رژێما سووریێ ل به‌ر چاڤێن هه‌موو جیهانێ مافێن مرۆڤی بنپێ دكه‌ت و ب كوشتنا زارۆیان ژی رژێما ئه‌سه‌دی بۆ هه‌موو جیهانێ سه‌لماندیه كو رژێمه‌كه رێزێ ل مافێن مرۆڤی و مافێن زارۆیان ناگریت و ژ به‌ر هندێ ژی دڤێت جڤاكێ نێڤده‌وله‌تی ب توندی رژێما به‌شاری سزا بده‌ت، لێ مخابن ژ به‌ر به‌رژه‌وه‌ندیێن سیاسی نها كه‌س به‌حسێ دوورخستنا به‌شاری ژ ده‌ستهه‌لاتێ ناكه‌ت و هه‌روه‌سا زێده‌باری هه‌بوونا گه‌له‌ك به‌لگێن كو نیشا دده‌ن رژێما به‌شاری تاوانباره لێ هه‌تا نها كه‌س به‌حسێ سزادانا به‌شاری و رژێما وی ناكه‌ت.
د دووماهیا راپۆرتێ دا ئه‌و یه‌ك ژی هاتیه دیار كرن كو ژ وان هژمارا زارۆیێن كو د شه‌رێ ل سووریێ دا هاتینه كوشتن ٧٤% ژ وان ب ده‌ستێ رژێما سووریێ هاتینه كوشتن، یێن دی ژی ژ به‌ر شه‌رێ ل باكورێ سووریێ ب ده‌ستێ رێكخستنا تیرۆرستی یا داعشێ یان ژی ژ به‌ر ئێرشێن فرۆكێن توركیا و گرۆپێن سه‌ر ب توركیا ڤه جانێ خوه ژ ده‌ست داینه.
ئه‌و یه‌ك د ده‌مه‌كێ دایه كو به‌ری نها ژی رێكخستنا مافێن مرۆڤی یا سه‌ر ب نه‌ته‌وه‌یێن ئێكگرتی دیار كربوو رژێما به‌شاری ب هه‌موو ره‌نگه‌كێ مافێن مرۆڤی بنپێ دكه‌ت و چه‌كێن قه‌ده‌غه‌كری بكار دئینیت و گه‌له‌ك به‌لگه ژی سه‌باره‌ت ب تاوانێن رژێما به‌شاری هاتنه به‌لاڤكرن.
چاڤدێرێن سیاسی ژی دیار دكه‌ن كو هه‌تا شه‌رێ نها ل سووریێ به‌رده‌وام بیت وه‌لاتیێن سڤیل ب تایبه‌تی ژی زارۆ دێ بنه قوربانی و ژ به‌ر هندێ ژی دڤێت هه‌موو وه‌لاتێن جیهانێ ب تایبه‌تی ژی ئه‌مریكا و رۆسیا پێكڤه كار بۆ چاره‌سه‌ریا قه‌یرانا نها ل سووریێ بكه‌ن، چونكو هه‌تا شه‌ر به‌رده‌وام بیت دێ قوربانی ژی هه‌بن و ب تایبه‌تی ژی زارۆ دێ بنه قوربانی و دڤێت ب رێیا چاره‌سه‌ریه‌كا سیاسی كوشتنا زارۆیان و هه‌موو وه‌لاتیێن سڤیل ل سووریێ ب دووماهی بهێت.
