د شەش مەهێن بۆری دا مە مۆلەت دایە 79 پڕۆژەیان
زنار تۆڤی:
سەرۆكێ دەستەیا وەبەرهێنانێ ل هەرێما كوردستانێ ب گەشبینیڤە بەرێ خۆ ددەتە وەبەرهێنانا نیڤا ئێكێ یا ئەڤ سالە و دبێژیت: ب بهایێ پتر ژ ملیارەك و 254 ملیۆن دۆلاران د سێكتەرێن جودا دا وەبەرهێنان ل هەرێما كوردستانێ هاتییە كرن.
د. محەمەد شوكری، سەرۆكێ دەستەیا وەبەرهێنانێ ل حكومەتا هەرێما كوردستانێ بۆ رۆژناما ئەڤرۆ خویا كر، ئامارێن نیڤا ئێكێ یێن ئەڤ سالە، دلخۆشكەرن د بیاڤێن دروستكرنا پڕۆژەیێن نوو دا ل سەرانسەری هەرێما كوردستانێ و گۆت: «د شەش مەهێن بۆری دا، د سێكتەرێن جودا دا وەكو: پەروەردە، وەرزش، چاندن، گەشتیاری، ئاكنجیبوون و بازرگانی، مە مولەت دایە 79 پڕۆژەیێن وەبەرهێنانێ».
گۆتژی: «ب گوژمێ ملیارەك و 254 ملیۆن و 385 هزار و 369 دۆلاران وەبەرهێنان د وان 79 پڕۆژەیان دا هاتییە كرن، د ناڤا وان دا 28 پڕۆژەیێن بازرگانی هەنە و بهایێ وەبەرهێنانا وان 220 ملیۆن و 471 هزارو 330 دۆلارن، دیسا بۆ پتر خزمەتكرنا وەلاتیێن هەرێمێ، مە ئاسانكاری و رێگەپێدان بۆ دروستكرنا پڕۆژەیێن گرنگ و ب مفا زێدە كرینە».
