د. عارف حیتۆ: گه‌له‌ك كرێكارێن بیانی ب قاچاغی هاتینه هه‌رێما كوردستانێ
ئه‌ڤرۆ:
رێڤه‌به‌رێ گشتی یێ كار و ده‌سته‌به‌را جڤاكی ل وه‌زاره‌تا كار و كاروبارێن جڤاكی یا حوكمه‌تا هه‌رێما كوردستانێ دبێژیت: پێدڤیه ل سه‌ر خودان كار و پرۆژان كرێكارێن ناڤخوه بده‌نه كاری.
دكتۆر عارف حیتۆ، رێڤه‌به‌رێ گشتی یێ كار و ده‌سته‌به‌را جڤاكی بۆ ئاژانسا خانی گۆت: “كرێكارێن بیانی یێن فه‌رمی ب رێیا وه‌زاره‌تا كار و كاروبارێن جڤاكی دهێنه هه‌ریمێ، لێ ئه‌وێن ب ڤێ رێكێ نه‌هێن و مۆله‌تا كاری ژ وه‌زاره‌تا كار وه‌رنه‌گرتین كارێ قاچاخ دكه‌ن”.
گۆتژی: “ئه‌وێن ب رێیا كۆمپانیه‌كێ یان پرۆژه‌یه‌كی هاتین ل ده‌مێ ب دووماهی هاتنا گرێبه‌ستا وی دشێت بزڤڕیته وه‌لاتێ خوه و پێدڤیه خودانێن كۆمپانیان به‌رپرسیاریا وی هه‌لبگرن”.
دیار ژی كر، ئه‌و كرێكارێن رێكخراوێن جڤاكێ مه‌ده‌نی دئینن، پڕانیا وان ب قاچاخ دهێن و په‌یوه‌ندی ب وه‌زاره‌تا كار ڤه نینه، هه‌ژمارا وان ژی ناهێته زانین، ل ده‌مێ هه‌بوونا لێپێچینه‌كا یاسایی ب سه‌رپێچكار دێ هێنه هه‌ژمارتن و وه‌زاره‌تا كار چ بودجه بۆ ڤه‌گه‌ڕاندنا وان بۆ وه‌لاتێن وان نینه، چنكی سه‌رپێچیا یاسایێ كرییه.
ده‌رباره‌ی هه‌ژمارا كرێكارێن بیانی ناڤهاتی گۆت: “پار نێزیكی هه‌شت هزار كرێكاران هاتبوونه هه‌ریمێ و پڕانیا وان، نێزیكی 98 % خزمه‌تكارێن ناڤ مالان بوون، دیسا ئینانا كرێكارێن پرۆژان ده‌لیڤێن كاری بۆ كرێكارێن ناڤخوه كێمكرینه ، لێ خزمه‌تكارێن ناڤ مالان كارئاسانی بۆ دهێنه كرن چونكی ل كوردستانێ كه‌س وی كاری ناكه‌ت”.
دكتۆر عارف حیتۆ زێده‌تر گۆت: “د ده‌مێ به‌لاڤكرنا ده‌لیڤێن كاری دا ئه‌م ده‌رفه‌تێ د ده‌ینه وان كه‌سان یێن خوه ل وه‌زاره‌تێ تۆماركرین”.
