د. عەلی تەتەر: هیڤیدارین بەردەوام دلێ جەماوەری شاد بكەن
د یاریەكا دیرۆكی و ب كەرنەڤالەكێ كەلەتۆرێ كوردەواری دا تیما یانەیا دهۆك دەست ب وەرزێ نوو یێ 2023- 2024ێ یێ خولا ئیراقێ یا پیشەكاران- ستێرێن ئیراقێ- یا تەپا پێی كر و شیا ب سەركەفتنەكا ژ هەژی ل سەر هەلگرا قارەمانا وەرزێ بوری یانەیا شورتە یا بەغدایی ئینا ب دو گۆلان بێ بەرانبەر، د یارییا واندا دا ئەوا ل شەڤا دەربازبوویی ژ چارچووڤێ هەڤڕكیێن گەڕا ئێكێ ل یاریگەها یانەیا دهۆكێ و بەرهەڤبوونا جەماوەرەكێ ئێكجار زوور كو دگەهشتنە نێزیكی 20 كەسان هاتیە كرن.
بەری دەستپێكرنا یاریێ ب شێوەیەكێ جوان كەرنەفالێ نیشاندانێن كەلەتۆرێ كوردی ب ستران و دەهوات ژلایێ گرۆپێ ئاهنگان د ناڤا یاریگەهێ دا هاتە دیتن، دووڤدا دادڤانێ یاریێ محەمەد تارق فیركا دەستپێكا یاریێ لێدا، ب مۆرالەكا بلند و پشتەڤانییا جەماوەرێ خوە یاریزانێن تیما دهۆكێ شیان ئاستەكێ مەزن نیشان بدەن و گۆلا ئێكێ پشتی بۆرینا 12 خولەكان ل سەر یانەیا شورتە بینن ئەوا ژلایێ ستێرێ یانەیێ یێ ئیڤۆاری یانیگ زاكێری هاتیە كرن ، پشتی ڤێ گۆلێ گڤاشتن ل سەر گۆلێن هەردو یانەیا هەبوون لی ئەنجامێ نیڤا ئێكێ ب گۆلەكێ بۆ خودانێن ئەردی ب دووماهی هات، د نیڤا دویێ دا ئەلهۆیێن چیا بەردەوامی دا ئاستێ خوە یێ مەزن بەرانبەر دا قارەمانا وەرزێ بۆری شورتە ژی چەندین هێرشێن هەڤدژ هەبوون، لێ شارەزاهییا یاریزانان و خواندنا دروست یا سلێمان رەمەزان شیان د خولەكا 62ێ دا گۆلا دویێ و پشت راستیێ بۆ تیما خوە بینت ئەوا ژلایێ یاریزانێ ڕەڤەندا كورد ل ئۆرۆپا هێران ئازاد هاتیە كرن، بڤێ ئەنجامێ دو گۆلان بێ بەرانبەر تیما دهۆكێ ئێكەم سەركەفتنا دیرۆكی بۆ جەماوەرێ خوە كرە دیاری.
ل دۆر ڤێ سەركەفتنێ د. عەلی تەتەر پارێزگارێ دهۆكێ كەیفخوەشیا خوە دیاركر و گۆت: دەستپێك و ئستارتەكا باش بوو ئەو سەركەفتنا ئەلهۆیێن چیا بەرانبەر قارەمانیێن خولا ئیراقێ یا وەرزێ بۆری، پیرۆزباهیێن گەرم ل هەوە دكەم و هیڤیدارین ئەنجامێن باش ب دەستڤە بینن و دلێ پشتەڤان و هاندەرێن خوە بەردەوام شاد بكەن.
ژلایێ خوەڤە د. عەبدوللا جەلالەدین ژی كەیفخوەشیا خوە دیار كر و گۆت: ئێك ژ ئارمانجێن مە ئەوە كو كەلەتۆر و رەوشەبییریا خەلكێ پارێزگەها دهۆكێ نیشا باژێرێن دی یێن ئیراقێ و دەرڤە بدەین، سۆپاس بۆ خودێ ئەڤ یارییە ب سەركەفتیانە و سلامەتی دەربازبوو، پیرۆز بیت ئەڤ سەركەفتنە ل هەمی پشتەڤانێن یانەیا دهۆك كو ئەگەرێ سەرەكی یێ ڤێ سەركەفتنێ بوون، سۆپاس بۆ پشتەڤانییا جەنابێ حوكمەتێ ب راسپاردا پارێزگارێ دهۆك، سۆپاس بۆ هەمی یاریزان و دەستەیا راهێنەران و دەزگەهێن ئیمناهیێ و هەمی دەزگەهێن راگەهاندنێ پەیاما خوە دورست گەهاندی و بۆ هەر كەسەكێ كارێ خوە بەخشیێ كری د ماوەیێ چار هەیڤێن ب شەڤ و رۆژ ژبۆ سەركەفتنا ناڤێ یانەیا دهۆك و داخوازا لێبۆرینێ دكەین هەكە كێماسیەك هەبیت.
