د كابینا نەهێ دا پتر ژ 900 پرۆژەیان ل دهۆكێ هاتینە بجهئینان
لەزگین جوقی
جێگرێ پارێزگارێ دهۆكێ دیار كر، ل سەردەمێ كابینا نەهێ یا حوكمەتا هەرێما كوردستانێ پتر ژ 930 پرۆژە ل پارێزگەها دهۆكێ هاتینە بجهئینان، ئەڤ سالە چەند جادێن سەرەكی ل دهۆكێ دێ بنە جووت ساید، وەكو جادا باعەدرێ بۆ دهۆكێ و جادا سەرسنكێ بۆ دێرەلوكێ«.
ماجد سەید سالح، جێگرێ پارێزگارێ دهۆكێ بۆ رۆژنامەیا ئەڤرۆ راگەهاند، ئەڤ سالە یا 2024ێ رازیبوون ل سەر بجهئینانا چەندین پرۆژێن نوو هاتیە كرن، ژ وانا ژی چێكرنا جادا و پرۆژەیێن گەشت و گوزارێ و یاریگەه و ئاڤ و كارەب و پەروەردە و ساخلەمیێ دی ل شێلادزی یاریگەهەك هێتە دروستكرن دگەل چێكرنا پرۆژێ كورنیشێ شێلادزێ و ل قەزا سێمێلێ ژی دێ یاریگەهەك هێتە چێكرن، نوكە ئەڤ پرۆژە هندەك چووینە د قوناغا تەندەری دا و پشتی دهێنە راگەهاندن دێ دەست بجهئینانا وان هێتە كرن و ل هەمی قەزا و ناحیا دێ پرۆژە هێنە بجهئینان».
ماجد سەید سالح ئاشكەرا كر، جادا باعەدرێ هەتا دهۆكی گەلەك گرنگە و حوكمەتا هەرێما كوردستانێ گەلەك گرنگیێ ب ڤی پرۆژەی ددەت، دێ جادا باعەدرێ هەتا دگەهیتە دهۆكێ كو هەر ژ ئوڤەرپاسا ناحیا باعەدرێ هەتا زالگەها ئیتوتێ هەموو دێ بیتە جووت ساید، ئەڤ پرۆژە هاتیە گەنگەشەكرن و بریار هاتیە دان جادە بیتە جووت ساید، نوكە پرۆژە د قوناغا دیزاین و ڤەدیتنێ دایە، پشتی ب دووماهی دهێت دێ دەست بجهئینانا پرۆژەی هێتە كرن».
خۆیا ژی كر، ل دهۆكێ بەردەوام پرۆژەیێن گرێدایێ ژین و ژیارا وەلاتیان دهێنە بجهئینان وەكو پرۆژێن ئاڤێ و جادا و كارەب و پەروەردە و ساخلەمیێ و ئەڤ سالە دێ دەست ب پرۆژێ كورنیشی بەنداڤا پارێزگەها دهۆكێ بۆ پتر سەرنج راكێشانا گەشتیاران بۆ پارێزگەها دهۆكێ هێتە كرن».
جێگرێ پارێزگارێ دهۆكێ تەكەز كر، حوكمەتا هەرێما كوردستانێ گەلەك گرنگیێ ب چێكرنا جادەیان ددەت، ب تایبەتی ژی دناڤبەرا پارێزگەها دهۆكێ و هەموو قەزا و ناحیێن سەر ب دهۆكێ ڤە پلان هەیە هەموو جادە ببنە جووت ساید، نوكە ژی رازیبوون هاتیە كرن ل سەر چێكرنا جادا ناحیا سەرسنكێ و هەتا دێرەلوك دێ بیتە جووتساید، ئەڤ سالە دێ پرۆژە كەڤیتە د وارێ بجهئینانێدا و هەتا 40 كیلۆمەتران دێ جادە هەموو بیتە جووت ساید».
