د كابینا نەهێ یا حوكمەتێ دا پترین مۆهلەتێن وەبەرهێنانێ بۆ پڕۆژەیێن پیشەسازی هاتینەدان
زنار تۆڤی:
پەیڤدارێ دەستەیا وەبەرهێنانێ ل هەرێما كوردستانێ دیار كر، هەر ژ دەستپێكا دامەزراندنا دەستەیا وەبەرهێنانێ و هەتا نوكە ب گوژمێ پتر ژ 70 ملیار دۆلاران وان مۆهلەت داینە پڕۆژەیان و 90 هزار دەلیڤەیێن كاری ژی بۆ خەلكێ هەرێما كوردستانێ پەیدا كرینە، هەروەسا هەر ژ دەمێ دامەزراندنا كابینا نەهێ یا حكومەتا هەرێما كوردستانێ 28/7/2019 وان مۆهلەت داینە 374 پڕۆژەیان، كو ب سەرمایێ 15 ملیار و 432 ملیۆن دۆلاران بوویە، دیسا د كابینا نەهێ یا حكومەتا هەرێما كوردستانێ دا زۆرترین مۆهلەتێن وەبەرهێنانێ بۆ پڕۆژەیێن پیشەسازی هاتینەدان.
بەرگەشت ئاكرەیی، زێدەتر بۆ رۆژناما ئەڤرۆ دیار كر، رێنمایێن دەستەیا وەبەرهێنانێ وەسا دەرچووینە، كو ل هەرێما كوردستانێ هەر پڕۆژەكێ بهێتە ئەنجامدان، پێدڤیە 75%ێ كرێكارێن ناڤخوەیی بن و ب تنێ 25%ێ كرێكارێن بیانی بن، ئەو ژی ل دووڤ پێدڤیا پڕۆژەیان بن، ئەڤێ وەكرییە دەلیڤەیێن كاری بۆ كرێكارێن ناڤخوە پتر هەبن، نوكە مەرجە بۆ پڕۆژەیان ئەو ڕێنماییە بهێنە بجهئینان و گۆت: «ئەم بەردەوام چاڤدێرییێ دكەین بۆ هندێ كرێكارێن ناڤخوە پتر مفادارببن».
ناڤهاتی گۆتژی: «هەر ژ دەمێ دامەزراندنا دەستەیا وەبەرهێنانێ یا حكومەتا هەرێما كوردستانێ ئەو پڕۆژەیێن هاتینە پێشكێشكرن دو هزار و 305 پڕۆژە بووینە و ئەوێن هاتینە پەسەندكرن هزار و 546 پڕۆژە بووینە، كو ب گوژمێ 70 ملیار و 706 ملیۆن و 455 هزار و 782 دۆلار بووینە، ئەوێن هاتینە پەسەندكرن 232 پڕۆژە بووینە».
بەرگەشت ئاكرەیی زێدەتر گۆت: «ژ ئەنجامێ ئەوان ڕێنمایێن هاتینە دەركرن ڕێژا كرێكارێن بیانی ل هەرێمێ كێمبوویە و كرێكارێن ناڤخوە ژی پتر دەلیڤەیێن كاری بۆ پەیدا بووینە و ئەڤ سالە حكومەتا هەرێمێ ل بەرە هەژمارا پیڤایی د دانا مۆلەتان دا بشكێنێت و پتری 200 مۆهلەتان بدەتە پڕۆژەیێن وەبەرهێنانێ».
