د كابینەیا نەهێ دا کۆگەهێن ساركەر یێن هەلگرتنا بەرهەمێ ناڤخوە زێدەبووینە
دهوك، لەزگین جوقی:
رێڤەبەریا گشتی یا چاندنێ ل پارێزگەها دهۆكێ راگەهاند، د چارچوڤێ گرنگی پێدانا كابینەیا نەهێ یا حكومەتا هەرێما كوردستانێ ب كەرتێ چاندنێ، کۆگەهێن ساركەر یێن هەلگرتنا بەرهەمێ ناڤخوە زێدەبووینە، ئەڤە ژی بوویە ئەگەر جۆتیارێن بەرهەمێ پتاتان مفایەكێ باش ژ ڤان کۆگەهان ببینن و پشكەكا زۆر ژ بەرهەمێ خوە تێدا هەلبگرن.
ئەحمەد جەمیل، رێڤەبەرێ گشتیێ چاندنێ ل پارێزگەها دهۆكێ خویا كر، د سالا 2019 دا 20 کۆگەهێن ساركەر یێن هەلگرتنا بەرهەمێ ناڤخوە ل پارێزگەها دهۆكێ هەبوون و گۆت: «د سەردەمێ كابینەیا نەهێ یا حكومەتا هەرێما كوردستانێ دا، د سالا 2023ێ و 2024ێ ئەڤ عمبارە ب رێژەكا بەرچاڤ زێدەبووینە، د نوكە دا 126 کۆگەهێن ساركەر ل پارێزگەها دهۆكێ هەنە، ئەڤە ژی پشتی ئاسانكاریێن حكومەتا هەرێما كوردستانێ زێدەبووینە ژ بۆ دانا مۆهلەت و كێمكرنا رۆتینێ و هاریكاریكرنا جۆتیاران د دروستكرنا ڤان کۆگەهان دا».
گۆتژی: «د نوكە دا ل هەر 126 کۆگەهان 600 هزار تەن بەرهەمێ ناڤخوە هاتینە کۆگەهکرن، تایبەت ژی بەرهەمێ پتاتان، ئەڤە ژی ئێك ژ رێكێن سەركەفتی یێن بازاركرنا بەرهەمێ ناڤخوەیە».
