د كۆپا كوردستانێ دا ڕێیا یانەیێن پارێزگەهێ یا ب سانەهی نینە
عەلی حاجی:
فدراسیۆنا فوتبۆلا كوردستانێ پشككێشا قۆناغا 16ێ یا كۆپا كوردستانێ ئەنجامدا ئەوا هەرسێ یانەیێن پارێزگەهێ و ئیدارا سەربەخوەیا زاخۆ تێدا پشكدارن، و بڕیارە یاریێن ڤێ قۆناغێ د حەفتییا بهێت دا ژڤانێ وێ بهێتە دیار كرن.
بڕیارە یانەیا دهۆك دناڤ ئەرد و جەماوەرێ خوە دا مێڤاندارییا یانەیا زانكۆیا جیهان بكەت، یانەیا زاخۆ ژی ل سەر ئەرد و یاریگەها خوە دێ مێڤاندارییا یانەیا ڕزگاری كەت، ژلایێ خوەڤە یانەیا ئاكرێ قارەمانا وەرزێ بۆری و سۆپەرا كوردستانێ دێ ب پشتەڤانییا جەماوەرێ خوە مێڤاندارییا ڕانیە كەت.
ژ یاریێن دی یێن ڤێ قۆناغێ.، یانەیا چەمچەمال- سۆران، خاك- برایەتی، بابان- كفری، پێشمەرگەیا هەولێر- سیروانی نوو.
فدراسیۆنا فوتبۆلا كوردستانێ ڕاگەهاند هەكە تیما یانەیا دهۆك سەركەفتن ل سەر یانەیا زانكۆیا جیهان ئینا دێ بەرانبەر یانەیا هندرین یاریێ كەت د قۆناغا هەشتێ دا كو دێ پشككێشان بۆ دەستنیشانكرنا یاریێ هێتە كرن، لێ هەكە زانكۆیا جیهان ب سەركەفت دێ یارییا قۆناغا هەشتێ بەرانبەر هندرین ل یاریگەها زانكۆیا جیهانی هێتە كرن.
