د كۆپا كەنداڤی دا ئەلهۆیێن چیا چاڤ ل دەستكەفتەكێ نوویە
قەیس وەیس:
دهێتە پێشبینیكرن هەر پشتی فتارێ ئێكسەر جەماوەر و حەز ژێكەرێن یانەیا دهۆك ئەڤرۆ ل یاریگەها سەرەكی یا یانەیێ بەرهەڤبن ژبۆ پشتەڤانی و بلندكرنا مۆرالا یاریزانێن تیما خوە بكەن ئەوا بڕیارە ئەڤرۆ ل دەمژمێر نەهی شەڤ تیما وان یا فوتبۆلێ یارییا خوە یا دویێ و چارەنڤیس بەرانبەر مێڤانا خوە یانەیا ئیتفاق یا سعۆدیێ ژ چارچووڤەیێ قۆناغا پێش دووماهییا كۆپا كەنداڤی و دەربازبوون بۆ یارییا دووماهیێ بكەت.
ئەلهۆیێن چیا نیڤا پلێتێ مسۆگەر كرییە
ل چارشەمبییا بۆری تیما فوتبۆلا یانەیا دهۆكێ پێنگاڤا ئێكێ بەر ب یارییا دووماهیێ ب سەرفەرازی هاڤێژت بوو و نیڤا پلێتێ مسۆگەر كرییە، پشتی شیایی ب ئەنجامێ گۆلەكێ سەركەفتنێ ل سەر خودانێن ئەردی یانەیا ئیتفاق یا سعۆدیێ بینت، گۆلا دهۆكێ ژلایێ پیشەكارێ وێ یێ بەرازیلی مارلۆن دو سانتۆس د خولەكا 43ێ دا تۆماركربوو، یارییا ئەڤ شەڤە چارەنڤیسە، وەكهەڤی یا سەركەفتنا دهۆكێ ئێكسەر دەربازبوونە، لێ ژبلی ڤێ ئەنجامی دەربازبوون دێ ژ دەستدەت، كارگێرییا یانەیێ و كادرێ راهێنانێ گەشبینە ب ئەنجامەكێ باش دڤێ یاریێ دا كو دهێتە هژمارتن یا دیرۆكی بۆ ئەلهۆیێن چیا و دەلیڤەیەكا زێرین بەردەستە ژبۆ دەستڤە ئینانا پلێتا دەربازبوونێ.
جاسم محەمەد حاجی سەركەفتن و پلێتا دەربازبوونێ ب دوور نابینت
د داخویانیەكا رۆژنامەڤانی دا جاسم محەمەد حاجی ڕێڤەبەرێ تیما یانەیا دهۆك گۆت: ب شێوەكێ گشتی هەموو یاریزان بۆ ڤێ یاریێ د بەرهەڤن و سۆپاس بۆ خودێ چ كێماسی و هنگاڤتن نینن و مۆرالا وان یا بلندە و د گەشبینن بۆ دەستڤە ئینانا ئەنجامێ سەركەفتنێ، لێ ژبیر نەكەین كو یانەیا ئیتفاق یا ب هێزە و خودان یاریزانێن ل سەر ئاستێ جیهانێ نە، لەوما ژی ئەم ل سەر وێ هزرێ نەبیت كو د یارییا بۆریدا ئەم سەركەفتین و خلاس نە خێر هێشتا ئەڤ یارییە مایە، هیڤییا من ئەوە پشتەڤانێن مە ژی ل رۆژا چارشەمبی ب جۆش و خرۆش ل یاریگەهێ بەرهەڤبن و پشتەڤانییەكا بەردەوام بكەن، پێنەڤێت هەر یارییەكێ كاودانێن خوە هەنە و تیمامە گەلەك یا باشە ب پێكهاتیێ خوە یێ سەرەكی و یەدەك ب هیڤییا خودێ ئەم د جەماوەرێ خوە كەیفخوەش بكەین و ئاهنگا ب گێڕین.
شرۆڤەكارەكێ وەرزشی بۆچوونا خوە هەبوو
وەحید رەشید شرۆڤەكارێ وەرزشی ل پارێزگەها دهۆكێ گۆت: جارێ حازربوونا جەماوەرێ دناڤ یاریگەهێ دا گەلەك یا گرنگە بۆ پشتەڤانییا تیما خوە و پاراستنا ئاست و ئەنجامێن یارییا بۆری ئەوا شیاین ب سەرفەرازی سەركەفتنێ بینن ژ وەلاتێ سعۆدیێ ڤەگەریت، لەوما ژی بەرهەڤبوونا پشتەڤانان و دڤێت گڤاشتنێ ل سەر تیما خوە ژی نەكەن بەلكو پشتەڤانیەكا بەردەوام و سەردەمانە بكەن تا دووماهییا یاریێ و ئەنجام هەر چەوابیت دڤێت دەستخوەشییا یاریزانان و كادرێ راهێنانێ و كارگێریێ بكەن و شیان هەتا ڤێرێ ژی بهێن، وەكو یاریی یا بزەحمەت و هێشتا ب دووماهی نە هاتییە، تیما ئتیفاق یا بهێزە و ئەوان ژی هێشتا وان ئۆمێد مایە سەرباری خوسارەتییا وان ب گۆلەكێ، یا گرنگ ئەوە سەرەدەرەییەكا باش ژلایێ راهێنەری هەبیت تایبەت دانانا پلانێ و باش هێز و كێماسییا تیما بەرانبەر بزانیت و مفایی ژێ وەربكریت و راهێنەر گڤاشتنێ ل سەر یاریزانی نەكەت بلا د ئارام بن دناڤ یاریگەهێ دا، یا باش ئەوە یاریزانێن دهۆكێ نەهێلن د نیڤا ئێكێ دا گۆل ل سەر بهێتە تۆماركرن بۆ نیڤا دویێ دێ پلانێن باشتر هەبن دگەل پشتەڤانییا جەماوەری، دڤێت پشت گەرمیێ ل سەر سەركەفتنا یارییا بۆری نە كەن بەلكو بزاڤ بۆ تۆماركرنا زێدەتر گۆلان هەبیت، دا زێدەتر دەربازبوونا تیما دهۆكێ مسۆگەر بیت، هیڤییا مە ئەوە دڤێ یاریێ دا ئەلهۆیێن چیا سەركەفتنا خوە دوبارە بكەن و دەربازبن.
پشتەڤانەكێ یانەیا دهۆك: ب هیڤینە شەڤا دەستكەڤتەكێ مەزن بیت
ژلایێ خوەڤە باوەر حەمید ئێك ژ پشتەڤانێن یانەیا دهۆكێ گۆت: ئەڤە حەفتییەك ئەم چاڤەڕێ ڤێ یاریێ نە، پشتی د یارییا ئێكێ دا ئەم ب سەركەڤتین ئەڤرۆ ب شەڤ دێ ل یاریگەها خوە پشتەڤانیێ كەین و هەتا فیركا دادڤانی دێ پشتەڤانبن و چاڤەڕێ كەرنەڤالێ سەركەفتنێ نە، تیما مە ژ چ تیمێن دی كێمتر نینە و ئەم ژ هەژی نە ب چینە یارییا دووماهیێ، هیڤییا من ئەوە هەموو یاریزان د رۆژا خوە دابن و بەر ب یارییا دووماهیێ بچین.
ئەلهۆیێن دهۆكییان د بەرهەڤن بۆ نێچیرا خوە
ل دووڤ داخویانییا ڕاهێنەرێ تیما یانەیا دهۆك مەسعۆد میرالی هەموو یاریزان د بەرهەڤن و دێ پشت گەرمیێ ب كۆمەكا یاریزانێن خوە كەت تایبەت ئەوێن د یاریێن بۆری دا ئاستەكێ مەزن نیشان دایی و دبیت هەمان پلانا یارییا بۆری بەرانبەر ئتیفاق بكەت، زێدەتر دێ هزر د ڤان یاریزانان دا هێتە كرن پێكهاتینە ژ، گۆلپارێز، محەمەد سەلاح ئەوێ د چار یاریێن بۆری دا باشترین ئاست نیشان دایی و ئەسیست هەبووینە، هەروەسان بەرەڤانێن خوە بەیار ئەبۆبەكر، لۆكاس مۆسێس، سیابەند عەگید و محەمەد سەعید كو بووینە دیوارێ ب هێز یێن تیمێ، هەر دیسان هێلا ناڤین ب سەركێشییا ئەندازیارێ دناڤ یاریگەهێ دا هارون ئەحمەد، زانا عەلی، ئاكۆ، یانیك زاكێری و رۆبێن ئەكۆا، پێنەڤێت هێلا هێرشبرنێ ژی هێزا كۆژەكە بۆ تیما بەرانبەر كو پێكهاتینە ژ پیتەر گۆرگیس و كەریم دەرویش كو دبیتە هێزەكا كۆم و خودان شیان دناڤا یاریگەهێ دا.
چەوا هەردو تیم دەربازبوونە ڤێ قۆناغێ
تیما فوتبۆلا یانەیا دهۆك وەكو نوونەرا ئێكانە یا ئیراقێ و كوردستانێ دەربازبوو ڤێ قۆناغێ پشتی د كۆما ئێكێ دا ل رێزا دویێ هاتی ب كۆمكرنا نەهـ خالان ژ دو سەركەفتن، سێ وەكهەڤی و خوسارەتیەكێ، یانەیا ئیتفاق وەكو خودانا رێزا ئێكێ یا كۆما دویێ دەربازبوو ڤێ قۆناغێ ب كۆمكرنا 13 خالان ژ چار سەركەفتن، وەكهەڤییەك و خوسارەتیەكێ، بڕیارە یارییا دویێ یا ڤێ قۆناغێ یانەیا دهۆك ل 12ێ ڤێ مەهێ یاریگەها خوە یانەیا ئیتفاق مێڤانبكەت و پلێتا دەربازبوونێ بۆ یارییا دووماهیێ ئێكلابیت، یارییا دووماهیێ دێ ب شێوەیێ هاتنوچوون بیت، یا ئێكێ دێ ل هەشتێ نیسانا بهێت بیت و یارییا دویێ دێ ل 15ێ هەمان مەهـ هێتە كرن.
خەلاتێن بوها گران بۆ یانەیان هاتینە دان
بۆ زانین خودانا ناسناڤێ قارەمانییا كۆپا كەنداڤی دێ سێ ملیۆن دۆلاران وەرگریت وەكو خەلاتكرن، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ قارەمانیێ دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
ژلایەكێ دووڤە بۆ هەر یانەكا پشكدار سێ هزار دۆلار بۆ دهێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان دهەر یارییەكا د كۆمێ دا هاتییە كرن و هەر یانەیەكا سەركەفتنێ بینت سیهـ هزار دۆلار وەردگریت.
