د مال دا مایك ژ كاغەزێ چێدكرن و پرسیار ژ خێزانا خۆ دكرن
سندس سالح سلێڤانەیی:
مەدیاكار (نیرۆژ سدقی یوسف) كو خەلكا ناحیا شێلادزێ یە، لێ ئەڤە چەند سالن ل دهۆكێ دژیت، د دیدارەكێ دا بۆ رۆژنامەیا ئەڤرۆ گۆت: دژیەكێ بچووك دا من حەزژ كارێ پێشكێشكاریێ دكر، لەورا دمال دا من بۆ خۆ مایك ژ كاغەزێ چێدكرن و پرسیار ژ خێزانا خۆ دكرن، لەورا پشتی دەلیڤە هاتی من ژ بەرنامەیێ زارۆكان ل وار تیڤی دەستپێكر و نوكە پەیامنێرا وی كەنالی مە.
هەروەسا گۆت: ئەز شانازیێ ب هەموو كارێن خۆ دبەم و گرنگترین روودان من ڤەگۆهاستی داخوازیێن هندەك كەسێن بێ دەنگ بوون كو ئەو نە دشیان بگەهینن، هەلبەت هەر كارەكی ل دەستپێكێ هندەك ئاستەنگ هەبوون، لێ ژبەركو مالا من دهاریكاربوون ئەو ئاستەنگ نەمان و هەتا نوكە یا بەردەوامم، هەروەسا ئەز بەردەوام دبێژم كچ ب خۆ دشێت باوەریێ بۆ خۆ، هەروەسا مالا خۆ و جڤاكی چێكەت كو ئەو ژی دشێت وەكو زەلامی گەلەك كاران بكەت و یا سەركەفتی بیت و ب راستی ژی من باوەرنەدكر رۆژەك دێ هێت ئەز دێ بمە پەیامنێر، ژبەركو من پێشكێشكاری پێ باشتر بوو، لێ دەمێ ئەز هاتیم من دیت جیهانەكا دی یە .
