د ماوێ 10 سالان دا گەنجەكێ دهۆكێ پێنچ هزار گەنج فێری سەرتراشینێ كرینە
، هەرهین محەمەد:
خودانێ سەرتراشخانە و سەنتەرێ هشیار دیاركر، ئەڤە بۆ دەمێ دەهـ سالایە ئەو خولێن سەرتراشینێ بۆ گەنجان ڤەدكەت و نێزیكی پێنچ هزار گەنج ل خولێن وی بووینە سەرتراش و گازندا وی یا سەرەكی ژی ئەو بوو، حوكمەت پشتەڤانیێ ل گەنجان ناكەت و یا پێدڤی بوو ئەو كارێ نوكە ئەو دكەت حوكمەتێ كربا و ب تنێ حوكمەتێ باج ل سەر وی گرانكریە و ئەڤ چەندە بوویە بەربەستەك د كارێ وی دا .
هشیار هەجەر زاهر، خودانێ سەرتراشخانە و سەنتەرێ هشیار بۆ رۆژناما ئەڤرۆ گۆت: ل سالا 1999 پشكداری خولەكا سەرتراشیێ بوویمە و ل سالا 2007 بوویمە سەرتراش ل گەل كەسەكی و من كاركر و ل سالا 2004 سەنتەرێ پێشمەرگە داخاز ژ من كر بۆ وان خولێن سەرتراشیێ پێشكێشكەم، چونكو من ئەو هزرە هەبوو ل دەستپێكا من ئەز پشكداری خولێ بووم و من دزانی ماموستا چاوا پێشكێشدكەت و هێدی هێدی من دوكانا سەرتراشیێ ڤەكرو پاشان من سەنتەر ژی من ڤەكر.
زێدەتر گۆت: هەتا نوكە یێ بەردەوامم و نێزیكی پێنچ هزار گەنج ل خولێن من فێربووینە و نێزیكی سێ هزاران ژی بووینە سەتراش و دوكان بۆ خوە ڤەكرینە و ژیێ ژ پازدە سالیێ هەتا پێنچ سالیێ وەردگرم و گەلەك ژ وان ژی ژ دەرڤەی وەلاتی دهێن دا كو خوە فێری سەرتراشینێ بكەن و ئەو ژی ب رێیا هندەك قوتابیێن من یێن دەرچووی هاتینە، ژبەركو وان مفا ژ خولێن من دیتینە و گەلەك جاران ئەوان كەل و پەل و مەكینە ژ دەرڤە بۆ من هنارتینە و وەكو دیاری ل وێرێ بووینە سەرتراشێن باش و خول ژی بۆ زارۆكێن شەهیدان ل دەڤ من بێ بەرامبەرا و دیسان هەر كەسەكێ بارێ وی یێ دارایی یێ باش نەبیت یێ هاریكارم ل گەل وان ژی و هەر كەسەكێ بهێت خوە فێربكەت ل دەستپێكێ ناسناما ئەوی یا تایبەت كوپی ژێ دهێتە وەرگرتن ژبەركو ل دووماهییا خولێ باوەرنامە پێ دهێنەدان .
خودانێ سەنتەرێ هشیار گۆت ژی: دەمێ خۆلا ڤەدكەم د چل و پێنچ رۆژان دا گەنج فێری هەموو ئەتەكێكێن سەرتراشیێ و خولێن ئەز ڤە دكەم سەد ژ سەدێ پراكتیكی نە و دبیت ژبەر كو رۆژێ دو دەمژمێران نیشا وان دەم رۆژانە ژی قوناغەكا سەرتراشیێ نیشا وان ددەم، قوتابیێ دهێت خوە فێركەت ژی دڤێت حەزا سەرتراشیێ هەبیت و خوە ب وەستینیت و ل سەر خوە كاربكەت و دەمێ پشكداری خولێ دبیت و چەند تێست پێ دهێنەكرن ل وی دەمی دێ وێرەكی بۆ چێبیت و دێ شێت بێ منەت كارێ سەر تراشیێ كەت، بەلێ نەشێت د ئێك دەم دا هەموو مودێلا بزانیت، چونكو هێشتا یێ ل دەستپێكا كارێ خوە و دبیت دەستێ وی یێ گران بیت، بەلێ ب بوورینا دەمی دێ دەستێ ئەوی ل سەر مەكینێ و تراشینێ سڤك بیت و دێ گەلەك مودێلان ژی زانیت و ئەو كارە دێ بیتە دەرگەهەك مالا خوە پێ خودان بكەت، ژ بەر كو كارێ سەتراشیێ وەكو كارێ درواركەرانە و هەموو وەرزان یێ هەی و نوكە بووییە ئێك پێدڤێن سەرەكی و ئانكو ل هەردەمەكی بیت كاریێ هەی.
ئەو چەندە ژی گۆت ل گەل پشكداربووێن خولێ مە چو ئاریشە نینن، بەلێ ئاریشا مە یا سەرەكی ئەوە گەلەك باجێ ل سەر مە زێدە دكەن و خوزی حوكمەتێ پتر گرنگی ب گەنجان دابا و ئەو كارێ نوكە ئەز دكەم پێدڤی بوو حوكمەتێ بۆ گەنجان كربا و دەمێ كارەكی دكەم پێدڤی دەستخوەشییانم و ب تنێ بۆ خودێ دكەم.
