د ماوەیێ دو سالان دا ٦٤ كارگەهـ ل زاخۆ هاتینە ڤەكرن
زاخۆ، دلۆڤان هالۆ:
ڕێڤەبەرێ گەشەپێدانا پیشەسازی ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، د ماوێ هەر دوو سالێن دەربازبوویی دا ٦٤ كارگەهێن پیشەسازی ل ئیدارەیا سەربخوە یا زاخۆ هاتینە ڤەكرن و كەفتینە د خزمەتا خەلكێ دەڤەرێ دا.
عەبدولڕەحمان ئەدیب، ڕێڤەبەرێ گەشەپێدانا پیشەسازی ل ئیدارەیا سەربخوە یا زاخۆ، ئاماژە ب وێ چەندێ ژی كر كو د نوكە دا سەرجەمێ گشتی یێ كارگەهان ل سنۆرێ ئیدارەیا سەربخوە یا زاخۆ 158 كارگەهێن پیشەسازی نە دبوارێن جۆراو جۆر دا.
گۆت ژی:»ڤەكرنا ڤان كارگەهان ب پشتەڤانی و هاریكاریا گوهدار شێخۆ سەرپەرشتێ ئیدارەیا سەربخوە یا زاخۆ بوویە، كو هەر دەمێ مە داخوازا ڤەكرنا كارگەهەكێ ژێ كربا، ب سۆپاسی ڤە ڕازیبوونا خوە دیار دكر ب مەرجەكێ كو ڕێژەكا زۆر یا گەنجان د وێ كارگەهێ دا كاربكەن و خەلك ژێ مفادار بن».
زێدەتر ژی گۆت:»ژبەر ئاسانكاری و پشتەڤانیا بەردەوام یا سەرپەرشتێ ئیدارەیا سەربخوە یا زاخۆ مە شیا د ماوەیەكێ كورت دا ئانكو د ماوێ دوو سالان دا ڕێژەكا زۆر یا كارگەهان ل زاخۆ زێدە بكەین و ژ 9٤ كارگەهێن پیشەسازی بگەهینینە 158 كارگەهان».
