د ناڤبهرا خهبهرێن دوهى و ماچێن ئهڤرۆدا!
ههلبهت پشتى ههلبژارتنێن بۆرى ل كوردستانێ ئهڤ جاره ئۆپۆزسیۆنێ گوتارا خوه یا سیاسى گهۆری كو د پرۆپاكندێن خوه دا پهیڤا بهرهف دهستههلاتێ بكار دئینا و ئهڤێ ب خوه ژى دو رامان ههبوون، یئان هزرا وان ئهو بوویه ببنه سهركهفتیێن ئێكێ ل كوردستانێ و بشێن ب تنێ حكوومهتێ پێك بینن، یان ژى ب ههر رهنگهكى بیت دگهل پارتا سهركهفتى رێك بكهڤن داكو پشكداریێ د كابینا ههشتێ دا بكهن. بێگومان ل ڤێرێ پرسیار ئهوه، ئهرێ چێ دبیت گوتار و هزرا سیاسى یا لایهنهكى د ماوهیهكێ زۆر كێم دا ب ئێكجارى بهێته گهۆرین؟، چونكی ههتا دوهى رهش بوو و ئهڤرۆكه سپى ببیت؟ ئهڤه ژلایهكى ڤه و ژلایهكێ دی ڤه ئهگهر ب هوورى بهرێ خوه بدهینه ئهوا د ناڤبهرا ئێكهتیا نشتیمانیا كوردستانێ و بزاڤا گۆڕان دا هاتینه روودان كو ئهڤه ژى دزڤریت بۆ پشتى جودابوونا نهشێروان مستهفا ژ ڤێ پارتێ دێ بینین كو ئالۆزیهكا ههره زۆر كهفته د ناڤبهرا وان دو لایهنان دا و كارتێكرنهكا نێگهتیڤ ل سهر ههرێما كوردستانێ دروست كریه، ب تایبهتى پارێزگهها سلێمانیێ و ههتا گههشتیه وێ رادێ كو گهفێن ههره مهزن ل ئێكودو كرن و دیسان د میدیایێن خوه دا مهزنترین گهندهلى و كریارێن درندانه و نهشرینێن ئێكودو بهلاڤ كرن و د ناڤ خهلكێ كوردستانێ دا سهرسورمانیهك دروست بوو و ههر دهم ل هیڤیا بهلاڤبوونا دهنگ و باسهكێ نووتر بوون ژ وان ههردو لایهنان و بێگومان ئهڤ چهنده ببوو جهێ حێبهتیا هند وهلاتێن جیهانێ ژى.
دیسان ژبیر ناهێته كرن كو جهنابێ سهرۆك بارزانى زۆر بزاڤ كرن كو ڤێ ئالۆزیا د ناڤبهرا ههردو لایهنان دا چاره بكهت و بشێن ب گفتوگویێ و دیالۆگێ كێشێن خوه چارهسهر بكهن، لێ وهكو دیار پشتى بۆرینا ماوهیهكێ كێم ب ئێكجارى وهرهقه هاتنه قولپاندن و تۆمهت و خهبرگۆتنێن بهرێ بوونه ماچ و مێهڤاندارى و باوهشكرنا ئێكودو، راسته د كهڤن دا دبێژێن سیاسهت دهیك و بابا نانیاسیت، لێ ئهڤ نیاسینا ژ نیشكهكێ ڤه پرسیارێ بۆ زۆربهیا خهلكێ كوردستانێ ب تایبهتى جهماوهرێ ههردولا دروست دكهت، ئهرێ ئهوا هاتیه كرن ب تنێ لێك نهتێگههشتنهك بوو د ناڤبهرا وان دا یان ژى ئهڤه سیناریویهك بوو ژبۆ خاپاندنا هندهك لایهنان ب تایبهتى پارتى دیموكراتى كوردستان كو ژلایێ سیاسى و جهماوهرى ڤه هێزا ههرهمهزنه ل كوردستانێ؟.
ب دیتنا من ئهوا نوكه د ناڤبهرا بزاڤا گۆڕان و ئێكهتیا نشتیمانى دهێته كرن ژ دهرئهنجامێ وێ سیناریویێ یه ئهوا ل سالا 2009 هاتیه كرن و ههر د وى دهمى دا زۆربهیا خهلكێ كوردستانێ هزر ل ڤێ چهندێ دكر كو ئهڤه درهوهكا سیاسى یه و ههر ل دهستپێكێ ئێكن و ب تنێ بۆ خاپاندنا جهماوهرێ خوه ڤى كارى دكهن و بزاڤ دكر ب ڤى شیوهى دهنگدهرێن خوه زێده بكهن. ههلبهت هندهك پرسیار دهێنه د رۆژهڤێ دا، ئهرێ جهماوهرێ ههردو لایهنا پشتى ئاشكرابوونا ڤێ سیناریویێ دێ چهوا شێن بهرهڤانیێ ژ وان كهن و دێ چهوا بیرو باوهرى ب وان ههبیت؟ ئهرێ ئێكهتى و گۆڕان چهوا شیاینه ژبۆ زێدهكرنا چهند كورسیكا و چهند دهنگدهران یاریێ ب ههست و سوزێن دهنگدهرێن خوه بكهن؟ دیسان پشتى دووماهیك هاتنا ڤێ سیناریویێ د چ ئایدۆلۆژى ئانكو بهرنامه ههبیت بۆ برێڤهبرنا كاروبارێن خوه یێن سیاسى؟.
