د ناڤبەرا سێ رۆژان دا دهۆك دێ دو دێربییێن كوردستانی كەت
قەیس وەیس:
چاڤەڕێ ئەڤرۆ دەست ب هەڤڕكیێن گەرا 37ێ و بەری ب دووماهی هاتنا وەرزێ ئەڤ سالە یێ خولا ستێرێن ئیراقێ یا فوتبۆلێ ب ئەنجامدانا دو یارییان بهێنە كرن، ئەوا یانەیا شورتە ل حەفتییا بۆری ناسناڤ مسۆگەر كری، هەرسێ یانەیێن دهۆك، زاخۆ و هەولێر دێ دناڤ ئەرد و جەماوەرێ خوە دا یاریێ كەن.
ئەڤرۆ و ئێكشەمبییا بهێت دهۆک دێ یاریێ كەت
بڕیارە د ماوەیێ پێنج رۆژان دا تیما یانەیا دهۆك دو یارییان ژ خولا ستێرێن ئیراقێ ئەنجامبدەت كو هەردو یاری ژی دێربیێن كوردستانی نە د خولێ دا، یارییا ئێكێ دێ ئەڤرۆ ل دەمژمێر حەفتێ مەغرەبییا درەنگ بەرانبەر یانەیا هەولێرێ ل یاریگەها شەهید فرانسۆ حەریری ل هەولێرا پایتەخت هێتە كرن، ئەڤ یارییە ژ چارچووڤەیێ ئەوا یاریێن پاشئێخستی بوون ژ زنجرەیا حەفت یارییان ئەوێن ژ بەر پشكدارییا تیما دهۆكێ د كۆپا كەنداڤی دا هاتبوونە پاشئێخستن و دبیتە یارییا گەڕا 22ێ ژ خولێ.
یارییا دویێ یا تیما دهۆكێ دێ ل ئێكشەمبییا بهێت دەمژمێر 9:30 شەڤ مێڤاندارییا یانەیا نەورۆز كەت ژ چارچووڤەیێ هەڤڕكیێن گەڕا 37ێ و بەری دووماهییا خولێ كو دبیتە دوەم یاری یا دێربیێ كوردستانێ و ئێكەم جارە د دیرۆكا یانەیێن كوردستانی دا دناڤبەرا سێ رۆژاندا دو یاریێن دێربی بكەت.
ئەلهۆیێن چیا د كاودانەكێ خراب دا دەرباز دكەن
تیما دهۆكێ ئەوا د نەخۆشترین كاودان دا دەرباز دكەت د ماوەیێ حەفت یاریێن بۆری دا هیچ سەركەڤتنەك نە ئینایە، دووماهی یارییا خوە بەرانبەر ئەلگەرمە ب گۆلەكێ تووشی خوسارەتیێ بوو كو دبیتە خوسارەتییا 11 د خولێ دا بەرانبەر 15 سەركەڤتن و نەهـ وەكهەڤییان ل ڕێزا حەفتێ ب كۆمكرنا 54 خالان دهێت، دڤان هەردو یارییان دا دهۆك پێدڤی ب سەركەڤتنێ یە ژبۆ ڤەگەڕاندنا باوەرییا جەماوەرێ خوە.
زاخۆ دێ جەوییە مێڤان كەت
بڕیارە ل شەمبییا بهێت تیما یانەیا زاخۆ دناڤ ئەرد و جەماوەرێ خوە دا ل دەمژمێر 9:30 شەڤ یانەیا جەوییە یا بەغدایی مێڤان بكەت، هەرچەندە ئەنجامێ ڤێ یاریێ چو كارتیكرنێ ل سەر ڕێزبەندییا كوڕێن خابووری د خولێ دا نەكەت ئەوا گەهشتنە مرادا خوە و ڕێزا سێیێ پاراستییە دیسان پشكدارییەكا دەرڤە مسۆگەركرییە، زاخۆییان خالێن خوە گەهاندینە 67 خالان ژ 19 سەركەڤتن، 10 وەكهەڤی و حەفت خوسارەتییان، دبەرانبەر دا یانەیا جەوییە 57 خال كۆمكرینە ل رێزا پێنجێ دهێت.
پیتەر و گۆستاڤۆ سەركێشێن گۆلكەرێن دهۆك و زاخۆ نە
یاریزانێن یانەیا زاخۆ 55 گۆلان د خولێ دا ئیناینە و بەلاڤبووینە ل سەر یاریزانان و بڤی شێوەیی، پیشەكارێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن تیما خوە دهێت ب تۆماركرنا 17 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 13 گۆلان رێزا دویێ دهێت، ناسر ئەحمەد محەمەدو نەهـ گۆل، دیبیۆتی ئۆگۆنا چار گۆل، مەحمود فائیز ئەلئەسوەد سێ گۆل، ئەحمەد یاسین و پاتریك مارسێلۆ هەر ئێك دو گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك و یوسغ رائید ئەلئالۆسی گۆلەك تۆماركریە.
تیما دهۆكێ خوانا دەهـ یاریزانێن پشكداری د تۆمار كرنا 37 گۆلان دا هەیە سەرجەمێ 38 گۆلان و بڤی ڕەنگی، پیتەر گۆرگیس هەشت گۆل، پاشەنگ عەبدوللا حەفت گۆل، كەریم دەرویش پێنچ گۆل، ئیبراهیم غازی سێ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و لۆكاس هێنریك و سیابەند عەگید، هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، موسیس، زانا عەلی گۆلەك تۆماركرینە، ژلایەكێ دووڤە گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر..
هەولێر دێ مێڤاندارییا كەرخێ كەت
پشتی ئەنجامدانا یارییا خوە یا پاشئێخستی بەرانبەر یانەیا دهۆكێ بڕیارە ل ئێك شەمبییا بهێت هەر دناڤ ئەرد و جەماوەرێ خوە دا یانەیا هەولێر مێڤاندارییا یانەیا كەرخ یا بەغدایی بكەت، تیما كەلهە و منارە ل ڕێزا 12ێ ب 47 خالان دهێت، ژلایێ خوەڤە یانەیا كەرخ رێزا 14ێ دهێت ب كۆمكرنا 43 خالان، سەركەڤتنا هەولێرییان دبیت بۆ دو ڕێزان پێشە ببەت.
شورتە و زەورا یاریێن ب سانەهی هەنە
هەر ژ چارچووڤەیێ هەڤڕكیێن گەڕا 37ێ و بەری دووماهیێ یاریێن مایی دێ بڤی شێوەیی بن.
ئەڤرۆ چارشەمبی، زەورا – مینا، دەمژمێر 6:30 مەغرەب، شورتە- حدود، دەمژمێر نەهی شەڤ.
ئەینییا بهێت، دیالا- نەفت بەسرا، كەربەلا- نەفت، هەردو یاری ل دەمژمێر حەفتی مەغرەب هێنە كرن.
شەمبییا بهێت، نەفت میسان- نەجەف، دەمژمێر حەفتی مەغرەب، هەروەسان كارەبا و ئەلگەرمە ل دەمژمێر 9:30 شەڤ هێنە كرن.
ل ئێكشەمبییا بهێت یانەیا تەلەبە دێ مێڤاندارییا یانەیا ئەلقاسم دەمژمێر حەفتی مەغرەب كەت.
حدود و كەربەلا داكەڤتینە پلا نایاب
ب فەرمی هەردو یانەیێن حدود خودانا رێزا 19ێ ب 23 خالان و كەربەلا خودانا رێزا 20ێ و دووماهیێ ب 22 خالان داكەڤتنە پلا نایاب، یانەیا نەفت ئەلبەسرا خودانا 29 خالان رێزا 18ێ دێ دو یاریێن پاشكۆ دگەل یانەیا خودا ڕێزا سێیێ یا خولا نایابا ئیراقێ كەت ژبۆ مانا خوە د خولێ دا.
هەلوەستێ گشتی یێ ڕێزبەندیێ بەری دەستپێكرنا یاریێن گەڕا 37ێ بڤی شێوەیە.
1- شورتە 83 خال.
2- زەورا 74 خال.
3- زاخۆ 67 خال.
4- تەلەبە 60 خال.
5- جەوییە 57 خال.
6- ئەلگەرمە 55 خال.
7- دهۆك 54 خال، یارییەك پاشئێخستی مایە.
8- نەفت 53 خال.
9- ئەلقاسم 51 خال.
10- نەورۆز 49 خال.
11- نەفت میسان 48 خال.
12- هەولێر 47 خال، یارییەكا پاشئێختی مایە.
13- كارەبا 45 خال.
14- كەرخ 43 خال.
15- نەجەف 43 خال.
16- مینا 40 خال.
17- دیالا 40 خال.
18- نەفت بەسرا 29 خال.
19- حدود 23 خال.
20- كەربەلا 22 خال.
