د.نه‌شوان محه‌مه‌د ره‌شید: دروسته نه‌خۆشێ ب گولچیسكه‌كێ ڤاكسینێ وه‌ربگریت
نۆشداره‌كێ تایبه‌تمه‌ندێ نه‌خۆشیێن گولچیسكان دیاردكه‌ت كو ل ڤێ دووماهیێ پرسیارا گه‌له‌ك ژ مه دهێته‌كرن ئه‌وه ئه‌رێ كارتێكرنا ڤاكسینێ ل سه‌ر كه‌سێن ئاریشێن گولچیسكان هه‌ی چیه و ئه‌رێ ڤاكسینێ بدانن یان نه و چه‌ند رونكرنان ل دۆر نه‌خۆشێن گوه‌لچیسكان دده‌ت.
د.نه‌شوان محه‌مه‌د ره‌شید، تایبه‌تمه‌ندێ نه‌خۆشیێن گولچیسكان و میزه‌رۆیێ دیاركر نه‌خۆشیا كۆرۆنایێ نه‌خۆشیه‌كا دژوار و ترسناكه و رێكا هه‌ره‌سه‌ره‌كی بو خوه ژێ پاراستنێ ڤاكسیندانه، و پێگیری ب رێنمایێن ساخله‌میێ وه‌كو ل به‌ر خوه‌كرنا ماسكا و خوه ژێك دوور كرن.
ده‌رباره‌ی نه‌خۆشێن ئاریشه‌یێن گولچیسكان هه‌ین، د.نه‌شوان دیاركر، هه‌كه نه‌خۆشی هه‌ودانه‌ك یان به‌رك هه‌بیت یان یێ ب گولچیسكه‌كێ بیت، هه‌كه هات و تووشی كۆرۆنایێ بوون ره‌نگه پتر كارتێكرن لێ ببیت و گۆت: له‌ورا باشتره ئه‌ڤه خوه ب پارێزن ب دانانا ڤاكسینێ و ڤاكسین چ كارتێكرنێ ل ساخله‌میا وان ناكه‌ت، و هه‌ر چ جورێ ڤاكسینێ بیت چو\ ئاریشه تێدا نینن یا گرنگ ئه‌وه ڤاكسینێ وه‌ربگریت و هه‌تا هه‌كه گولچیسكه‌ك ژی هه‌بیت چ جوداهیا وی دگه‌ل كه‌سه‌كی نینه كو دو گولچیسك هه‌بن و پێدڤیه ڤاكسینی وه‌ربگریت.
د.نه‌شوان ئه‌وژی دیاركر كو ئه‌و نه‌خۆشێن ژ ئه‌گه‌رێ لاوازیا گولچیسكان كو گولچیسك بو هاتیه چاندن، ره‌نگه ئه‌و هنده‌ك ده‌رمانان وه‌ربگریت كو كارتێكرنێ ل به‌رگریا له‌شێ وی بكه‌ن، ئه‌و دیسا پێدڤی یه ڤاكسینێ وه‌ربگریت، به‌لێ به‌ری وه‌رگرتنێ شیره‌تان ژ نۆشدارێ خوه وه‌ربگریت.
دیسا ئه‌و نه‌خۆشێن جوره‌كێ په‌نجه‌شێرێ یان گرێیا د گولچیسكان دا هه‌ین، و ده‌رمانێن كیمیاوی ویربگرن، ئه‌وژی پێدڤیه شیره‌تان ژ نۆشدارێ خوه وه‌ربگرن ل دۆر چاوانیا وه‌رگرتنا ڤاكسینێ و چ جوره ڤاكسینێ وه‌ربگریت.
