د نوكە دا گەفێن پیسیبوونا ژینگەهێ گەلەك ژ تیرۆرێ مەزنترن
زنار تۆڤی:
مامۆستایێ زانستێن سیاسی ل هەولێرێ بۆ رۆژناما ئەڤرۆ گۆت: پشتی شەرێ داعشێ، ڤالاهیەك د پەیوەندیێن هەرێما كوردستانێ ل گەل هەڤپەیمانیا نێڤدەولەتی دا دروست بوو، هەروەسا نوكە گەفێن پیسیبوونا ژینگەهێ گەلەك ژ تیرۆرێ مەزنترن.
د. بارزان جەوهەر، مامۆستایێ زانستێن سیاسی ئاشكرا كر، جڤاكێ نێڤدەولەتی د رێككەفتنا پاریس و د وێ گۆپیتكا ل وەلاتێ دوبەی دا هاتیە كرن، دڤێت هەماهەنگیەك دناڤبەرا رۆژهەلات و رۆژئاڤا دا هەبیت، داكو بەرهنگاری گەف و پیسبوونا ژینگەهێ ببیت، دیسا گەفێن ئاسایشا ژینگەهێ و ئاسایشا تیرۆرێ ب تنێ ب وەلاتەكی ناهێتە كرن، لەوما دڤێت وەلاتێن جیهانی هەموو پشكداریێ تێدا بكەن، ب تایبەتی ئەكتەرێن نەسەرەكی ژی یێن وەكو هەرێما كوردستانێ ژی پشكداری د وێ گۆپیتكێ دا كریە، ئەڤ چەندە وێ دگەهینیت، كو هەرێما كوردستانێ ژی گرنگیا خوە هەیە، ب تایبەتی ژی ل گەل هەڤپەیمانیا نێڤدەولەتی.
د. بارزان گۆت: «ژ روویێ ژینگەهێ ڤە هەرێما كوردستانێ گەلەك ئاریشە هەنە و كۆمەكا رێنمایان هەنە هەرێما كوردستانێ دشێت مفای ژێ ببینیت، هەروەسا هەرێم تووشی قەیرانێن دارایی بوویە، چوونا شاندێ هەرێمێ بۆ دوبەی وێ چەندێ دگەهینیت، كو پێگەهێ هەرێما كوردستانێ یێ گرنگە و د وێ گۆپیتكێ دا هەرێما كوردستانێ شیا پەیوەندیێن خوە بهێزتر لێ بكەت».
