د هێرشا سەر لقێ ئێك دا مە فڕۆكەكا دوژمنی ئێخستە خوار و شوفێرێ وێ ب ساخی هاتە دەستەسەركرن
ئامێدیێ، مەحمود نهێلی:
سەلمان سێری پێشمەرگەیێ شۆرەشا گۆلانێ ل گوندێ سێرێ یێ سەر ب دەڤەرا نهێلێ ڤە ل سنوورێ ناحیا دێرەلۆك ژ دایكبوویە و ئێك بوویە ژ پێشمەرگەیێن قەهرەمان و سەرنج راكێش د شۆرەشا گولانێ دا .
سەلمان سێرێ بۆ رۆژناما ئەڤرۆ دبێژیت : ل سالا 1978 دەمێ گوندێن مە سۆتی و هاتینە ڤەگوهاستن ئەز یێ بوویمە پێشمەرگە، ژ بەر كو هەلبژێرێ گوندێ مە یێ باش بوویە بنگەهێ پێشمەرگەی ل وێرێ بوو، و بەردەوام پێشمەرگە ل گوندی بوون و ژ بەر وێ چەندێ ژی حكۆمەتێ گوندێ مە سۆت ئاگر بەردا خانیان ئاژەل و كەل وپەل تێڤە تێدا سۆتن و خەلكێ گوندی ڤەگوهاستنە سەنتەرێ كومەلگەها دێرەلۆكێ، و دیاركر ئها ل وی دەمی مە خوە رادەستی حكومەتا ئیراقێ نەكر، و ئەم ل گۆندی دەركەفتین و پشی خەلكی ل گوندی نەمای و لەشكرێ ئیراقێ گوند چولكرین ئێڤاری ئەم ڤەگەریاینە گوندی بەرێ خوە دەینێ ئاگرێ گوندی ڤە و ئاژەل و مریشك و ب كەل و پەل ڤە یێن دسۆژن و دیار كر، هەر هنگی ئەز هاتم و مە خوە گەهاندە تاهرێ مەلا ئەحمەدی و ئیبراهیمێ رەشاڤەی و ئەم ل گەل وان چووینە شێلازا و زەعیم عەلی و گەلەك بەرپرسێن دی یێن شۆرەشێ ل وێری بوون، وان هەڤالان گۆتە من ڤەگەرە ڤە تو هێشتا یێ بچووكی و ترسا هەیی برسا هەی تو نەشێی پێشمەرگاتیێ بكەیی بەلێ من گۆت هەكە نەشێم چەكی ژی راكەم دێ كاروبارێن دی ل گەل پێشمەرگەی ئەنجامدەم و گۆت: پشتی هنگی ئەم چووینە كانی ماسێ مە حەفت بارێن دەرمانا ئینان، جوندیەكێ كورد هاتبوو گەل پێشمەرگەیان یێ شارەزا بوو ئەوی رێك نیشا مەدا و ئەم شیان وان دەرمانا بینینە ناڤ شۆرەشێ.
پێشمەرگەیێ گولانێ هەروەسا گۆت: ژ بەر كو هێشتا ئەز یێ هەلگرتنا چەكی نەبووم ئەم فرێكرینە سەر سنوورێ سوریێ داكو چەكی وێرێ بینین مە چەند بارێن چەكی ل وێری ئینان بارا پترێ سمینوف بوون، و مە ئینانە لقێ و تا كو ئەم گەهشتیە سەر سنوورێ ئیرانێ، ئەو چەك خال بخال بەلاڤكرن، پاشی ل ئیرانێ گوندەكی هەی دبێژنێ كەچەلا و كەمال كەركوكی ل وێرێ بوو و هەما ئەز مامە دگەل وی دا و ئەز ل وی گوندی ئاكنجی بووم، و دەمێ كەمال كەركوكی دەردكەفت ئەم د گەل دا بووین تا سالا 1979 كۆنگرە هاتیە گرێدان، پاشان ئەم هاتینە توركیا و ل گوندەكی باكورێ كوردستانێ ئاكنجی بووم .
سەلمان سێری دیاركر، د سالێن هەشتیان دا مە مالا خوە ئینا سێری و بەردەوام بووم ل گەل پێشمەرگەی و ل ئەسنادێ بووم سەر دوشكێ، و خالا سێری و چەندین جاران توشی شەرێن گران و نەخوشیان بووینە و وەللا گەلەك جاران ژی نان نەبوو بخوین، ئاشكرا ژی كر، كو وی گەلەك جاران پشكداری د شەران دا كریە و سێ جاران بریندار بوویە، هندی شەرەك هەبوویە ئیلا ئەو دا پشكدار بیت، نوكە ژی پێیەكی من پێڤە نینە لێ ئەز هەر پێشمەرگەمە هەر چەندە نەشێم چ كارێن گران بكەم.
ناڤهاتی گۆت: د سالێن هەشتیان جارەكا نەه فرۆكێن شەڕی یێن حكومەتا ئیراقێ هاتنە سەر لقێ بوردۆمان دكر، و مە دەلیڤە نەدایێ ب دروستاهی ئارمانجێ بینن و مە هەموو دوشكان پێكڤە تەقە لێ دكر، و گولێن دوشكان موشەكێن فرۆكان دكەفتن و گەلەك موشەكێن نەپەقیایی مە دیتن كو جهێ گولێن دوشكا ل سەر بین، هەر وێ رۆژێ مە فرۆكەیەك ژی ئێخست نابێژم من ئیخستن چونكە گەلەك دوشكان پێكڤە تەقە لێ دكر، و شوفێرێ وێ ژی ب ساخی هاتبوو گرتن و ئینا بوو لقێ تا ئەنفالان یێ گرتی بوو د زیندانا لقێ ئێك دا ل زێوە.
ناڤهاتی داخاز ژی كر، كو ئەو پێشمەرگەیێن كەڤن و یێن سەردەمێ شۆرەشێن ئیلۆن و گولانێ چاڤێ خوە بدەنێ و هاریكاریان وان بكەن، ژ بەر كو ئەوان ژیانا خوە هەموو یێ قوربانی شۆرەشێ و ڤێ ئاخی كری و ئەو نوكە وێڤە نەشێن چ كارێن دی بكەن و گۆت: من پێیەكی خوە یێ ژ دەست دایی و نوكە پەككەفتی مە ما دێ شێم چ كار كەم و ئاشكرا كر، پێشمەرگایەتیا وی دەمی گەلەك خوەشتر بووی ژ یا نوكە، چونكە هنگی دادپەروەرێ هەبوو و هەموو وەك ئێك بوون نانەك هەبایە بۆ هەموویان بوو، و هیڤی ژی خوەستن كو ئەو ئارمانجا وان بۆ شۆرەش كری ب دەست ڤە بینن و مللەتێ كورد بگەهیتە ئارمانجا خوە كو ئەو ژی دەولەتا كوردستانێ یە.
دەربارەی وێ پارچا ڤیدیویێ ئەوا د تۆرێن سوشیالێ دا بەلاڤ بووی كو ئەو ل سەرێ بەرچەمكی دەواتێ دكەت، ناڤهاتی گۆت: ئەو ل سالا 1990 ێ بوو و پشتی ئەنفالان ئەم ڤەگەریابووینە سەر سنوورێ ئیراق و ئیرانێ و توركیا، ئەو ئاهەنگ وان ل گەلیێ ساتێ بوو، بۆ وێ یەكێ دلێ پێشمەرگەی خوەش ببیت و ئەز بو سحبەتا یێ زیرەك بووم و هەردەم من دڤیا كەیفا پێشمەرگەی بینم .
و گۆت: ئەوێن دوێ ئاهەنگێ دا گەل مە 10 یێن شەهید بووین و نەماینە و كەمال كەركوكی بەرپرسێ مە یێ سەرەكی بوو و چەندین بەرپرسێن دی یێن پێشمەرگەیان ل گەل مە بوون، وەك خالد بانی هەژمارەكا پێشمەرگەیان د گەل دا بوون تەحسین كەمەكی و بەدەل بەندی و موحەمەد خالد بۆسەلی و هەر ئێكی هەژمارەكا پێشمەرگەیان دا دگەل دابوون، و و ئەم نێزیكێ 70 پێشمەرگەیان بووین ل وی گەلی .
سەلمان سێری، بەری چەند هەیڤان توشی جەلتا مێشكی بوویە و ژ هاتن و چونێ و ژ ئاخفتنێ بێ بەهر بوویە، لێ چەند رۆژان بەری توشی ڤی نەخوەشیێ ببیت، مە خوە گەهاندبوویە و ئەڤ دیدارا كورت د گەل دا ئەنجام دا بوو و چەندین تەوەرێن ژیان و خەباتا خوە بۆ مە دیار كربوون، دگەل داخازا ساخلی و سلامەتیێ بو پێشمەرگەیێ ناڤهاتی و تەڤایا پێشمەرگەیان دخازین هیڤیا مە ئەوە دنێزیك ترین دەم دا ڤەگەریتە ڤە سەر ساخلەمیا بەرێ ناڤ كەس و كارێن خوە.
