د هەمبێزا دو دەنگبێژان دا بوویمە دەنگبێژ
هەرهین محەمەد:
دەنگبێژ(نورەدین دۆسكی) كو دبیتە برایێ دەنگبێژێ وەغەركری هونەرمەند (سەیفەدین دۆسكی) د دیدارەكێ دا بۆ ئەڤرۆ دبێژیت: ئەز ژ مالباتەكا دەنگبێژان رابوویمە و برایێ من ژی و خالێ من فەتاح دۆسكی دەنگبێژ بووینە و دهەمبێزا دو دەنگبێژان دا مەزن بوویمە و دەنگێن وان گەلەك كارتێكرن ل من كرینە و ئەو حەزە لنك من پەیداكریە ئەز ژی سترانان بێژم و من دەوسا وان گرتیە و دەنگ و سەلیقەیا وان نووكریە و ب هندێ ژی رازی نەبووم، ژبەركو حەزو ڤیانا من بۆ سترانێ گەلەك بوو من دڤیا پتر خزمەتا سترانا كوردی یا فۆلكلۆری بكەم ، لەورا و ئەز ل دووڤ دەنگێن خۆش و سترانێن پاقژو باش گەڕیام.
هەروەسا گۆت: گوهداریا دەنگبێژین دهۆكێ من كریە وەكو ئیسڤێ عەبو خورتا و حسێن بانەسوری و گەلەك دەنگبێژێن دی و بەر ب دەڤەرا شنگالێ ژی چوویمە، چونكو وێرێ گەنجینا ستران و دەنگبێژان بوویە و من گوهداریا سترانێن دەنگبێژ پیرمچۆ قەرپال و خێرۆ و لەزگین سەیدۆ و خدر فەقی من كریە و هەردیسان من ئاڤریەك دایە دڤەرا ئۆمەریان ژی من گوهداریا سترانێن دەنگبێژ مراد ئومەری كریە و هەردیسان من گوهداریا دەنگبێژێن سەرحەدێ كریە وەكو حسێنو رەسولۆ و شاكرۆ زاهرو عەبدلكەریمێ وانێ كریە و ژسترانێن ڤان هەموویان من تێكەلی سترانێ دەڤەرا بەهدینان كرینە.
