د پلانا وان دایە خولێن فێركرنا دیلانان ڤەكەن
بێوار حەمدی:
وارهێل عۆزێر، راهێنەرێ تیپا دهۆك یا هونەرێ مللی، د دیدارەكێ دا بۆ رۆژنامەیا ئەڤرۆ گۆت: تیپا مە ژ (15) ئەندامێن كوڕ و (15) ئەندامێن كچ پێك دهێت، ل گەل دەستەیا راهێنەران و مە شیایە پشكداریێ د هژمارەكا زۆرا فەستیڤالان ل ناڤخوە و دەرڤەی وەلاتی دا بكەین و ئەم ب تیپا خوە د سەرفەەرازین.
هەروەسا گۆت: كلتۆرێ مە یێ كوردی گەلەكێ زەنگینە لێ مخابن خەلك گرنگیێ پێ نادەت و ب بەر ب كلتۆرێ بیانی دچن و چاڤ لێدكەن، ژبەركو هەر دەمێ گرنگی ب تشتەكی نەهاتە دان دێ تشتەكێ دی جهێ وی گریت، لێ هەر چاوا بیت ئەم د بەردەوامین و دێ گرنگیێ ب دەوات و دیلانێن كوردی دەین و د پلانا مە دایە ل پاشەرۆژێ خۆلێن فێركرنا دەوات و دیلانان ڤەكەین و مە دڤیا زووتر مە ئەڤ كارە كربا لێ مخابن هەتا نوكە تیپا مە جهێ خوە یێ تایبەت نینە.
