د پەروەردەكرنێ دا نابیت دایك و باب زاڕۆكی بكەنە كۆپیا خوە
زاخۆ، دلۆڤان هالۆ:
بەرپرسێ سەنتەرێ جڤاكی یێ خێزانێ و پاراستنا زاڕۆكان ل زاخۆ د دیدارەكێ دا بۆ ڕۆژناما ئەڤرۆ دیار كر كو پێدڤییە پشتەڤانیا دەروونی و جڤاكی ژلایێ خێزانێ و قوتابخانێ و سەنتەر و ڕێكخراوان ل زاڕۆكی بهێتە كرن و گۆت: ئەڤجا چ ئەڤ پشتەڤانیە ب شێوەیێ تاكەكەسی یان ژی ب گڕۆپ بیت.
محەمەد سالح، ڤەكۆلەرێ دەروونی و بەرپڕسێ سەنتەرێ جڤاكی یێ خێزانێ و پاراستنا زاڕۆكان گۆت: (ب دیتنا من پشتەڤانیا ب شێوەیێ گڕۆپ ڕەنگڤەدانەكا ئەرێنی یا باشتر ل سەر زاڕۆكی هەیە، وەكو ڕوونشتنێن دەروونی و چالاكیێن جڤاكی، چونكی د ڤان گڕۆپان دا ڕاهێنانێن زیندی یێن گەلەك باش یێن هەین كو ڕەنگڤەدانێ ژ ڕەفتار و ژیانا زاڕۆكی یا ڕۆژانە دكەن و كاریگەریێ ل دەروون و پەروەردەیا زاڕۆكی دكەن).
ڤەكۆلەرێ دەروونی ئاماژە ب وێ چەندێ ژی كر كو زاڕۆك ل پێنج سالێن دەستپێكا ژیێ خۆ ئامادەیە بۆ ئاڤاكرنا كەسایەتیا خۆ، لەوما هەكە خێزان د ڤی ژیێ زاڕۆكی دا پشتەڤانیەكا دەروونی و جڤاكی یا بهێز ل زاڕۆكی بكەت و ب پەروەردەیەكا درست و جوان مەزن بكەت و هەست و سۆزێن وی ل بەرچاڤ وەرگرن و ڕێز ل هزر و بۆچوون و بڕیار و هەلبژارتنێن وی بهێنە گرتن، ل پاشەڕۆژێ دێ بیتە خودان كەسایەتیەكا بهێز دناڤ خێزانێ و ل قوتابخانێ و ل گەل هەڤالان و د جڤاكی دا.
محەمەد سالح دیار كر ژی كو بەرۆڤاژی ڤێ چەندێ هەكە خێزان ب تایبەت كەسێن ئێكێ یێن خێزانێ وەكو دایك و باب زاڕۆكی ب پەروەردەیەكا شاش خودان بكەن و سەرەدەریەكا نە جوان و دكتاتۆرانە ل گەل زاڕۆكی بكەن وەكو وان دڤێت زاڕۆك بتنێ گۆهداریا وان بكەن و ل دووڤ حەز و خواستا وان بیت و بۆچوونا خۆ یا كەسایەتی نەبیت و حەز بكەن زاڕۆكی وەكو خۆ و ژیانا خۆ پەروەردە بكەن، بێگۆمان دێ ڤی زاڕۆكی كەسایەتیەكا لاواز هەبیت و گۆت: (دوور نینە ل پاشەڕۆژێ ئەڤ زاڕۆكە تۆلڤەكرنێ لگەل خێزانێ و جڤاكی بكاربینیت و خۆ دووری جڤاكی بكەت، لەوما پەروەردەیا زاڕۆكی زەحمەتترین تشتە، دڤێت خێزان گەلەك قۆربانیان بۆ پەروەردەكرنا زاڕۆكێن خۆ بدەن).
بەرپڕسێ سەنتەرێ جڤاكی ئەو چەندە ژی دیار كر، پشتەڤانیا دەروونی یا درست ئەوە دایك و باب وەكو دیتنا زاڕۆكی ڕەفتارێ ل گەل بكەن و هەكە زاڕۆكی هندەك ڕەفتارێن شاش ئەنجامدان، وان ڕەفتارێن وی ڕاستڤەكەن نەك زاڕۆكی سزا بدەن و گۆت: (لەوما نابیت دایك و باب وەكو دیتنا خۆ ڕەفتارێ لگەل زاڕۆكی بكەن كا ئەو چ هزر دكەن و چاوا ڕەفتاران دكەن زاڕۆكی بكەنە كۆپیا خۆ).
ڤەكۆلەرێ دەروونی دیار كر كو ل قۆتابخانێ ژی دڤێت مامۆستایان هشیاری و ڕەوشەنبیریا لایەنێن دەروونی و جڤاكی و پەروەردەیی و وەرزشی ل دوور زاڕۆكی هەبیت، داكو ب شێوەیەكێ درست ڕەفتارێ لگەل زاڕۆكی بكەن و پشتەڤانیێ لێ بكەن و هێزێ بدەنێ و گۆت: (دڤێت مامۆستا هەر قۆتابیەكێ ل دووڤ كەسایەتیا وی سەرەدەریێ ل گەل بكەت، چونكی هەر زاڕۆكەك پێدڤی ب شێوەیەكێ پەروەردە و ڕەفتارا جیاواز هەیە).
محەمەد سالح دا زانین كو ل كورستانێ كێم سەنتەر و ڕێكخراوێن گرێدایی زاڕۆكان هەنە، ئەڤێن هەین ژی چالاكیێن وان سنووردارن و پێدڤیە چالاكیێن وان بەرفرەهـتر بن داكو خەلكی پتر باوەری ب ڤان سەنتەر و ڕێكخراوان هەبیت و وێ باوەریێ بۆ خێزانان چێكەن كو ئەڤ چالاكییە د باشن و د بەرژەوەندیا زاڕۆكێن وان دانە و ل پاشەڕۆژێ دێ مفایی ژێ وەرگرن و گۆت: (پێدڤیە خێزانێ ژی ئەو ڕەوشەنبیرییە هەبیت كو زاڕۆكێن خۆ فڕێكەنە ڤان سەنتەر و ڕێكخڕاوان).
محەمەد سالح، ڤەكۆلەرێ دەروونی و بەرپڕسێ سەنتەرێ جڤاكی یێ خێزانێ و پاراستنا زاڕۆكان د بەردەوامیا ئاخفتنێن خۆدا دیار كر كوئەو ئاهەنگ و چالاكیێن سنووردار یێن كو بتنێ وەكو ڕۆتینەك هندەك جاران دهێنە ئەنجامدان چ مفایی ناگەهینیتە زاڕۆكان و گۆت: (لەوما هەكە ب شێوەیەكێ باشتر چالاكیێن هەمەجۆر ل سەر ئاستێ تاكەكەسی و گڕۆپان ل سەنتەر و ڕێكخراوان بهێنە ئەنجامدان، ئەڤە دێ بیتە دەرگەهەك كو ئەم بشێین ئەو بەربەستێن هەتا نوكە ل پێشیا مە بشكێنین و هێزەكا دی بدەینە زاڕۆكی و پشتەڤانیەكا مەزن یا دەروونی و جڤاكی ل زاڕۆكی بكەین، داكو ل پاشەڕۆژێ ئەم نڤشەكێ پێگەهشتی و بهێز و خودان كەسایەتی ئاراستەیی جڤاك و وەلاتێ خۆ بكەین).
