د چار سالێن بهێن دا هەرێما كوردستانێ پێدڤی ب ماست و شیرێ دەرڤە نابیت
هەولێر، قائید میرۆ:
رێڤەبەرێ سامانێن ئاژەلی ل وەزارەتا چاندنێ دیاركر، خەلكی زێدەتر بەرێ خۆ دایە دانانا پڕۆژەیێن تەرش و كەوالی و رێژەیا بەرهەمئینانێ ب شێوەیەكێ بەرچاڤ زێدەبوویە و دبێژیت: د چار سالێن بهێن دا، مە پێدڤی ب شیر و ماستێ دەرڤە نامینیت.
فیراس سەدیق، رێڤەبەرێ سامانێن ئاژەلی ل وەزارەتا چاندنێ بۆ رۆژناما ئەڤرۆ دیاركر، حوكمەتا هەرێما كوردستانێ ئاسانكاریێن زۆر بۆ پڕۆژەیێن تەرش و كەوالی كرینە و خەلكەكێ زۆر د دەمێ نوكە دا بەرێ خۆ دایە دانان و ڤەكرنا پڕۆژەیێن تەرش و كەوالی و گۆت: «مەسرور بارزانی، سەرۆكێ حوكمەتێ ژی گرنگیەكا زۆر ب كەرتێ چاندنێ و تەرش و كەوالی ددەت، هەموو دەمەكی دەزگەهێن حوكمەتێ راستپاردینە هاریكاربن بۆ ڤەكرنا پڕۆژەیان و ئاسانكاریان بۆ خەلكی هەتا بشێن ببنە خودان پڕۆژە».
فیراس سەدیق گۆتژی: «د دەمێ نوكە دا ل هەرێما كوردستانێ زێدەتری 100 پڕۆژە هەنە و 127 هزار سەرێن تەرش و كەوالی تێدانە، هەڤبەركرن ل گەل سالێن بۆری پڕۆژەیێن تەرش و كەوالی ب شێوەیەكێ بەرچاڤ زێدەبووینە، هەروەسا هندەك ژ وان پڕۆژەیان یێن بەرهەمئینانا شیرینە و ئەم پێشبینی دكەین، د چار سالێن بهێن دا مە پێدڤی ب بەرهەمێ دەرڤە نابیت ژ ماست و شیری، چونكی دێ بەرهەمێ ناڤخۆ بەهرا بازاڕێ ناڤخۆ كەت».
