د ژڤانێ ته دا نه ل باژێری مه
یاسین دێره‌شی
1
ژ چاڤێن ته دبینم
تو زینه‌كا به‌خت ره‌شی
د ناڤ كه‌توارێ
عه‌شق ژ ده‌نگێن منارێن باژێری
دهێته راڤكرن
شه‌ڤ و رۆژ خاپینۆك و داڤ دۆزن
هیڤیێن عاشقان
تێدا ماینه هه‌لاویستی
نه‌شێن بفڕن
ژ به‌ر مژ و دومانێن هه‌یڤ ل عه‌سمانی وه‌نداكری
نه‌شێن داده‌ن
ژ به‌ر پڕبێژیا كولانێن باژێری
2
د ڤێ ژینگه‌ها
ژ هیڤیێن هه‌ژارا خرشبوویی
ژیان ژ ده‌ڤێ گورگان دا
بوویه به‌ستی
هه‌می پیرۆزی
یێ ل سه‌ر مێزا قومارێ
دهێنه فرۆتن
چو هیڤیا ژ ڤێ بیابانا هشكبوویی نه‌كه
ببه وێنه د چاڤێن من دا
دا هاری ته
ئازاران هه‌لگرم
3
د ژڤانێ ته دا
نه ل باژێری مه
ل گونده‌كێ بنارێ چیایێ عاشقا مه
ل چو كاودانا
ده‌ستێ من به‌ر نه‌ده
ئه‌ز روحا خوه ژ گیانێ ته وه‌ردگرم
وه‌ره ببه په‌ری ژ به‌حه‌شتا من
دا ل هه‌می ته‌مه‌نێ خوه
د گه‌ل ته دا بژیم
22/10/2020/ دهۆك
