د ڤێ شعرێ دا، یا ئەز دزانم تو نزانی
رێژین حکمەت
ئەز ڤێ شعرێ هەر سال
سەر ژ نوی دنڤێسم
هەمی گاڤا
هەمی دەما
ب زمانێ حەزژێکرنێ
نوی دکەم
دکەمە ستران و ڕۆمان
وەکی گەرۆکەکێ هەژار ل ڤی وەلاتی.
ب دەنگێ خۆ دلۆرینم
ب دەستێ خۆ دنڤێسم و ڤەدهوینم
ئەگەر بەحسێ ئەشقێ بکەن
دێ چاوا شرۆڤە کەم؟
دا کو چ جاران بەرزەنەبیت!
دێ چاوا نڤێسم
داکو چ جاران نەمریت!
ل سەر کیژ دارا ل دارستانێ بنڤێسم؟
داکو رۆژەکێ ببیتە شاهدێ ڤیانا مە
پاپۆرا ئەز لێ سوار بوویم
دێ کیژ دەریا نقۆم کەت؟!
هێشتا تو نزانی
ل دەڤ تە چ دکم
پێدڤی ناکەت بزانی
چونکی ئەز دزانم
ئەز یا هەیم
پێنوسی دەستێ من یێ گرتی
ئەو دێرا ڤەدهوینیت
وەکی یاریکەرەکێ یاریان ب پەیڤان دکەت
دنڤێسیت
ئاشقی وان چاڤێن رەشم
من چەندی خۆشی
ل گەل تە پیرۆزکرن
من چەند پیاسەیێن
ل نیڤە شەڤا ل ڤی باژێرێ تەنگ و تاری ل گەل تە دکرن
من چەند ھەناسە پێشکێشی تە کرن
من چەند قوربانی بۆ تە دان
تو دزانی
ئەگەر سەقا سار بوو
ئەز دێ ژنوی فڕم
پشتی گەلەک دویراتییێ دبڕم
وەکی وی بالندێ ب خۆشی دگەهیتە جهێ خۆ
ئەز یا گەهشتم هەمبێزا تە
ئەز چاوا د ئەشقێ گەھشتم
من چەند پێناسە
ل گەل تە دانە ئەشقێ
من چەند ھیڤی دانە تە
ل گەل ژیانێ
مە دگۆتن
دوماھیک بۆ نینە
ئەرێ تو
تو دێ هەر مینی پارچەك ژ چیرۆکا من
یا کو چ جاران نەهێتە ژبیرکرن
پارچەك ژ پیربوونا من
نەخۆشییا ژبیرکرنێ ژی چ جاران تە ژ بیرا من نەبەتن
پارچەیەك ژ گڕنژینا من
یا کو چ جارا دەنگێ وێ ژ گوهێ تە دەرنەکەڤیتن
پارچەیەك ژوێ دلقوتانێ یا کو ل گەل مرنا تە د راوەستیت
پارچەیەك ژ تێگەهشتنا من بۆ ڤێ دنیا یا پری جوانی
تو دێ هەر مینی پارچەیەك ژ چیرۆکا من؟
خۆ ئەگەر تو نوکە نە دناڤ ژیانا من دابی.
