د گۆپیتكا یاریێن ڤێ حەفتیێ دا ئەڤرۆ دهۆك دێ زەورا مێهڤان کەت
قەیس وەیس:
بڕیارە ئەڤرۆ چار یاریێن مایی ژ هەڤڕكیێن گەڕا 15ێ یا خولا ستێرێن ئیراقێ یا فوتبۆلێ بهێنە ئەنجامدان، یارییا دهۆك و زەورا دگڕنگترین و گۆپیتكا یاریێن ڤێ حەفتیێ دایە.
جەماوەرێ دهۆكێ سەركەڤتن دڤێت
بڕیارە ل دەمژمێر 5:30 مەغرەب تیما یانەیا دهۆك دناڤ ئەرد و جەماوەرێ خوە دا یانەیا زەورا یا بەغدایی مێڤان كەت كو دهێتە هژمارتن ئێك ژ گرنگترین یاریێن ڤێ گەڕێ و هەموو پشتەڤانێن وەرزشی چاڤەرێ نە، ئەلهۆیێن چیا خودانا 21 خالانە ژ شەش سەركەڤتن، سێ وەكهەڤی و پێنچ خوسارەتیان ل ڕێزا 11ێ دهێت، یاریزانێن وێ 15 گۆل تۆماركرینە لێ 13 گۆل ژی ل سەر تیمێ هاتینە تۆماركرن، د بەرانبەر دا یانەیا زەورا 26 خال هەنە ل رێزا شەشێ دهێت و كێمترییا یارییەكێ.
پشت گەرمییا دهۆكییان ب كێ یە
هەرچەندە یاری دێ ب جەماوەر بیت پشتی فدراسیۆنا فوتبۆلا ئیراقێ ژ بڕیارا خوە لێڤەبووی و دەلیڤە دایە جەماوەرێ دهۆكێ بەرهەڤ بیت، لێ ژلایێ یاریزانا ڤە ب گشتی دهێتە پێشبینیكرن پێكهاتیێ دهۆكێ بڤی شێوەیی بیت، عەلی یاسین گۆلپارێز، ل هێلا بەرەڤانیێ خادم رەسۆل جۆهێر كو ئێك ژ باشترین یاریزانێن پیشەكارە، دیسان حەمۆد مشعان، یێ سۆری خالد كردغلی، سیابەند عەگید، ئەحمەد عادل، هارۆن ئەحمەد، حەسەن عیماد، كەریم دەرویش، پیتەر گۆرگیس، زاكێری و جونیۆر سامبۆ، دگەل پشت بەستن د هندەك یارییان دا مونتەزر محەمەد، ئەندرێ ئالان، لیۆناردۆ دی ئۆلیڤێرا، عەلا عەباس.
چەكێ زەورا كینە
حسام فەوزی ڕاهێنەرێ یانەیا زەورا دبیت پشت گەرمیێ ب ڤێ پێكهاتیێ بكەت، جەلال حەسەن گۆلپارێز، كازم رەعەد، مەیسەم جەبار، سەجاد محەمەد بەرەڤانێن تیمێ، ژلایەكێ دووڤە ل هێلا ناڤین عەبدوللا مۆسا، حسێن فەلاح، كەرار نەبیل و حەسەن عەبدولكەریم، ل هێلا هێرشبرنێ موراد محەمەد، ئیبراهیم تۆمیوا و محەمەد قاسم.
ئامارێن هەردو تیمان د بەرژەوەندییا زەورا دانە
ل دووڤ ئامارێن نە فەرمی هەردو یانەیان 30 یاری بەرانبەر ئێك د خولا ئیراقێ دا ئەنجامداینە، یانەیا دهۆكێ ب تنێ پێنچ سەركەڤتن ئیناینە د بەرانبەر دا زەورایێ 15 سەركەڤتن هەبووینە، 10 یاریێن مایی ب وەكهەڤی ب دووماهی هاتبوون، تیما بەغدایی 41 گۆل ل سەر دهۆكێ تۆماركرینە د بەرانبەر دهۆكێ ژی 24 گۆل تۆماركرینە.
ڕاهێنەرێ دهۆكێ پشت گەرمی ب جەماوەری هەیە
د كۆنگرەیێ رۆژنامەڤانی یێ بەری یاریێ داعەبدولغەنی شەهەد ڕاهێنەرێ یانەیا دهۆك پشتگەرمییا خوە دیاركر كو هێزا تیمێ ژ پشتەڤانێن یانەیێ و مۆرالان یاریزانان دهێتە وەرگرتن و گۆت: یارییا بەرانبەر زەورا ئێك ژ بهێزترین یاریێن مە یێن د خولێ دانە، دێ هەڤڕكییەكا دژوار بۆ سەركەڤتنێ هەبیت، مە پشتەڤانێن دلسۆز و وەفادار هەنە و یاریزانێن مە ژی خودان شیان دێ شێن دناڤ یاریگەهێ دا باشترین ئاست و ئەنجامی ئینن، ژبیر نەكەین یانەیا زەورا خودان پێكهاتی و پێگەهەكێ مەزنە و هەڤڕكا ناسناڤییە د ئەڤ سالە دا لێ ئەم ژی هەڤڕكین و مە سەركەڤتن دڤێت.
شرۆڤەكارێ وەرزشی بۆچوونا خوە هەبوو
ژلایێ خوەڤە وەحید رەشید شرۆڤەكارێ وەرزشی ل پارێزگەها دهۆكێ بۆچوونا خوە دیار كر و بۆ رۆژنامەیا ئەڤرۆ گۆت: پێنەڤێت تیما دهۆكێ دێ دناڤ ئەرد و جەماوەرێ خوە دا بزاڤێ بۆ سەركەڤتنێ كەت پشتی وەكهەڤییا بۆری دگەل زاخۆ، هەرچەندە یاری ب سانەهی نابیت بۆ ئەلهۆیێن چیا بەرانبەر ئێك ژ بهێزترین یانەیێن دناڤا خولا ئیراقێ دا، دبیت ئەنجامێن وێ نە دچیگیربن لێ تیمەكا بزەحمەتە و بۆ هەر یارییەكێ سەركەڤتنێ دكەت.
سەبارەت تیما دهۆكێ ژی گۆت: ئەنجامێن تیما دهۆكێ دلخوەشكەرن، خالێن سەركەڤتنا دهۆكێ پشتەڤانێ وێ یە و ڕاستڤەكرنا شاشیێن یارییا بۆری ژی دڤێت بهێنە چارەسەركرن تایبەت یێن هێلا بەرگریێ، پرانییا گۆلێن ل سەر دهۆكێ دبن ئەو تەپێن ڕاوەستیایی ئانكۆ ژ كۆرنەرێ یان ژی فاولەكێ دهێن، وەكو دی گۆلكرن ل سەر دهۆكێ یا بزەحمەتە تایبەت پشتی هاتنا ڕاهێنەر عەبدولغەنی شەهەد، هەروەسان هێلا هێرشبەریێ ژی پێدڤی ب شێوازێن جودا یین هێرشبەریێ نە، ژلایەكی ڤە سامپۆ نە د وی چاڤی دایە بهێتە دیاركرن و عەلا عەباس ئاستێ پێدڤی دا نینە، لێ بگشتی تیما دهۆكێ یاریزانێن باش هەنە و شیانێن گۆلكرنێ و پاراستنا گۆلێ ژی هەن، دیسان هێشتا ئاریشەیا لایێ چەپێ تا ڕادەیەكی مایە، ل بگشتی ئەز دبینم دەلیڤەیا سەركەڤتنێ یا هەیی.
دەهـ گۆلكەرێن دەستپێكی یێن خولێ بەری ب دووماهی هاتنا یاریێن ڤێ حەفتیێ
1- شیرزۆد تیمبرۆڤ 11 گۆل ژ یانەیا هەولێر.
2- یونس حمۆد نەهـ گۆل ژ یانەیا كەرخ.
3- عەلا ئەلدالی هەشت گۆل ژ یانەیا مووسل.
4- كینگسلی كۆكۆ حەفت گۆل ژ یانەیا ئەلغراف.
5- یونس حمۆد شەش گۆل ژ یانەیا كەرخ.
6- پیتەر گۆرگیس شەش گۆل ژ یانەیا دهۆك.
7- داودا دیمی شەش گۆل ژ یانەیا نەفت میسان.
8- محەمەد خالد كۆفی شەش گۆل ژ یانەیا كەرخ.
9- حەسەن عەبدولكەریم پێنچ گۆل ژ یانەیا زەورا.
10- لیۆنێل ئیتیبا پێنچ گۆل ژ یانەیا شورتە.
ژ یاریێن دی یێن ئەڤرۆ
یانەیا مینا یا بەسرایی دێ یانەیا نەفت یا بەغدایی ل دەمژمێر سێیێ ئێڤاری مێڤانكەت، د هەمان دەمدا مووسل دێ بیتە مێڤانا یانەیا ەلقاسم ل باشۆرێ ئیراقێ، ل دەمژمێر 5:30 مەغرەب هەردو یانەیێن بەغدایی جەوییە دێ بیتە مێڤانا یانەیا كارەبا.
