د گەڕا دویێ دا ئەردۆغان دێ بیتە سەرۆک کۆمارێ تورکیا
ئەڤرۆ
نڤیسەر و ڤەکۆلەرەکێ ناڤدار یێ تورکیا راگەهاند، سینان ئۆغان ژی بریار دایە پشتەڤانیێ ل ئەردۆغانی بکەت، د گەڕا دویێ دا دێ رێژەیا دەنگێن ئەردۆغانی زێدەتر لێ هێن و ئەردۆغان دێ بیتە سەرۆک کۆمارێ تورکیا، شانسێ کەمال کلچدار ئۆغلۆیی گەلەک کێمە.
عەبدولقادر سەلڤی نڤیسەر و ڤەکۆلەرێ ناڤدار یێ تورکیا راگەهاند، د هەڤدیتنا هەری دووماهیێ یا د ناڤبەرا ئەردۆغانی و سینان ئۆغانی دا وی بریار دایە پشتەڤانیێ ل ئەردۆغانی بکەت، سینان ئۆغان یێ بەرهەڤ نینە پشتەڤانیا کەمال کلچدار ئۆغلۆیی بکەت، چونکی ئەو ژی باش دزانیت شانسێ کلچدار ئۆغلۆیی گەلەک کێمە و هەکە پشتەڤانیا ئەردۆغانی بکەت رەنگە بۆ وی ژی گەلەک باش بیت، ژ بەر هندێ ژی د چەند رۆژێن بهێت دا سینان ئۆغان بەربژارێ گەڕا ئێکێ یا هەلبژارتنێن سەرۆک کۆماریێ دێ ب فەرمی پشتەڤانیا خوە بۆ ئەردۆغانی دیار کەت.
هەمان نڤیسەری ئەو یەک ژی دیار کریە، ژ بەر پشتەڤانیا هەدەپێ یا بۆ کلچدار ئۆغلۆیی هەموو نەتەوەپەرستێن تورکیا بریار دان پشتەڤانیێ ل ئەردۆغانی بکەن، ژ بەر هندێ ژی دهێتە پێشبینیکرن دەمێ سینان ئۆغان ب فەرمی پشتەڤانیا خوە بۆ ئەردۆغانی دیار بکەت، ئەو یەک ببیتە ئەگەرێ هندێ رێژەیا دەنگێن ئەردۆغانی بگەهیتە ٥٣% و دێ ب ساناهی بیتە سەرۆک کۆمارێ تورکیا، نها شانسێ کەمال کلچدار ئۆغلۆیی گەلەک کێمە و سەرکردێن هەر شەش پارتیێن ئۆپۆزسیۆنێ ژی باش دزانن، کو کەمال کلچدار ئۆغلۆ نابیتە سەرۆک کۆمارێ تورکیا، نها پارچەبوونەک گەلەک مەزن د ناڤبەرا هێزێن ئۆپۆزسیۆنێ دا دروست بوویە، ئەگەرێ هندێ هەیە پارتیا مەرال ئاکشەنەرێ پشتی گەڕا دویێ یا هەلبژارتنان خوە ژ ناڤ رێزێن ئۆپۆزسیۆنێ ڤەکێشیت و بچیتە ناڤ هەڤپەیمانیا ئەردۆغانی ژی، چونکی هەر کەسەکێ بەرژەوەندیێن خوە دڤێت.
ناڤهاتی ئەو یەک ژی دیار کریە، رێککەفتن د ناڤبەرا ئەردۆغانی و سینان ئۆغانی دا هاتیە کرن، ل گۆر رێککەفتنێ دێ سیان ئۆغان ب فەرمی پشتەڤانیا خوە بۆ ئەردۆغانی دیار کەت و ئەردۆغان ژی دێ هندەک سۆزێن کو داینە وی بجه ئینیت و ئێک ژ داخوازیێن سەرەکی یێن سینان ئۆغانی ئەوە دڤێت هەموو پەنابەرێن سووریێ بۆ وەلاتێ وان بهێنە فرێکرن، دڤێت شەرێ ل دژی پەکەکێ ب هەموو رەنگەکێ بەردەوام بیت و چەندین خالێن دی هەنە، کو رەنگە هەتا چەند رۆژێن دی بۆ رایا گشتی بهێنە ئاشکرا کرن.
ل ئالیێ دی چەندین کۆمپانیێن راپرسیان ل تورکیا ژی دوهی ئەنجامێن راپرسیێن خوە ئاشکرا کرن و ل گۆر ئەنجامێن راپرسیان د گەڕا دویێ یا هەلبژارتنان دا رەجەب تەیب ئەردۆغان دێ رێژەیا دەنگێن خوە زێدەتر لێ کەت و دێ ٥٢% ژ دەنگان بدەستڤە ئینیت و دێ بیتە سەرۆک کۆمارێ تورکیا. ل گۆر هەمان کۆمپانیان رێژەیا دەنگێن کەمال کلچدار ئۆغلۆیی ژی ناگەهیتە ٤٧% و شانسێ کەمال کلچدار ئۆغلۆیی گەلەک کێمە.
