د یاسایێ دا سزایێن دژوار بۆ ژبەربرنا زارۆکی هەنە
بێوار حەمدی:
پارێزەرەکی د دیدارەکێ دا بۆ ڕۆژنامەیا ئەڤرۆ دیار کر کو بشێوەیەکێ گشتی حالەتێن ژبەربرنا زارۆکی ل هەرێما کوردستانێ گەلەک د کێمن، ژبەرکۆ ئەم جڤاکەکێ عەشائیری نە و ئەڤ چەندە ژی دژی یاسایێ و شەریعەتێ ئیسلامێ یە و یاسایێ ژی سزایێن دژوار بۆ ژبەربرنا زارۆکی هەنە.
پارێزەر ناسر حەسەن دیار کر کو د ماددەیێن ( 417،418،419) ژ یاسایا سزادانا عیراقێ و ژمارە (111) یا سالا 1969 یا ڕاستڤەکری بەحسێ ژبەربرنا زارۆکان دکەت و گۆت: ماددێ 417 بەحسێ رەزامەندیا ئافرەتێ دکەت لسەر ڤی بابەتی کو دێ هێتە سزادان ب زیندانکرنێ بۆ ماوەیەکێ کو نابیت ژ ساڵەکێ زێدەتربیت و غرامە کرن کو نابیت ژ سەد هزار دیناران زێدەتر بیت کو ئێک ژ ڤان سزایا هەکە ئافرەت ب ڕێکەکێ زاروکێ خو ژبەر خۆ ببەت یان ژی کەسەک وی کاری بۆ بکەت.
پارێزەری دیار کر ژی کو هەمان سزایێ ل سەری دێ هێتە دان هەکە کەسەک ب رەزامەندیا ئافرەتێ زارۆکێ وێ ژناڤ ببەت ئەو کەسێ ڤی کاری دکەت دێ هەمان سزای وەرگریت و گۆت: هەکە ئەو کەسێن ڤی کاری دکەن (پزیشک، دەرمانساز، مامان، هاریکارێن نوژاری) بن، دێ سزایێ وان زێدەتر بیت.
پارێزەر ناسر د بەردەوامیا ئاخفتنێن خۆدا دیار کر ژی کو هەکە ژبەربرنا زارۆکی بێی رەزامەندیا ئافرەتێ بیت، دێ ئەو کەسە هێتە سزادان بۆ ماوەیەکی کو ژ 10 ساڵان زێدەتر نەبیت و گۆت: ل گۆڕ ماددێ (419) دێ هێتە سزادان ب زیندانکرنێ بۆ هەر کەسێ ببیتە ئەگەر کو زارۆکێ ئافرەتەکێ ژبەر بچیت، ئەڤجا چ ب ئەگەرێ توندوتیژیێ یان ماددەیەکێ زیانبەخش بدەتێ کو ئەو کەسە بزانیت ئەو ئافرەتە یا ب دووگیان بوو.
پارێزەر ناسر حەسەن گۆتژی: ئەڤ حالەتە ل هەرێما کوردستانێ گەلەک دکێمن، چونکی ئەم جڤاکەکێ عەشائیرینە و ئەڤ کریارە ب دژی یاسایێ و شەریعەتێ ئیسلامێ نە.
