رابین هاشم: ئەو پلانا هاتییە دانان بۆ پێشڤەچوونێ یا سەركەفتییە
د داخویانیەكێ دا راهێنەرێ تیما فوتبۆلا یانەیا دهۆك دیار كر ئەو سەركەفتنێن ڤێ دووماهیێ یێن تیما وان د خولا پلا نایابا كوردستانێ دا ب كارەكێ كۆم دهێت و هەتا نوكە ئەو پلانا هاتییە دانان یا سەركەفتییە پێخەمەت پاراستنا مانا تیما خوە د خولێ دا، ئەڤ چەندە هات پشتی تیما وی ژ چارچووڤەیێ هەڤڕكیێن گەڕا 22ێ ل یاریگەها خوە شیا سەركەفتنەكا گرنگ ل سەر یانەیا چوارقۆرنە ب دو گۆلان بێ بەرانبەر بینت، ئەوا هەردو گۆل ب لێدانێن پەنەلتیان رێباز رەحیم و جەبار كەریم تۆماركرن.
زێدتر رابین هاشم بۆ رۆژنامەیا ئەڤرۆ گۆت: هەرچەندە ئەركێ مە ب سانەهی نینە لێ ب پشتەڤانییا كارگێریێ ئەم شیایین ل دووڤ پلانەكێ بچین و بشێن یاری بۆ یاری گڤاشتنێن دەرونی و ئاست و ئەنجامێن لاواز بەر ب باشتر ببەین، هەرچەندە كێماسیێن هەین، لێ ئەم بەردەوامین ل سەر چارەسەركرنا وان و نا راوەستیین هەتا دووماهی یاری ژ خولێ و بەردەوامبین بۆ پێشڤەچوونێ و خوە ژ مەترسییا داكەقتنێ قۆرتالبكەین، ئەڤچەندە ژی ب كارەكێ كۆم دهێت كو ب سۆپاسیڤە كارگێرییا یانەیێ بەردەوام دووڤچوون و پشتەڤانییا تیمێ دكەت.
ژلایەكێ دووڤە ناڤهاتی دیار كر بۆ وەرزێ ئەڤ سالە یا گرنگ ڤەگەڕاندنا زلهێزیا دهۆكێ یە و ئەڤچەندە ژی پێنگاڤێن باش بۆ هاتینە هاڤێتن و هەتا نوكە ئەم ل دووڤ پلان و بەرنامە كار دكەین بۆ وەرزێ ئەڤ سالە بتنێ مانا خوە پارێزیت و سالا بهێت دهۆكەكا جودا و هەڤڕك بیت.
