رابین هاشم: سه‌رباری هێزا یاریێ رژدین بۆ سه‌ركه‌فتنێ
چاڤه‌ڕێ دهێته كرن ئه‌ڤرۆ ل ده‌مژمێر 2:30 پشتی نیڤرۆ تیما ته‌پا پێی یا یانه‌یا دهۆك دێ ل یاریگه‌ها سێیێ مێڤاندارییا یانه‌یا سیرۆانی نوو د چارچووڤه‌یێ هه‌ڤڕكیێن گه‌ڕا 27ێ یا خولا پلا نایابا كوردستانێ كو دبیته دووماهی یاریێن ڤێ گه‌ڕێ.
تیما دهۆكێ ب شێوه‌یێ به‌روه‌خت خودانا 32 خالانه ل رێزا 10ێ دهێت، د به‌رانبه‌ر دا تیما مێڤان رێزبه‌ندییا پێنجێ دهێت ب كۆمكرنا 37 خالان، یارییا ئه‌ڤرۆ بۆ دهۆكێ دێ بۆ باشكرنا هه‌لوه‌ستێ خوه یێ مانا خوه د خولێ دا بیت، لێ تیما مێڤان ژی دێ شه‌ڕی كه‌ت بۆ سه‌ركه‌فتنێ ژبه‌ركو ئه‌و ژی نێزیكی سه‌رێ لیستێ یه، د قۆناغا ئێكێ دا ئه‌وا ل باژێرێ سلێمانیێ هاتبوو ئه‌نجامدا تیما دهۆكێ شیابوو ب گۆله‌كێ بێ به‌رانبه‌ر سه‌ركه‌فتن ل سه‌ر سیروانی نوو بینت.
ل دور دووماهی به‌رهه‌ڤیێن دهۆكێ د. رابین هاشم راهێنه‌ر تیمێ بۆ رۆژنامه‌یا ئه‌ڤرۆ گۆت: ئه‌م ل سه‌ر به‌رهه‌ڤیێن خوه د به‌رده‌وامین و ل دووڤ پلانا هاتییه دانان بۆ ڤێ یاریێ مه سه‌ركه‌فتن دڤێت پێخه‌مه‌ت زێده‌تر پێشڤه چوون و پاراستنا مانا خوه د خولێ دا، چه‌ند یاریزانێن مه بۆ ڤێ یاریێ د به‌رهه‌ڤ نابن تایبه‌ت هێلا هێرشبه‌ریێ ژبه‌ر پشكدارییا وان د گه‌ل تیما خولا ئیراقێ، لێ مه باوه‌ری ب شیانێن یێن گه‌نجان هه‌نه و گه‌شبینین ب پشته‌ڤانییا جه‌ماوه‌ری دێ گه‌هینه ئارمانجا خوه.
