رادیـۆیـا دهـۆك: دەنگەك ژ مالبچویكێ ئازادیێ دەركەفتی
بـریـن تـاهـر
پشتی سەرهلدانا پیرۆز یا ئادارا سالا 1991 و ل گەل دەركەفتنا ئەلندا ئازادیێ ل كوردستانێ، كوردستانێ و دەڤەرا بەهدینان و ب تایبەت باژارێ دهۆكێ ل ژڤانێ ژ دایكبوونا سازییەكا راگەهاندنێ یا پێشكەفتی بوون كو نها بوویە ئێك ژ ستوونێن راگەهاندنا كوردی، رادیۆیا دهۆك، نە ب تنێ وەستگەهەكێ میدیایێ بوو كو نووچە و بەرنامە پێشكێش دكرن، بەلكو منارەیەكا راگەهاندنێ بوو رێیێن پێشكەفتنێ ل كوردستانێ رۆهن كرن.
ئەڤرۆ و پشتی بوورینا 33 سالان ل سەر دامەزراندنا وێ، رادیۆیا دهۆك وەكو ماقویلترین سازییا میدیایی ل هەرێما كوردستانێ ب سەربلندی راوەستیایە، میراتەكێ دەولەمەند ژی ژ بەرهەم و دەستكەفتان هەلدگریت و گاڤێن خوە ب بنەجهی بەر ب پاشەرۆژێ دهاڤێژیت.
ئەوا رادیۆیا دهۆك ژ سازیێن دی جودا دكەت نە ب تنێ دیرۆكا وێ یا تژی دەستكەفتە، بەلكو رۆلێ وێ یە د چێكرنا بەرەبابكێن میدیاكار دا، وەكو ئەكادیمیەكا راستەقینە ژی بوو ژبۆ دەرچوون و پێگەهاندنا میدیاكارێن چەلەنگ یێن نها د مەیدانا رۆژنامەڤانییا كوردستانێ دا كار دكەن. د كولانكێن ڤێ رادیۆیێ دا ب سەدانا نڤیسكار و پەیامنێر و بەرهەڤكەرێن بەرنامەیان و بێژەر و تەكنیكار هاتینە پەروەردەركرن، یێن پشتی هینگێ بووینە ناڤێن دیار د میدیایا كوردی دا، ل ناڤا ستۆدیۆیێن رادیۆیا دهۆك گەلەك كەس فێری كارێ پیشەیی و رەوشتێن رۆژنامەڤانی و میدیایی بوون و بەهرەیێن خوە ب هونەرێ پەیڤا گوهلێبووی و هەڤگەهشتنا جەماوەری جوان كرینە.
پەیاما رادیۆیا دهۆك ل سەر پەخشێ میدیایی یێ كەڤنەشۆپ رانەوەستیا، بەلكو بەرفرەه بوو هەتا هەموو چەمكێن ژیانێ ڤەگرتین، ڤێ رادیۆیێ گەلەك بەرنامێن پێشكەفتنێ و رەوشەنبیركرنێ پێشكێشكرینە و رۆل د بلندكرنا ئاستێ هشا جڤاكی هەبوویە د هەموو بیاڤان دا وەكو: فێركرن، ساخلەمی، چاندن، رەوشەنبیری و هونەری. رادیۆیا دهۆك دەنگەك بوو ژبۆ وەلاتیێ كوردستانی، خەم و ئارمانجێن وی گەهاندینە و تیشك ئێخستیە سەر پرسێن رۆژانە، هەروەسا رۆلەكێ گرنگ د پاراستنا كولتورێ كوردی دا و ب هێزكرنا ناسنامەیا رەوشەنبیری ب رێكا بەرنامێن خوە گێرایە ئەو بەرنامێن ئەدەب و هەلبەست و موزیكێن رەسەنێن كوردی هەمبێز كرین.
ل گەل پێشكەفتنا تەكنولۆژی یا بلەز، رادیۆیا دهۆك نەما ئێخسیرا پێلێن پەخشی یێن كەڤن، بەلكو مل ب ملێ سەردەمێ دیجیتال چوو، ئەڤرۆ ب رێكا تەكنولۆژیا سەردەم و پەخشی ب رێكا ئەنترنێتێ، رادیۆیا دهۆك دگەهیتە هەموو قولاچكێن جیهانێ. ڤێ یەكێ ژی وەكریە كو رادیۆیا دهۆك ببیتە پرەك د ناڤبەرا كوردێن ل ناڤا وەلاتی و برایێن وان یێن ل رەڤەندان دژین، كوردستانیێ ل ئەورۆپا یان ئەمریكا و هەتا ئوسترالیا ژی نها گەلەك بساناهی گوهدارییا بەرنامەیێن رادیۆیا دهۆكێ دكەن و ل گەل وەلاتێ خوە د هەڤگەهشتنێ دانە و ئەڤ یەكە ژی ژێیاتییا وان ب هێز دئێخیت و ناسناما وان ب بوورینا دەم و سالان دپارێزیت.
ب درێژاهییا 33 سالان، رادیۆیا دهۆكێ میراتەكێ میدیایی پەخش كرییە كو ژ هەژی رێزگرتنێ یە، رادیۆیا دهۆك دیدەڤان بوو ل سەر گرنگترین پێشهاتێن دیرۆكی یێن ل كوردستانێ چێبووین، روودانێن وێ بەلگە كرینە و هشەكا جڤاكی یا ئەرێنی ژی دروست كریە.
سازیێن راگەهاندنێ ب ژیێ وان ناهێنە پیڤان بەلكو ب كارتێكرن و دانا وێ دهێتە پیڤان، رادیۆیا دهۆك ب هەموو پیڤەران، سازییەكا كەڤنارە كو شونتلێن ئاشكرا ل سەر كاروانێ راگەهاندنا كوردستانێ هێلاینە، پشكدارییەكا كارا ژی د پێشڤەبرنا گەشەپێدانا جڤاكی دا كریە.
د بیرەوەرییا 33 سالییا دامەزراندنا وێ دا، ئەم دەستێ هەموو وان كەسان دگڤێشین یێ پشكداری د ئاڤاكرنا ڤێ سازییا راگەهاندنێ یا سەربلند دا كری، هەروەسا دامەزرێنەرێن دەستپێكێ یێن ئەڤ سازیە دامەزراندی و ئەمانەت پاراستی و كاروان بەردەوام كری.
رادیۆیا دهۆك نە ب تنێ سازیەكا راگەهاندنێ یە، بەلكو پارچەیەكە ژ بیردانكا جڤاكا كوردستانێ و دەنگێ بەرەبابكانە و منارەیا زانست و زانینێ یە، هیڤیدارین چاوا 33 سالان بەردەوام بوو، ل پاشەرۆژێ ژی بەردەوام بیت و پەیاما راگەهاندنێ یا ب ئارمانج و ئاڤاكەر هەلگریت.