رادیۆیا دهۆك بۆ من وەكو قوتابخانەیەكێ بوو
ئەڤرۆ
شاكر ئەتروشی:
رۆژنامەڤان و مەدیاكار (بێوار داخاز) كو نوكە وەك پەیامنێر ل كەنالێ زاگرۆس كاردكەت، د دیدارەكێ دا بۆ رۆژناما ئەڤرۆ گۆت: دەمێ ئەز قوتابی ل قوناغا ئامادەی من بابەت و گۆتار ل رۆژنامە و گۆڤاران بەلاڤ دكرن، دووڤدا بۆمە بێژەرێ دەنگوباسان ل رادیۆیا دهۆك، كو ب راستی ئەو دەزگەه بۆ من وەكو قوتابخانەیەكێ بوو.
هەروەسا گۆت: پشتی رادیۆیێ من ل گەلەك كەنالێن بیانی و نافخوە كاركریە، هەروەسا ل گەل تیمەكێ رۆژنامەڤانێن بیانی ل دەمێ شەڕێ داعش من كاركریە، دووڤدا بۆ دەمەكی ئەز دوور كەفتم و ل گەل رێكخراوێن جڤاكی سڤیل من كاركر، لێ جارەكا دی زڤڕیم و نوكە ل زاگرۆس تیڤی یێ بەردەوامم، هەلبەت كارێ راگەهاندنێ مرۆڤی نەچار دكەت كو گوه ل گەلەك بابەتێن خۆش و نەخۆش بیت، ژلایەكێ دی ڤە چ كار ب ساناهی نینن و ژلایێ مێشكی ڤە مرۆڤ دوەستیێت، لی هەر چاوا بیت دڤێت مرۆڤ ب پیشەیانە و ل دووف پرەنسیپێن مرۆڤایەتی و پاراستنا نیشتمانی كاربكەت و رۆژنامەڤانێ سەركەفتی ئەوە یێ یێ بخوینت و مفای ژ هەر رۆژنامەڤانەكی وەربگریت و هەول بدەت پەیامەكا ئەرێنی دبەر پیشەیا خوە را بگەهینیت و ئەز مەدیاكارێ دێرین (نسرەت هادی) سەرپەرشتێ سەنتەرا بەهدینان ب ماموستایێ خوە دزانم.
