رازیبوون ل سەر بەلاڤكرنا پێنج هزار پارچەیێن ئەردی ل زاخۆ هاتیە كرن
سەرپەرشتێ ئیدارەیا سەربخوە یا زاخۆ دیار كر، سەرۆكێ حوكمەتا هەرێما كوردستانێ رازیبوون ل سەر بەلاڤكرنا پێنج هزار پارچەیێن ئەردی ل زاخۆ كریە و جهێ بەلاڤكرنا وان پارچەیان ژی هاتیە دەستنیشان كرن.
گوهدار شێخۆ، سەرپەرشتێ ئیدارەیا سەربخوە یا زاخۆ گۆت: «د دو سالێن بۆری دا حوكمەتا هەرێما كوردستانێ پشتەڤانیەكا باش ل مە كریە ژ بۆ گەهاندن و بجهئینانا پڕۆژەیێن خزمەتگوزاری، دیسا دێ هەژمارەكا دیتر یا پڕۆژەیان ڕاگەهینین، كو دێ ل گوندێن سنوورێ ئیدارەیا سەربخوە یا زاخۆ بن».
گۆتژی: «د دەمەكێ نێزیك دا دێ بەرێ بنیاتی بۆ جاددەیا 60 مەتری یا ل دەوروبەرێن زاخۆ هێتە دانان، دیسا بەنداڤەك ژی ل زاخۆ دێ هێتە دروستكرن و سەرۆكێ حوكمەتێ رازیبوونا خوە ل سەر دیاركریە».
ل دۆر بەلاڤكرنا پارچەیێن ئەردی ل زاخۆ گوهدار شێخۆی گۆت: «جهەكێ تایبەت ژ بۆ بەلاڤكرنا پارچەیێن ئەردی هاتیە دەستنیشان كرن و د ماستەرپلانا زاخۆ دا ئەو دەڤەرە ژی دەڤەرەكا ئاكنجیبوونێ یە، ئەم ل گەل خودانێن وان پارچەیێن ئەردی و رێڤەبەریا چاندنێ ژی كۆمبووینە و د دەمەكێ نێزیك دا ئەو پارچەیێن ئەردی دێ هێنە بەلاڤكرن».
