رازەمەندیا 11 ھزار پارچەیێن ئەردی ل سێمێلێ ھەیە
قەزا سێمێلێ چاڤەرێی بەرسڤا ئەنجوومەنێ وەزیرانە ل سەر رازیبوونا ناحیێن (ئاسھێ، خانکێ) ب کوژمێ 440 ملیار دینارا پرۆژە ل قەزا ناڤبری ھاتینە ئەنجامدان، کار ل سەر 11 ب دووماھی ھاتیە و 23 ماینە برێڤە، پرۆژە ژ بەلێندەری ھاتیە وەرگرتن.
حسێن خالد سەعید قائیمقامێ قەزا سێمێلێ بۆ رۆژناما ئەڤرۆ ئاشکراکر کو ئەرد بۆ بەلاڤەکرنێ ل سنورێ قەزا سێمێلێ ھەیە وەک (حەوشکێ، مسیریکێ، فەیدیێ، خانکێ، شاریا) کێشە ب تنێ دڤێت خودانێن ئەردی بھێنە رازیکرن، چونکو رازیبوون ل سەر بەلاڤەکرنا پتر ژ 11 ھزار پارچێن عەردی ل قەزا سێمێلێ و دەردورێن سەر ب قەزا ناڤبری ڤە ھەیە و ھەتا نوکە نەھاتینە بەلاڤەکرن.
قائیمقامێ قەزا سێمێلێ ئەو ژی گۆت: وەک پرۆژە (خانکێ، ئاسھێ) ب رێیا جڤاتا پارێزگەھێ بۆ کارگێریا پارێزگەھێ ھاتیە رەوانەکرن بۆ وەزارەتا نافخو ھاتیە بلندکرن بۆ ئەنجوومەنێ وەزیران ھاتیە بلندکرن کو ھەر دو دەڤەر ببنە ناحیە و ئاسھێ ناحیا کەڤنا سلێڤانەی بوو، ھەردو دبنە ناحیە، چونکو دەڤەرێن بەرفرەھن و چاڤەرێی بەرسفێ نە و ھەر ھەموو تشت ل سەر ب دووماھی ھاتینە.
قائیمقامێ قەزا سێمێلێ بۆ رۆژناما ئەڤرۆ گۆت: پشتی سالا 2014 و ھاتنا قەیرانا دارایی وەک ھەموو دەڤەرێن کوردستانێ پرۆژێن خزمەت گوزاری قەزا سێمێلێ ھاتبوونە راوستاندن، پرۆژێن سێمێلێ 35 پرۆژە بووینە ل کەرتێن ساخلەمی، پەروەردە، باژێرڤانی، ئاڤ، 23 پرۆژان کار ل سەر راوستایە و 11 پرۆژان کار ل سەر بەردەوامە، پرۆژەک ھاتیە ڤەکێشان ژ بەلێندەری و کوژمێ ئەڤان ھەر 35 پرۆژان 440 ملیار دینار ھاتینە مەزاختن.
قائیمقامێ سێمێلێ ئەو ژی گۆت: کومەلگەھا کواشێ یا پیشەسازی ھندەک رێنمایێن ل سەر ھاتینە سەپاندن وەک فیلتەر و ھەتا رادەکێ باش کێشا کۆمەلگەھا کواشێ ھاتیە چارەسەرکرن.
حسێن گۆت ژی: ژلایێ چاندنێ ڤە ب چاندنا گەنم و جەھی گەلەک یا دەولەمەندە چونکو عەردەکێ بەر فرەە ھەیە، ئەڤ سالە رێژا گەنمی یا باش نەبوو، لێ ھەتا رادەکی بەرھەمەکێ باش بوویە.
ئەو ژی گۆت: جە بۆ دانانا سایلویەکێ ل باوەردێ ل باتێلێ ھاتبوو دەست نیشانکرن و ژ بەر قەیرانا دارایی ئەو پرۆژە ی ھاتبوو راوستاندن، لێ جھێ سایلۆیێ بوویە بنگەھێ کومکرنا گەنمی یە و ھەر دەمێ سایلۆیێ گەنم زێدە دکەت ل وێ گورەپانێ دھێتەدان.
کێشا ئاڤێ ل سێملێ نینە و کومەلگەھا ژی یا باشە و بتنێ ئاریشە ل گوندان ھەیە و ب تنێ ل حەوشکێ و کێڤلا ھێشتا تورا ئاڤێ نەیی، نە گەھشتیێ و ھندەک گوندان ب تانکەران ئاڤ دگەھیتێ.
جھێ ئاماژەکرنێ یە کو قەزا سێمێلێ ل سالا 1954 بوویە ناحیە، ل سالا 1978 بوویە قەزا، ھەردو ناحیێن (فەیدیێ، باتێل) ل گەل پازدە کۆمەلگەە و 157 گوندان بخوەڤە دگریت.
