راسته یێ گۆڤه‌ندی نه‌زانیت شه‌ڕی ژی نزانیت؟!
شه‌ڕ هه‌ڤكێشه‌كا سه‌یره و ره‌نگه ره‌وشا وێ یا مۆرالی یا جودا بیت ژ ده‌ڤه‌ره‌كێ و ملله‌ته‌كی بۆ ئێكێ دن، ڤێ ئێكێ ئه‌م د كلتۆرێ ره‌وشه‌نبیری و هونه‌ری یێن چ ملله‌تێن دیتر دا نابینین، به‌لێ ل ده‌ف كوردان پشكه‌كه ژ بیروباوه‌ریێن وان ژبه‌ر ئه‌و كاره‌سات و مه‌ینه‌تێن ب سه‌رێ وان هاتین، هه‌رده‌م یێن به‌رهه‌ڤن ببنه شه‌ڕڤانێن چه‌له‌نگ (پێشمه‌رگێن قاره‌مان) نه‌خاسمه حه‌زێن گه‌نجێن كورد دبێ سنۆرن د وارێ مۆالی دا، شه‌ڕ و گۆڤه‌ند.. له‌ورا ل هه‌ردویان دزانانه و شه‌رڤانێن قاره‌مانن، ملله‌تێ كورد پتر ژ هه‌می ملله‌تێن دیتر ل رۆژهه‌لاتا ناڤه‌راست گرێدای دابونه‌ریتێن خوه‌یه، رێزێ لێ دگریت و پێگیریێ پێ دكه‌ت، ئه‌ڤ تشته خوه‌یا دبیت د گۆڤه‌ندێن هه‌ڤپشك دا یێن كچ و كوڕان د هه‌لكه‌فتێن نشتیمانی و نه‌ته‌وه‌یی دا وه‌كی جه‌ژنا نه‌ورۆزا دێرین و دامه‌زراندنا پارتێن سیاسی و ئاهه‌نگ و شاهیێن جڤاكی، چونكو ملله‌تێ مه گه‌له‌ك شه‌هید داینه گۆڤه‌ند ژی هه‌تا راده‌كێ مه‌زن هاتینه سنۆردان وه‌كو رێزگرتن بۆ گیان و خێزانێن شه‌هیدان، لێ داوه‌تێن كوردی ل هه‌ر چار پارچێن كوردستانێ تووشی كارتێكرنێن هه‌ڤچه‌رخ بووینه، لێ هه‌تا راده‌كێ باش شیاینه دابونه‌ریتێن خوه بپارێزن و پێگیریێ پێ بكه‌ن، ب گشتی داوتان جهه‌كێ تایبه‌تێ هه‌ی د جوانكاری و هه‌لكه‌فتێن مللی دا ل ده‌ف كوردان و بنه‌ره‌تێ سه‌ره‌كی یێ وان یێ دیرۆكی دزڤریته‌ڤه بۆ سه‌مایێن رێوره‌سمێن ئاینی یێن كه‌ڤن كو جاران ژ كارێن سحرێ بووینه چونكی ره‌وشت و ناڤه‌روكا مرۆڤی دیاردبیت د سه‌ماكرنێ دا هه‌روه‌كی دخودیكێ دایه و داوه‌ت دهێنه ئه‌نجامدان ب سڤكی ولڤینێن بله‌ز كو برێكا وان داوه‌تی بزاڤێ دكه‌ن زه‌لامینیا خوه دیاربكه‌ن، ل هه‌ر وه‌كو د شه‌ڕان دا پێشمه‌گێن كورد ل به‌ر ده‌نگێ تۆپ و فرۆكان ده‌هه‌واتێ دكه‌ن دا كه‌س نه‌مینیت پله‌كا ترسێ ژی د دلی دا مابیت، دبیت ئه‌ڤ تشته ل ناڤه هه‌می له‌شكرێنن دونیایێ دا نه‌بیت, هه‌رگاڤ روح و لڤینێن سه‌مایا مللی یا كوردی زه‌لامینیێ و سه‌ربلندیێ و كه‌رامه‌ت و ره‌وشتێن بهاگران یێن كه‌ساتیا كوردی دیار دكه‌ن و سه‌مایێن ئافرتا كورد سالوخه‌تێن مێینه دیاردكه‌ن وه‌كی نازكیا بێ سنۆر و جوانیا به‌ژن و بالا وده‌ربرینێن جه‌سته‌یی و لڤینێن نه‌رم یێن هه‌مئاهه‌نگ ل گه‌ل ئێك و جلكێن كوردی یێن ره‌نگاوره‌نگ یێن په‌رده‌پووش و وه‌كو دی د هه‌مان ده‌مدا و شێوازێ راوستانێ ب سه‌ربلندیه‌كا مه‌زن د خه‌له‌كێن سه‌مایێ دا یێن ب تنێ یان هه‌ڤپشك ل گه‌ل ره‌گه‌زێ دیتر ل گه‌ل جلكێن كوردی یێن قه‌شه‌نگ كو به‌ژن و بالێن زراڤ دیار دكه‌ن.
ئه‌ڤرۆ ڤه‌ژاندنا دابونه‌ریت و ره‌وشه‌نبیریا نه‌ته‌وه‌یی یێ ملله‌تێ كورد كاره‌كێ فه‌ره بهێته كرن و سه‌مایا كوردی نه ب تنێ چه‌ند پێنگاڤێن سه‌مایێ نه یێن بالكێش به‌لكو دارشتنه‌كا هونه‌ری هه‌یه و بابه‌ته‌ك هه‌یه ل دۆر دئاخڤیت، ئه‌ڤه چێدبیت ئێك ژ ئه‌فسانێن كه‌ڤن بیت یان دابونه‌ریته‌كا مللی بیت و سه‌ما هاریكاریا ئافره‌تێ دكه‌ت ده‌ربرینێ ژ خوه بكه‌ت ب شێوه‌كێ راسته‌وخوه و شه‌رمێ نه‌كه‌ت ژ جه‌سته‌یێ خوه چونكی كێماسیێن وی دزانیت..
