راستڤه‌كرنه‌ك بۆ فه‌رید ئه‌سه‌سه‌رد و “أصول العقائد البارزانیه” راستیا بیروباوه‌ریا بارزانیان بناسه!
به‌رى ساله‌كێ ئه‌ز چاڤه‌رێى به‌لاڤكرنا گۆتاره‌كا خوه بوم د رۆژناما (ئاوێنه)دا. ل وى ده‌مى من نڤیسینه‌ك د مالپه‌رێ ئاوێنه دا خواند، كو پێداچوونه‌ك بوو ژ ڤێ رۆژنامێ بۆ پرتووكا فه‌رید ئه‌سه‌سه‌رد”ریشه‌ى بیروباوه‌رى بارزانیه‌كان” كو هه‌ر ئه‌و پێداچوون د ژماره 502 یا 10 چریا دووێ 2015 یا ئاوێنه دا هاتبوو به‌لاڤ كرن. ئه‌ز “حه‌فت رۆژان” ب ڤێ گۆتارا ئاوێنه‌ڤه مژوول بووم و جاره‌ك دى ڤه‌گه‌ریام پرتووكا اصول العقائد البارزانیه یا فه‌رید ئه‌سه‌سه‌رد و من گۆتاره‌ك نڤیسى، ب سۆپاسى ڤه رۆژناما ئاوێنه د ژمارێن 505 و 506 دا به‌لاڤكر. ب راستى من هزر دكر گۆتارا من دێ ده‌نگڤه‌دانه‌ك هه‌بیت ژ لایێ فه‌رید ئه‌سه‌سه‌رد یان ژى چ نه‌بیت سه‌نته‌رێ وى یێ لێكۆلینان، لێ مخابن ده‌نگڤه‌دان نه‌بوو. ئه‌ڤه دێ هه‌مان گۆتار، ل گه‌ل كورتكرنه‌كێ ل سه‌ر تایبه‌تمه‌ندیا بنه‌مالا شێخێن بارزان ب زارێ به‌هدینى دانم به‌رده‌ستێ خوه‌نده‌ڤانێن رۆژناما (ئه‌ڤرۆ)، زێده‌بارى ته‌وه‌ره‌ك تایبه‌ت د وارێ حه‌قیقه‌تا بیروباوه‌رێن بارزانیان.
ئه‌ڤ گۆتار دێ دو ته‌وه‌ر بن: ته‌وه‌ره‌ك پێداچوون و گه‌نگه‌شه‌یه ل سه‌ر وان ژێده‌رێن ئه‌سه‌سه‌رد دبێژیتێ اصول العقائد البارزانیه و دیاركرنا ئاوایێ مفاوه‌رگرتنا ئه‌سه‌سه‌رد ژ ژێده‌ران و پاشى دێ ژێده‌رێن دروست یێن باوه‌ریا بارزانیان خوه‌یان كه‌ین. ته‌وه‌رێ دووێ ژ گۆتارێ دێ تایبه‌ت بیت ب خه‌سله‌تێن مه‌لا مسته‌فا بارزانى، وه‌كو نموونه‌یه‌ك ژ هزرا ته‌كیا بارزان.
رۆژناما ئاوێنه شاره‌زایه گۆتار د پشكا سیاسی دا ل سه‌ر مالپه‌رێ خوه ئینابو‌و خوار، چونكو ب راستى ئارمانجێن ڤێ پرتووكێ سیاسینه، نه ژى لێكۆلین و ئه‌كادیمى، وه‌كو پرتووك حه‌ز دكه‌ت بێت پێش. پشتى من گۆتار خواندى و ڤه‌گه‌ریایم پرتووكا ناڤبرى و په‌یام و ئارمانجێن ڤێ پرتووكێ د سێ خالان دا دبینم: بارزانى دباشن و ب عه‌دالتن، به‌لێ بو خوه و دناڤ خوه‌دا. بنگه‌هێن هزرا بارزانیان دوورن ژ كلتۆر و هزرا كوردان. هه‌ر وه‌سا ئه‌سه‌رد د پرتووكا خوه دا هه‌ول دده‌ت بێژیت كو باوه‌ریا ته‌كیا بارزان ب ئاینێ ئیسلامێ نه ئه‌و باوه‌ریه، ئه‌وا پرانیا مسلمانان ب ئیسلامێ هه‌یى.
ل ده‌ستپێكێ حه‌ز دكه‌م دیار بكه‌م چاوا لێكۆلینێن ئه‌كادیمى و “ئستراتیجى” دهێن نڤیسن و باشه ئه‌م بابه‌تێ ئیسماعیلیان یان ژى قه‌رامیتا بكین نموونه، كو نڤیسه‌رێ “ریشه‌ى بیروباوه‌رى بارزانیه‌كان” حه‌ز دكه‌ت بێ چ بنگه‌هـ، ڤان هه‌ردو گرۆپان بكه‌ت ژێده‌رێ بیرووباوه‌ریێن بارزانیان:
ده‌ما ئه‌م پرتووكه‌كێ ل سه‌ر ئیسماعیلیان یان ژى قه‌رامیتا بخوینین ب مه‌ره‌ما لێكۆلینێ، دڤێت به‌رێ خوه بده‌ینێ نڤیسه‌رێ ڤێ پرتووكێ كییه. هه‌كه ده‌ركه‌ڤت مه‌سیحى، دێ پیچه‌كێ مه‌ره‌ما وى بۆ مه دیار بیت، هه‌كه ده‌ركه‌ڤت قه‌شه مه‌ره‌ما وى دێ پتر بۆ مه دیاربیت. هه‌كه پاشى ده‌ركه‌ڤت كو ئه‌ڤ كه‌سێ پرتووك ل سه‌ر ئیسماعیلیان یان ژى قه‌رامیتا نڤیسى چوویه ئێكه‌تیا سۆڤێت، ل وێرێ خواندیه و گه‌له‌ك پۆستێن گرنگ وه‌رگرتنه، ئه‌ڤجا پرتووكا خوه نڤیسیبیت، مه‌ره‌مێن نڤیسه‌رى دێ گه‌له‌ك باشتر رۆهن بن: ئه‌ز دبێژم نڤیسه‌ر دێ هه‌ولده‌ت د پرتووكا خوه دا بێژیت ئیسلام یا خرابه و د هه‌مان ده‌م دا دێ نڤیسیت كو رهـ و ریشالێن كۆمۆنیزمێ ل ده‌ڤه‌رێ كه‌ڤنن و دیرۆكینه. چ نه‌بیت دا نڤیسه‌ر رێ بو كۆمونیزما ل ده‌ڤه‌رێ خۆش كه‌ت و ده‌ینێ ئێكه‌تیا سۆڤێت ل سه‌ر خوه راكه‌ت.
بێگومان من مه‌ره‌م نینه بێژم فه‌رید ئه‌سه‌سه‌رد دڤێت رهـ و ریشالێن كومونیزمان ل ده‌ڤه‌را بارزان په‌یدا كه‌ت، به‌لێ نموونێ مه نڤیسى یه‌ك ژ ژێده‌رێن گرنگێن پرتووكا ئه‌سه‌سه‌رده، كا چاوا ژێده‌رى هه‌ول دایه ب ره‌نگه‌ك عه‌جیب ـ غه‌ریب ئیسماعیلى و قه‌رامیتا ب كۆمۆنیزمێ ڤه گرێبده‌ت. ئه‌سه‌سه‌رد ب هه‌مان شێوه وه‌كو ژێده‌رێ خوه هه‌ولدایه هزرا بارزانیان ب ئیسماعیلى و قه‌رامیته‌یان ڤه گرێده‌ت و ئه‌و ژى بۆ كو نیشا بده‌ت بارزانیه‌ت ڤه‌ده‌رن ژ وێ هزرا ئیسلامى ئه‌وا ل ده‌ڤه‌رێ باوه‌رى به‌ربه‌لاڤ.
د پشكا داهاتیا گۆتارێ دا دێ پتر ل سه‌ر ڤى بابه‌تى راوه‌ستین.
