راستیا ژیـانـێ
داڤین زاویتەی
ژ وان كەسان وەستیایتر و نە ئارامتر نینن، ئەوێن هیڤی دكەن دونیا ببیتە فیردەوسا خودێ و درەو، خاپاندن و زۆرداری تێدا نەمینیت. ئەو كەسێ چاڤەرێ بیت كو مرۆڤان وەكو فریشتە ببینیت، بلا هیڤی بكەت كو ئەڤ مرۆڤە د گەل ئێك و دوودا د هەڤسۆزبن و دلێن وان ل سەر رەوشت و هەستێن جوان ل گەل ئێك بن، ئەو كەسەكێ بەلنگازە. بەلێ بزانن ژی كو ژیان تێكەلەكە د ناڤبەرا ڤی و یێ دی دا، مرۆڤ گەلەك جۆرن، هندەك ژ وان ل سەر باشیێ یێن راهاتین و وەكی بایەكێ هوینێ نازكن، هندەكێن دیژی د فێلبازیا خوەدا یا ژ رووڤی و ژ ماری ژی د غەدر و نەخۆشیێ دا یا بۆراندی. ژ بەر هندێ بلا رۆلێ تە ئەڤە بیت كو تو ژیانێ ساخ بكەی و یێ تژی بی ژ گیانێ خەبات و هیڤیان و یێ هشیار و كەتواری بی. هەروەسا درووشمێ تە بلا گۆتنا عومەرێ كۆڕێ خەتابی بیت، دەمێ دگۆت: ئەز مرۆڤەكێ خاپینۆك، پیس و فێلباز نینم، لێ مرۆڤێن ب ڤی رەنگی ژی نەشێن من د سەر دا ببەن. هەلبەت بلا رۆلێ مرۆڤی ئەو بیت كو مرۆڤ ب باشی بژیت و داخوازا گوهۆرینێ بكەت، رازی نەبە د سیلاڤێن خەلەتیان و خشیلانكێن كێماسیان دا بكەڤیە خار، هشیاربە ژیانا خۆ ب خەم و كۆڤان ڤە نەبۆرینە، ئەو ژیانا باب و باپیرێن مە ب خۆشی بۆراندی، ئەڤرۆ یا بوویە یاسایا دارستانێ. ژیان رۆژەكێ ژ رۆژان یا نموونەیی نەبوو، هەر ژ وێ رۆژا كەرب و كینێ قابیل ل ڤاندی دا كو برایێ خوە هابیلی بكوژیت، ژیان تژی هەموو تشتەك بوو، باشی و خرابی، لاوازی و بهێزی، ڤیان و كەربوكین، ئێمناهی و ترس…هەروەسا بلا رۆلێ مەیێ سەرەكی ئەو بیت كو ئەم باشیێ بەلاڤ بكەین و چاڤەرێی پاداشتێ وێ نەبین. تۆڤێ ئەڤینیێ بچینین و نەبێژینە كەسەكی بهایێ وێ بدەتە مە. بلا راستیێ بێژین و باجا ئاخفتنا خۆ بدەین و ب ڤی رەنگی بەردەوام بین. هەكە مە ڤیان ب ڤیانێ یان باشی ب باشیێ گوهارت، ئەڤە نیعمەتەكە ژ هەژی سوپاسیێیە، لێ بەروڤاژی وێ یا چاڤەرێكریە، دەمێ ئاریشەیەك بۆ مە دروست دبیت، ئەم ل سەر بێهنفرەهبین، تەمەت وێ دێ پاداشتی و خێرێ وەرگرین. ئەز نابێژم كو ئەڤ ژیانە دارستانەكە و بتنێ گورك لێ دژین، نەخێر، من باوەریا هەی كو راستی و راستگۆیێ د هەر دەم و جهەكی دا جهێ خۆ هەیە و چێكەرێن چاكیێ گەلەكن، لێ دا ئەم بێینە بەرامبەر مرۆڤێن باش دڤێت خوە ل گەل مرۆڤێن نەباش و درەوین بگونجینین، داكو نەئێشین و نە ترسین و ژیێ خوە ب قەهر و خەمانڤە نەبۆرینین، كو مرنێ ژ وی ژیانا ئەم تێدا باشتر ببینین.
