راستە پارەکێ ئاشۆپی ل بەرھەمێن شنگال و پێشمەرگە ھاتینە مەزاختن؟
ئەڤرۆ نیوز:
ھونەرمەندێ ناڤدارێ کورد دلشاد محەمەد سەعید د ھەڤدیتنەکێ دا ل گەل رۆژناما ئەڤرۆ بەحسێ پشکا ھونەرێ مۆزیکێ ل زانکۆیا دھۆک دکەت و بۆ جارا ئێکێ بەحسێ پەیوەندیێن خوە ل گەل سەرۆکێ زانکۆیا دھۆک دکەت، دیسان بەرسڤا ئەوان گۆتنا ددەت ئەوێن ل سەر بەرھەمێن شنگال و پێشمەری دھێنە گۆتن کو پارێن مەزن لێ ھاتینە مەزاختن.
ھونەرمەند دلشاد محەمەد سەعید ماوێ چەندین رۆژە ل پارێزگەھا دھۆکێ یە، د دیدارەکێ دا ل گەل رۆژناما ئەڤرۆ مەرەما ھاتنا خوە دیار دکەت، و گۆت:نوکە مژوولی ناما خوە یا دکتۆرایێ مە و ئەڤە سالا 2006 وەرە من دەست ھاڤێتیێ و چەند ئەگەر ھەبوون گیرۆ بوو، لێ نوکە بەردەوام ل سەر ناما خوە کو یا گرێدایە ب سترانا کوردی یا فولکۆری یا رەسەن ڤە.
ھونەرمەند دلشاد محەمەد سەعید ھەمبەر کارکرنا وی ل باژێرێ خوە ل زانکۆیێ و خزمەتکرنا باژێرێ خوە، دیارکر کو، د.موسلح دھۆکی سەرۆکێ زانکۆیا دھۆکێ ل سەر بابەتی و ڤەکرنا پشکا مۆزیکێ ل زانکۆیا دھۆک ل گەل ئاخفتیە و ھێشتا ئاخفتن ل سەر بابەتی ھەیە کو پشکا ناڤبری ب شێوەکێ ئەکادیمی ل زانکۆیا دھۆک بھێتە ڤەکرن.
مۆزیکژەنێ ناڤدارێ کورد دلشاد محەمەد سەعید د پشکەکا دی یا دیدارا خوە دا ئەو گۆتن رەتکرن کو دبێژین گۆژمێن ھەرە مەزن ل ئەوان بەرھەمێن (شنگال، پێشمەرگە) ئەوێن ھاتینە چێکرن ژلایێ ھونەرمەندێ ناڤبری، و گۆت: گەلەک دھێتە گوھۆتن ل سەر بەرھەمێن ھاتینەچێکرن ل سەر شنگال و پێشمەرگەی چونکۆ کارەکێ مەزن بوو و (150) ھونەرمەند پشکدار ب بوون، ژ ئەڤێ ھژمارا پشکداران بتنێ (140) ئەورۆپی بوون، مۆزیکەکا بەرکەفتی بوو ل گەل دەنگبێژێن بەر کەفتی بوو، ئەو ئاخفتنێن دھێنە گۆتن و من گوە لێ دبیت و ھەتا ل سازیێن راگەھاندنێ و رۆژناما ھەولێر ژی بەحسێ ئەڤێ چەندێ کر بوو، ب وی رەنگی نینە و گەلەک و گەلەک کێمترە ژ پرۆژێن دھێنە چێکرن.
ھونەرمەند دلشدا محەمەد سەعید ھەر ل سەر ھەمان بابەت گۆت: چونکو ھەولدان و بزاڤێن مرۆڤ کاری ل سەر بکەت، د رەوشەکا گەلەک خراب دا و ل گەل خەلەکێ پرۆفیشنال یێ بیانی کارەکێ بڤی رەنگی بەرچاڤ بکەین و بیتە بنیات بۆ پاشەرۆژێ.
