راهێنه‌ره‌ك و دو یاریزانێن زاخۆ چوونه د ناڤ رێزێن هه‌لبژارتیێ ئیراقێ دا
ئه‌ڤرۆ،
هاریكارێ راهێنه‌رێ تیما یانا زاخۆ ل سه‌ر ئاستێ پێشكه‌فتیا بۆ یاریا باسكێت بۆلێ دیاركر ئه‌و ل گه‌ل دو یاریزانێن خوه چووینه د ناڤ رێزێن هه‌لبژارتیێ ئیراقێ ل سه‌ر ئاستێ تازه‌پێگه‌هشتیان دا نه و حه‌فتیا بهێت دێ كه‌مپه‌كێ راهێنانێ ل پارێزگه‌ها دهۆكێ هێته دانان خوه به‌رهه‌ڤكرن بۆ قاره‌مانیا رۆژئاڤا ئاسیا.
زێده‌تر جوتیار عه‌لی بۆ رۆژناما ئه‌ڤرۆ گۆت: پشتی ئه‌و ئاستێ مه‌زن یێن هه‌ردو یاریزانێن مه یانا زاخۆ د خولا پلا نایابا ئیراقێ دا هه‌ر ئێك ژ زنار هشیار و سوفیان ئیبراهیم ب فه‌رمی بۆ ناڤ رێزێن هه‌لبژارتیێ ئیراقێ هاتنه داخوازكرن و ئه‌ز وه‌كو راهێنه‌رێ ژی ژلایێ ئێكه‌تیا باسكێت بۆلا ئیراقێ هاتیمه گازیكرن بۆ هاریكارێ راهێنه‌رێ هه‌لبژارتیێ ئیراقێ هه‌روه‌سا یاریزانه‌كێ دی خه‌لكێ سلێمانیێ كوپ ێشتر ل گه‌ل یانا زاخۆ بوو ئه‌وژی كیانۆش سه‌ربه‌ست هاتیه د ناڤ رێزێن تیمێ دا و بڕیاره ل هه‌شتێ ڤێ هه‌یڤێ كه‌مپێ راهێنانێ ل پارێزگه‌ها دهۆكێ بهێته رێكخستن كو دێ ل هۆلێن گرتی یێن یانا دهۆك و دبیت یا زاخۆ ژی بهێنه كرن خوه به‌رهه‌ڤكرن بۆ قاره‌مانیا رۆژئاڤا ئاسیا ئه‌وا چاڤه‌ڕێ یه ل ده‌سپێكا ئه‌یلۆنا بهێت وه‌لاتێ ئوردن مێڤانداریا وێ كه‌ت.
هه‌روه‌سان ناڤهاتی ئه‌وچه‌نده ژی دا دیاركرن ژێگرتنا هه‌ردو یاریزانان لسه‌ر پیڤه‌رێ ئاستی و تۆمارا وان یا خالان و لڤینێن وان د ناڤ یاریێ دا بووینه و گۆت: مه هژماره‌ما باش یا یاریزانێن تازه‌پێگه‌هشتی و لاوان هه‌نه كو خودان شیان و پاشه‌رۆژه‌كا گه‌ش ل به‌راهیێ هه‌یه ب هیڤییا وێ یه‌كێ پشته‌ڤانی بۆ بهێته كرن پێخه‌مه‌ت هێزكرنا بنیاتێ یاریا باسكێت بۆلێ ل پارێزگه‌ها دهۆكێ ب گشتی و باژێرێ زاخۆ ب تایبه‌تی.
