راهێنه‌ره‌ك و سێ یاریزانێن دهۆكێ دێ به‌ر ب ئیرانێ چن
ئه‌ڤرۆ، قه‌یس وه‌یس
دهێته چاڤه‌ڕێ كرن ل حه‌فتیا بهێت هه‌لبژارتیێ ئیراقێ بۆ یاریا پایسكلان به‌ره ب وه‌لاتێ ئیرانێ بڕێكه‌ڤن ژبۆ پشكداریێ د قاره‌مانیا نێڤده‌وله‌تی Touring Championship بن ئه‌وا دێ راهێنه‌ره‌ك و سێ یاریزانێن پارێزگه‌ها دهۆكێ پشكداربن، ئه‌وژی تارق سه‌عید راهێنه‌ر، سه‌ربه‌ست عه‌بدوللا، به‌ره‌ڤان قاسم و نه‌وزاد مسته‌فا، یاریزان هه‌روه‌سان ژده‌رڤه‌یی هه‌رێمێ محه‌مه‌د به‌كر و مسته‌فا حسێن پشكداربن.
ل دۆر ڤێ یه‌كێ تارق سه‌عید راهێنه‌رێ تیما یانا دهۆك و هه‌لبژارتیێ ئیراقێ بۆ رۆژناما ئه‌ڤرۆ گۆت: ئیراق دێ ل سه‌ر ئاستێ پێشكه‌فتیان پشكداری قاره‌مانیا نێڤده‌وله‌تی یا ئیرانێ بۆ شێوازێ تۆرینگ بن ئه‌وا بڕیاره هه‌ڤڕكیێن وێ ل 29ێ هه‌یڤا بهێت باژێری ته‌بریز مێڤانداریا وێ بكه‌ت كو هژماره‌كا مه‌زن یا یاریزانێن جیهانێ و ناڤ و ده‌نگ پشكداربن و پشكداریا یاریزانێن مه ژبه‌ر ئه‌و ئاست و ئه‌نجامێن ئێكێ د قاره‌مانیا ئیراقێ دا ئیناین و هه‌روه‌سان ژلایێ لژنا ژێگرتنا یاریزانان بووینه جهێ باوه‌ری و رازیبوونا كادرێ راهێنانێ یێن تیمێن خوه.
ژلایه‌كێ دووڤه ناڤهاتی گۆت: ئه‌و یاریزانێ ب گه‌هیته د ناڤ رێزێن هه‌لبژارتیێ ئیراقێ دا ئانكو گه‌هشتیه ئاست و شاره‌زاهیا باش و جهێ به‌رپرسیاره‌تیێ، ب هیڤیا وێ یه‌كێ نه بتنێ نوونه‌رێن ئیراقێ بن د قاره‌مانیێن ده‌رڤه دا به‌لكۆ یێن كوردستانێ ژی بشێن ده‌ستكه‌فته‌كی تۆماربكه‌ت له‌وما دخوازێ دكه‌ین جهێن په‌یوه‌ندیدار پشته‌ڤانیا وان بكه‌ن دا ژ ڤێ پلێ نه هێنه خوارێ و به‌رده‌وام ناسناڤان ده‌ستخوه‌ڤه بینن.
