راهێنه‌رێ زاخۆ: به‌رهه‌مێ پلانا باسكێت بۆلا زاخۆ نێزك بوویه
ئه‌ڤرۆ، عه‌لی حاجی :
سه‌رپه‌رشتێ گشتی یێ قوتابخانا باسكێت بۆلا زاخۆ دیاركر كو پشتی بۆ چه‌ندین سالانه و لدووڤ پلانێن هاتینه دانان گه‌شبینم د پاشه‌رۆژه‌كا نێزك دا دێ به‌رهه‌مێ وێ بینن و دێ بنه قۆناغه‌كا مه‌زن یا وه‌رزشا باسكێتێ ل سه‌ر ئاستێ كوردستانێ و ئیراقێ هاڤێژن.
زێده‌تر جوتیار عه‌لی د داخویانیه‌كێدا بۆ رۆژناما ئه‌ڤرۆ گوت: ئارمانجا سه‌ره‌كی یا ڤه‌كرنا قوتابخانا تایبه‌ت بۆ یاریا باسكێت بولێ دروستكرنا نڤشه‌كێ نوو یێ یاریزانان بیت و ئه‌و پلانا هاتیه دانان تا راده‌یه‌كێ باش یا سه‌ركه‌فتی یه و گه‌شبینم دێ پاشه‌رۆژه‌كا نێزك دا هنده‌ك یاریزانێن به‌هره‌مه‌ند و خودان شیان په‌یدابن و گرێبه‌ستێن گران بوها بۆ هێنه دان، ئه‌ڤچه‌نده ژی ده‌م پێ دڤێت ژبه‌ركو ژیێ سنێله‌یێ نه و دێ بۆ تیما تازه‌پێگه‌هشتیێن یانا زاخۆ هێنه پێشڤه‌برن و دووڤدا بۆ لاوان و دێ رژدبن ل سه‌ر ئه‌ڤێ كاری هه‌تا بگه‌هینه ئارمانجێن خوه كو كورێن باژێرێ زاخۆ ل خولێن ئیراقێ و ده‌رڤه پشكداریێ بكه‌ن.
ژلایه‌كێ دووڤه ناڤهاتی ئه‌وچه‌نده ژی دیاركر كو دده‌مێ ڤه‌كرنا قوتابخانێ دا هنده‌ك كه‌س هه‌بوون باوه‌ری ب پێنگاڤا مه نه‌بووینه و كێماتی بۆ قوتابخانێ دانا، لێ ئه‌م رژد بووین و مه به‌رده‌وامی دا پلانێن خوه و گه‌هشتینه ئه‌نجامێن باش كو گه‌هشتیه وی ڕاده‌یی راهێنه‌رێ یانێ یێ سربی په‌سنا یاریزانا و قوتابخانێ كر و شیانێن وان چو كێمتر ژ یێن ئۆرۆپایێ كێمتر نه دانا.
هه‌روه‌سان جوتیار عه‌لی گوت: هه‌كه یانێن ئیراقێ چو یاریزانێن پیشه‌كار ل سه‌ر تیمێن خوه زێده نه‌كه‌ن و پشتبه‌ستن ل سه‌ر یێن نافخویی بیت دێ باشتر بیت ژبۆ پشته‌ڤانیا یاریزانا و خولا ئیراقێ به‌ره‌ڤ باشتر چیت.
