راهێنه‌رێ زاخۆ: رژدین به‌رسڤێ د یاریگه‌هێ دا ب ده‌ین
ئه‌ڤرۆ،
چاڤه‌ڕێ یه ئه‌ڤرۆ ده‌مژمێر دویێ پشتی نیڤرۆ كوڕێن خابووری ل باژێرێ نه‌جه‌ف ببنه مێڤانێن یانا نه‌فت ئه‌لوه‌سه‌ت ژ چارچووڤێ هه‌ڤڕكیێن گه‌ڕا 14ێ یا خولا ئیراقێ بۆ یانێن پلا نایاب یا ته‌پا پێی ئه‌وا دێ ل یاریگه‌ها نه‌جه‌ف یا نێڤده‌وله‌تی هێته كرن.
یانا زاخۆ نوكه ب 20 خالان رێزا هه‌شتێ دهێت ژ پێنج سه‌ركه‌فتن، چار وه‌كهه‌ڤی و سێ خوساره‌تیا دێ بزاڤێ كه‌ت سه‌ركه‌فتنا خوه ل سه‌ر خودانێن ئه‌ردی دوباره بكه‌ت پشتی كو د قاره‌مانیا جاما ئیراقێ دا شیابوو د قۆناغا 16ێ دا ب لێدانێن په‌نه‌لتیێ سه‌ر كیستێ وێ ده‌ربازبیته قۆناغا هه‌شتێ، لێ د خولا ئیراقێ دا هه‌لویستێ نه‌فت ئه‌لوه‌سه‌ت باشتره ژ كوڕێن خابووری ئه‌وا ب 29 خالان رێزا دویێ دهێت، له‌ورا دێ یاریه‌كا بهێز و ب تاما تۆلڤه‌كرنێ بیت بۆ خودانێََن ئه‌ردی.
لدور دووماهی به‌رهه‌ڤیێن تیما زاخۆ سه‌عید حه‌سه‌ن هاریكارێ راهێنه‌ری بۆ رۆژناما ئه‌ڤرۆ گوت: یاریه‌كا ب سانه‌هی نابیت و دێ هه‌ردو تیم ب شێوازێ هوشداری و یاریه‌كا گرتی كه‌ن، هه‌رچه‌نده مه د جاما ئیراقێ دا سه‌ركه‌فتن ل سه‌ر ئینایه لێ ئه‌ڤه خولا ئیراقێ یه و هه‌ردو تیم باش هێز و ئاستێ یێ هه‌مبه‌ر دزانیت، ژلایێ هونه‌ری ڤه هه‌موو یاریزان به‌رهه‌ڤن و چو كێمانی نینن و ئه‌م رژدین دناڤ یاریگه‌هێ دا به‌رسڤێ بده‌ین و سۆزا مه ب ئه‌نجامه‌كێ باش ڤه‌گه‌ڕیێن زاخۆ، دڤێت د ماوێ 90 خوله‌كان دا سه‌رده‌ریه‌كا رێكخستی بهێته كرن پێخه‌مه‌ت گه‌هشتن بۆ هیڤیێن مه ئه‌وژی ده‌ستڤه ئینانا سێ خالانه.
